#سكك_القلوب🍃❤
#الحلقه_22❤
.
.
.
.
.
.
.
.
.
فتح عيونه ع نقاله يرن ..بحت فيه لقاه تسنيم ..بحت جنبه مالقش عماد ..
فتح ...
اوس>>"ببحه .."ايوا ..صباح الخير ..
تسنيم>>صباح النور ..
اوس>>كنه صوتك ..
تسنيم>>محمد معاك صاح ..
وزع نظره ع الدار ..وقمعز ..
اوس>>رقدتي انتي ..
تسنيم>>جاوبني محمد معاك ..
اوس>>لا ي تسنيم ..
تسنيم>>را يقعد داير ف روحه شي ..
اوس>>اطمني دزيت شباب وراه قاعد ف المقبره ..
تنفست براحه ..
تسنيم>>من خوفي حتي النوم مارقدت ..
اوس>>"تنهد .."مش حرام عليك ..
تسنيم>>"ببكا .."مش قادره ي اوس ..يظلمو فيه عارفته مايديرهش ..
اوس>>كلنا عارفين ان مايديرهش ..وعارفين محمد شنو ..معش اتعبي روحك والنبي ..
تسنيم>>"تنهدت .."حاضر ..
اوس>>نقولك حاجه ..
تسنيم>>هممم ..
اوس>>القفطان امس ..
تسنيم>>"قطعت عليه .."ماتكملش خلاص ..
ضحك ..
اوس>>كنت بنقول معش تلبسيه ياخذوك مني بعدين ..
تسنيم>>ماياخذني منك الا الموت انا ..
اوس>>بعيد السو ع قلبي ..جعنا يومي قبل يومك ..
تسنيم>>وانا بلاك مانعيشش ..يومي ويومك ف ليله وحده قول ..
اوس>>كنك اتفاولي ي بنت ع الصبح ..انا تنوض ع نحبك وانتي اتفاولي علينا بالموت ..
تسنيم>>"ضحكت .."صباحك سكر ..
اوس>>صباحي انتي ..
ضحكت بعد فهمت قصده ..وهو ضحك ..
يحاول ينسيها ..يحاول يكون لها السند ..يخفف عليها ..يطلعها من مود الحزن اللي معيشه فيه روحها ..هذا الحب صح ..اللي يكون ف ظهرنا اول مانحتاجوله ..اللي يصبي معانا ..بدون ذل ..بدون اي نيه شينه ..بس لان حبه بريء ..❤
فتح عيونه ع ضي الشمس ..
رفعهن جن ع اسم امه منقوش ع القبر ..ابتسم بألم ..وحط يده ع التراب ..
محمد>>"ببحه .."صباح الخير ي وجه الخير ..
قمعز ..وهو يبحت ف شاهد القبر ..غمض عبونه بألم ..ومسحهن ..وتنهد ..
صبا ..وهو يتمايل ..مسك روحه ..ركب سيارته ..واتكا ع الكرسي ..دموعه قعدن ينزلن ..بغزاره ..قعد يمسح فيهن بعصبيه ..وولع سيارته وطلع ف طريفه للنجار ..
.
.
.
طلع عماد ومعاه اوس ..
عماد>>المهم بعد تحكي معاه ديرلي رنه ..
اوس>>تم اطمن ..
طلعت تيماء وف جرتها سناء ..
تيماء>>صباح الخير ..
ردو عليها ..
سناء>>واتيين نحنا ..
عماد>>"مدلها المفتاح .."ولعي السياره جاي ..
هزت راسها وعدت ..
تيماء>>محمد شن حوه اليوم ..
عماد>>"تنهد .."مش قاعد ف الحوش اساسا ..
تيماء>>كلنا عارفينه مايديرهش ..
عماد>>الله غالب ..
رجعه>>صباح الخير ..
ردو عليها ..
رحعه>>شن خال حميده اليوم ..
عماد>>والله ي خالتي لعند توا مش ف الحوش ..
رجعه>>الله غالب الطيب ديما متلقي حظه عند ربي زين ي باتي ماتغشش روحك ..
