عوافي،
عم تسمعي صوت الرعد؟ بتعرفي قديش في عالم بتخاف منو؟
إلا أنا كثير بصير مطمن، حتى إني عملت ركوة قهوه، وعيط لرفيقي الختيار يشرب معي، بس ممنوع الحكي، بدي أصفن فيكي، وفتشلك عكلمة حلوه اطيب من كلمة "بحبك" لقلك ياها، بدي جرب إشيا غير، مع إني لسا ما بعرفك، بفتشلك بهالوقت لكنتي جيتي لان بوقتها مش حكون فاضي إصفن بشي غير عيونك، ومع إنك ما حكيتني إلا 45 سطر هيدي بدون كلمه سلام بصيرو 46، شايفك اصلاً رحتي تعديهن وتتأكدي، ما فيني كون معاق هلقد، وقول بحبك، بس فيني قول إنت مثل هيدي الشتوه، أول شتوه، بتشبهي صوت ريحتها، وبتشبهي طعمة صوت الشتي، بتشبهي نطرة كل نهر ناطرها ليفيض، حقلك إنت بيتي، يمكن حقلك انت مخدتي المريحه، إخواتي، ورفيقي لبحبو كثير، حقلك إنت أول فنجان قهوه وريحة الصبح، ودفا الموقده، وطعمة قعدة العيله، حقلك انت رمان ايلول، وعنب تشرين، وندى نيسان، حقلك بتشبهي شهاداتي وفرحتهن، ومشاويري من زمان وزواريب ذكريات كل هالمشاوير، حقلك بتشبهي العاب الحي، وخناقات الولاد الصغار قدام بنت حلوه لتشوف مين اقوى، بتشبهي كوخ بعيد بين الشجر، وأول لحظه من رجعه حدا كل عمرو مسافر، بتشبهي حالك، إنت كثير إنت عرفتي كيف ؟
جيتي هيك فجأه، مع اول شتوه وعبيتيلي راسي سوالف، عسيره السوالف، حقلك انت اجمل من سوالف جدي، وقصص ستي لمليانين ابطال لا بيخسرو ولا بموتو،
حقلك إنت ليلة العيد، وضحكات الولاد بالملاهي ثاني يوم، حقلك انت ريحة كعكات العيد بالحاره، وفرحة عيديّة أب لولد صار كبير، والله منيح معي وقت فتشلك بعد عكلمات أكثر، بس هلأ تذكرت حكياتك، ورايح قلك بحبك •
YOU ARE READING
قصص عالرف
Roman d'amourلا تقل لها "أحبكِ" أبحث عن كلمه أكثر توهجاً، كأنتِ... مُعتقدي، سجائريّ، مذهبي، قدري، مُصيبتي، قبيلتي، خمري...