عماد>>ان شاء الله ..
رحعه>>عدو لعملكم وان شاء الله محلوله ..وانتي ي منجوهه ركزي ..لك اسبوع غايبه ..
عماد>>معش ف غياب هي قدامي ..
رجعه>>موفقين ..
مع خشت سياره محمد ..بحتو فبها كلهم ..
نزل ..ويمشي بدون مايبحت ف حد ..وصل فيهم ..بحت ف عماد ..
محمد>>جاي النجار مش يدير دار ف دار امي ..كلم حد من الشباب الصغار يقعد معاه ..
اوس>>انا توا نقعد معاه ..
رجعه>>محمد ..عرسك يطلع من حوشي كيف عرس خوك ..
محمد>>"بحت فيها بحده .."ماعنديش خوت غير عماد وتسنيم انا ..وحوش امي قاعد يطلع منا ..هيا اوس ..
مشا ووراه اوس ..
عماد>>مضايق بس توا يروق ..
رجعه>>معذور ..عدو للمدرسه وقت عدو ..
عماد>>هيا تيماء ..
مشت وهي مضايقه ..
طلع عماد مع طلعت مفتاح وف جرته هيلانه ..
بيبله عماد ..
حياه مفتاح ..
هيلانه>>عليش تشيرله ..
مفتاح>>"ركب .."استاذ محترم والله ..
هيلانه>>اعي ي بابا مقرف ..
مفتاح>>عارفك انا عليش كارهتبه ..الشي هذا ي بابا مايدلش الا ع انك سطحيه ..الناس السمر ي حبيبتي مش مقرفين ..هذوم ناس كيفنا كيفهم ..ربي بعد خلقنا كلنا ..خلقنا من طين ..و كل حد وفيه ميزه معينه ..ماتقوليش ع خلقه ربي اعي ..
رفعت حواجبها ومش عاجبها ..
....
صبت من السرير ..مارقدتش هي اصلا ..طلعت ..سمعت صوت ناهد تعني ف المطبخ خشتلها ..
ناهد>>"برمت عليها .."صباح العسل ع البنات الحلوين ..
دارين>>"بصوت مبحوح.."صباح النور ..
ناهد>>تعالي وتيت الفطور مانعرفش شن تحبي تفطري ..بس جهزته كله ..
دارين>>تغبتي روحك ماعنديش نيه ..
ناهد>>لا مااتفاقنش ع هكي ..قمعزي بدون نقاش ..
دارين>>ابله ناهد والله ماعندي نيه ..
ناهد>>"مسكتها من يدها وقمعزتها .."قمعزي افطري مش نطلعو للسوق نشرو دبشك ..
دارين>>دبش شنو ..
ناهد>>دبش عرسك ولا تمشي هكي ..
سكتت دارين وهي سارحه ..
.
.
.
.
فتح باب دار امه ..واوس مصبي ع الباب ..خش ..يمشي ف بده ع الزيانه ..فتح الدولاب ..مد يده لبدي وطلعه ..قمعز ع السرير ..ورفعه خشمه ..وباسه وعاودها اكثر من مره ..دموعه قعدن ينزلن ..وهو يحرك ف يده ع السرير ويبكي ..واوس يبحت فيه بألم ..سمع الباب نطبق ..وخشت تجري ..مسكها اوس قبل ماتخش ..
تسنيم>>"ببكاء.."حول ي اوس ..
اوس<>"يمسح ف دمعته .."اهدي تسنيم ..خوك منهار بروحه ..
تسنيم>>بنشوفه بس ..
اوس>>بدون دموع ..
هزت راسها بإيجاب ..طلق يدها ..خشتله ..
تسنيم>>حميده ..
بحت فيها ..وفتحلها يده ..جت تجري وخشت ف حظنه وهي تبكي ..
تسنيم>>والله مامصدقه فيك حرف ..انت تربايه ماما مااديرهش ..انت الاصلي اللي فيهم ..
حط يده ع شعرها ..وباسها ع راسها ..
محمد>>"وخر وهو يمسح ف عيونه .."ليش مامشيتي لكليتك ..
تسنيم>>السنه بنوقف وراسك ..
محمد>>عليش ..
تسنيم>>نبيش ..حاسه روحي ماعنديش فيها نبه ..
اوس>>والقرايه بالنيه هيا ..
محمد>>صدق ..
تسنيم>>اها نبيش والنبي ..
محمد>>براحتك ..
دق الباب ..
اوس>>توا نفتح انا ..
محمد>>تم ..خشي للمطبخ ولا دوري مكان ..
هزت راسها وخشت دارها ..
.....
يمشي ف يده ع وجها ..
فتحت عيونها وابتسمت ..
نزار>>صباح الخير ..
نهال>>"بكسل .."صباح النور ..
قعد يبحت فيها بحب ..
نهال>>نزار بلا براده ..
ضحك ..
رن نقاله ..التفت ومسكه ..ورد ..
نزار>>قليبي ..
صبا>>مبروك ي عريس ..
نزار>>الله يبارك فيك لعقبالك ..
صبا>>كثر من الدعوات الحلوه ..
نزار>>هابا عليك انتي ..
ضحكت ..
صبا>>كنت بنرن عليك امس ..مغير جتنا ماما ..
نزار>>كيف حالها ..
صبا>>الحمدلله ..قريب تجيب ..
نزار>>ع خير وسلامه ..
صبا>>عقبال مانشوف عيالك ي حبيبي ..خلاص نزوره حني اضبح ..سلم ع نهال وباركلها ..
نزار>>يوصل مع السلامه ..
سكر ..
نهال>>من ..
نزار>>صبا ..تسلم عليك ..غريبه امي مش رانه ..
نهال>>بالك لاهيين ف الحوسه ..
رن نقال نزار ..
نهال>>عمرها طويل😂
رد وهو مبتسم ..
رحعه>>صباحيه مباركه ي عريس ..
نزار>>الله يبارك ف عمرك ..شن اخباركم ..
رجعه>>حال تعب الحوسه اللي هذا روح من امس وخواتك مدارس ..
نزار>>ربي يعاوتك ..والشباب شن جوهم ..
رجعه>>كويسين كلهم ي باتي ..حاي اليوم ماه ..
نزار>>ف الليل اها ..بنتعشا عندكم ..
رجعه>>باهي تنور ..لان بيتفقو ع عرس خوك ..
نزار>>خوبا ..اي منهم ..
رجعه>>محمد ..
نزار>>"قمعز .."كيف صار ..
رجعه>>هذا اللي صار ..توا اتجي وتفهم منهم ..
نزار>>باهي يمي تمام ..
رجعه>>خليتي نكمل غدايه سلم ع مريتك ..
نزار>>يوصل ..
وسكر ..
نهال>>شن في ..
نزار>>قالتلي يتفقو ع عرس محمد ..
نهال>>كيف خاطب هو ..
هز راسه بالنفي ..
نهال>>ماتشغلش بالك ..بالك عجبانه شي بنيه ويبي يزوج ..
نزار>>ان شاء الله يكون هك .."وبحت فيها .."بالك تصبي ..
ضحكت ..
ضحك ..وصبا خش للحمام ..
.
.
.
.
.
معتصم>>جاي ..
رجعه>>قال ف الليل ..
نز راسه ..
سعيد>>"خش .."صباح الخير ..
رجعه>>صباح النور ..قمعز اشرب حليبك هيا ..
سعيد>>امي نحس ف رقبتي توجع ..
جاته وحطت يدها ع رقبته ..
رجعه>>لوزتك هذي ..من النوم ع المكيف والدنيا صقع ..
خش سعد ..
سعد>>امي ..لوزتي توجع فيا .
رحعه>>يانا عليا انا وهم يتوجع واحد يتوجع الاخر ..قمعز افطر حليب توا تبرا..
ضحك معتصم ..
رحعه>>عليك حاله وخلاص ..
سعيد>>ماهو منك جبتيلي توم ..اللي نديره يحس بيه ..
رجعه>>ماهو من طياح سعدي افطرو افطرو ..
ضحك معتصم من جديد ..
سعد>>شن صار ف محمد ..
رجعه>>روح الصبح ..قال بيدير عرسه ف حوشهم ..وبياخذ دار امه زمان ..
معتصم>>ناوي من قبل شكله ..
رجعه>>مادخلنش بحد نحنا ..
معتصم>>ولد امه شن بيطلع منا ..
رحعه>>معتصم احنرمني ..
سكت ..
سعيد>>من الاخر ..محمد طلع فيها راجل ..
سعد>>حتي انا عجبني فيها ..
رجعه>>طيب كيف امه الله يرحمها ..
ردو الله يرحمها ..
سعيد>>توا نكمل فطوري ونزرق عليه ..
معتصم>>ابدو لقاقه عاد ..
سعد>>توا نمشي معاك حتي انا ..
بحت فيهم وصبا طلع ..
رجعه>>خوكم الكبير هذا ..
سعيد>>يحكي ف كلام مش منطقي يمي ..
هزت راسها وسكتت ..
......
ف المدرسه ..
تعرفت تيماء ع راسيل وهيلانه..
راسيل>>شفتك نازله من سياره مستر عماد ..
تيماء>>خوبا ..
بحتت فيها هيلانه ..
راسيل>>تحكي جديات ..
تيماء>>امممم ..بس امنا مش وحده ..
راسيل>>قصدك باتك متزوج اثنين ..
رفعت تيماء صوابعها ال6
تيماء>>ام عماد ميته ..ووحده مطلقها ..
راسيل>>عليك جو ..😂
ضحكت تيماء ..وهيلانه تبحت فيها وخلاص ..
......
جا الليل ..
اوس>>خليك بارد ..مهما يحكي ماتناقشش ..
محمد>>ان شاء الله ..شن قلتلهم سعد وسعيد مبدري ..
اوس>>قلتلهم راقد ..
هز محمد راسه ..
اوس>>هيا ..
هز راسه وصبا ..صبا معاه اوس ..
طلعو ..وتسنيم تبحت فيهم ..
مع طلعتهم هما ..طلعت ناهد مع دارين ..بحت فيها محمد ..ونزل عيونه بعدها ..
ناهد>>خير ..
محمد>>خير ..
كملن قدامهم ..وهم لاوره ..خشت سياره رؤوف ..ونزل منها ..
خشو لمربوعه رجعه ..لقوهم كلهم مقمعزين ماعدا البنات ومعتصم وحميد ونضال ونهال ..ومعاهم نزار ..ومفتاح عمهم ..
صبا نزار ..وسلم ع محمد ..ولاحظ محمد يسلم ببرود ..
قمعز وجنبه اوس ..ورؤوف قمعز جنب عطيه ..وناهد خشت بدارين للبنات ..
عطيه>>شن حيسير ..
محمد>>البنت معايا تعيش معززه مكرمه ..حتعيش معايا ف حوشنا هذ ..ف دار ..ومايضايقها حد ..ماتكون الا الملكه متاعه ..اللي يطلبه خوها من مهر انا فيه ..واللي يطلبوه من صبع كراعها لعند راسها نعطيه ..
مفتاح>>عين العقل ..
محمد>>"بدون مايبحت جيهتهم .."شغلي وتعرفه ضابط ف المخابرات العسكريه ..م87 ..السكن كيف ماوضحتلك توا ..والشروط اللي تبيهن البنت انا جاهز ..سبرها بسبر تسنيم ماينقصها شي ..
مفتاح>>شن قولك ي رؤوف ..
رؤوف>>"قدم وهو حاط كفوف يديه ف بعضهن .."مهرها ربع جنيه فوقه ماينزدش قرش ..اختي حتي لو كانت شنو انا نطلعها بجهاز كامل كامله مكمله ماينقصها حتي منديل ..العرس اخر الاسبوع الحاي يكون طالع ..اما الحفله..
محمد>>"قطع عليه .."عرس مش داير ..يوم حنتها اللي هو يوم الفاتحه ..وثاني يوم ف الحنان تلبس الفيلو وناخذها وفضت ..
نزار>>بس ..
عطيه>>احسن حل ..
بحت فيه نزار ..
هز رؤوف راسه ..
رؤوف>>متفقين.."وصبا طلع .."
بكت سالمين وهي تصبي ..
"مانفرح بيك كيف البنيات ي بنتي ..مانديرلك عرس ونفرح بيه يناعليا حظك شين ي بنيتي .."
حظنت دارين ناهد وهي تبكي ..والبنات يبحتن فيها بألم ..
.
.
.
.
صبا طلع ووراه اوس ..
نزار>>محمد استنا ..
صبا ..
نزار>>شن القصه ..
محمد>>اكيد عندك بيها علم ..مش لازم نحكي شي ..
نزار>>حكوها ليا الشباب بس قصدي انت راضي تستر ع عمله انت مش دايرها ..
محمد>>ولان عارف روحي مش دايرها حنستر عليها ..
نزار>>مش حتندم ..
محمد>>مش محمد اللي يندم ..تبي شي ..
نزار>>سلامتك ..
هز راسه وعده وهو يحكي مع اوس ..
عماد>>ماناقشكش اه ..
نزار>>لا ..بس ظلموه واجد ..
عماد<>بالنسبه لباتي ..محمد ولا ف يوم حيسامحه ..
نزار>>لاحول ولا قوة الا بالله ..
.
.
.
.
بحتت ف الدار ..الحدبده ..ابتسمت ..ومسكت السياقه وبدت تسيق فيها ..
من فرحتها بخوها ..
زغرتت ..
ضحك اوس ومحمد وهم يسمعو فيها ..
اوس>>مقتنع ..
محمد>>تمام الاقتناع ..
اوس>>فيها خيره لك ولها ان شاء الله ..
محمد>>لعقبالك ..
ضحك اوس ..
....
هيلانه>>كيف ي ماما ..
فنار>>عادي مرات هو يشبه امه ..
هيلانه>>ممكن ..
فنار>>تسألي واجد عليه ..
هيلانه>>عادي ..
وصبت ع الروشن ..
فنار>>ان شاء الله يكون هك ...
ماردتش عليها طلعت وخلتها ..
هيلانه>>عندي فضول نعرف العيله مش اكثر اما هو ..مش عاجبني بكل اعي ..
.
.
.
.
تبحت ف ناهد ..وهي اطبقلها ف الدبش اللي شراته لها اليوم ..وتحط فيه ف الشناطي ..
ناهد>>صاحبتي متاع كوافير ..حجزتلك عندها ..وبعون الله تطلعي خيال ..
دارين>>بابا ماطقش حتي ثلاث شهور ..
ناهد>>الله غالب ..
دموعها نزلن ..
ناهد>>بدون بكا عاد ..بعدين خلاص العرس قرب توا وجك يقعد تعبان ..
هزت راسها وساكته ..
ناهد>>شريتلك عرم توت ..وارواب ..
ضحكت دارين ع تفكير ناهد ..بحتت فيها ..
ناهد>>كنك تضحكي ..سيورك حابتيه ي حنه مغير تقولي ..
صحكت من جديد ..
اشويه ورقدت دارين ..
وناهد لمت الحوسه وطفت الضي ..
دق باب الحوش ..
لبست بدله الصلاه ..
وقتحت ..
نضال>>نبيك ف موضوع ..
ناهد>>امشي توا مش وقتك ..
نضال>>حتي لو قتلك حسين يسلم عليك ..
فنصت ناهد بخوف ..
.
.
.
.
.
#يتبع❤
#فافي🍃❤
أنت تقرأ
سكك القلوب 🍂❤️
Roman d'amourالحق لا يقاوم سلطانه و الباطل يقذف بشهاب النظر شيطانه و الناقل إنما هو يملي و ينقل و البصيرة تنقد الصحيح إذا تمقل و العلم يجلو لها صفحات القلوب و يصقل إن أقواكم عندي الضعيف حتى آخذ له بحقه وإن أضعفكم عندي القوي حتى آخذ منه الحق...
