معاكم اخوكم عادل فى فخ الزوجية , انا مراتى على فكرة ست زى الفل والله ,ست بيت شاطرة وأم فاضلة ومحافظة على بيتى وعيالى والبيت على طول نضيف ومترتب وهدومى مغسولة ومكوية والولاد مذاكرين وعاملين الواجب , يعنى انا عايش حياة رائعة من وجهة نظر كثير من الناس وفيه أصدقاء كتير بيحسدونى عليها :
يابحتك ده إنت عندك زوجة تتقال بالدهب.
إحمد ربنا إنها ست بيت كويسة ده انا مراتى لحد دلوقتى مبتعرفش تعمل محشى.
مراتك معندهاش أخت اتجوزها الله يسترك.
ده إنت متهنى والله حظك من السماء.
وكلام كتير من ده وفعلا انا فى نعمة ومدرك وعارف كده والله لكن واحد منهم وانا باقول له إنى مش سعيد سألنى:
مراتك بتطبخ كويس؟
أيوه , أستاذة فى الطبيخ والحلويات
وبيتها نضيف ومترتب ؟
أيوه على طول نضيف
ومهتمة بعيالك وبيك؟
جدا جدا .
الله ماخلاص , بتشتكى ليه ؟ وتقول مش سعيد ليه بقى ؟ هو الراجل عايز إيه أكتر من كده؟ ياريتنى مكانك ياأخى ,إنت تلاقيك بتخزى العين .
هو الراجل عايز إيه أكتر من كده ؟؟؟؟ على فكرة الراجل بيبقى عايز أكتر من كده أيوه هاتقولو لى عايز إيه ؟ عايز زوجة , أيوه عايز زوجة .
أنا مش حاسس بإنى متجوز خالص, أنا بس راجل عايش فى البيت , ببساطة شديدة لأن مراتى سلوى تحولت من زوجة لأم بقت صورة طبق الأصل من أمى وفجاة تحولت من زوجة فى أواخر العشرينات لأم فى أواخر الخمسينات , آه والله , كل كلامها عن شغل البيت والخضار والطبيخ والغسيل.
والله باتكلم جد كل كلامها عن اسعار الخضار فى السوق , الصبح تتغدوا إيه ؟ بالليل تحضر العشاء ودايما تتفرج لى على برامج الطبيخ وبتتابع المسلاسلات الهندى والتركى دى متعتها فى الحياة.
تختفى ساعتين فى المطبخ وتطلع لنا بصينية كيك معتبرة وإلا فطير كل ده حلو قوى ورائع وفيه ناس كتير بتحسدنى عليها طيب أنا فين بقى ؟
انا كراجل وكزوج فين من ده كله ؟ فين إحتياجاتى انا ومتطلباتى انا , المسألة مش أكل ولبس وبيت نضيف أنا عايز أعيش مع زوجة مش أم, مانا لو كنت عايز أفضل مع امى مكنتش إتجوزت لكن انا إتجوزت يبقى عايز زوجة , ببساطة شديدة مش هاتفهموا اللى بأقوله غير لما أحكى لكم على حياتى مع امى قصدى مع مراتى سلوى.
جوازنا كان قسمة ونصيب يعنى لاحب ولاغيره وعجبتنى وحبينا بعض ومحصلش بينا أى مشاكل ولا مرة لأنها زى الأم صبورة وبالها طويل , بعد الجواز بفترة ولما بقى عندنا اولاد إتغيرت سلوى 360 درجة , وبعد ماكنت ست جميلة وشيك بقت حاجة مختلفة وبتعمل دلوقتى اللى أمى بتعمله بس بعد 40 سنة جواز يعنى بعد اللبس الشيك والأنيق حتى داخل البيت بقت على طول لابسة مقفول ولبس واسع وشعرها بعد ماكان بيتعمل بالسيشوار وشكله جميل تحول إلى شكل هندسى ملفوف على هيئة شكل دائرى إسمه كحكة , وبتخاف على المصاريف ومعدش عندها أى حس بالرومانسية إطلاقا وأصبحت كائن بيتوتى ملتصق بالبيت جدا ولا عايزة تروح فى حتى ولاتغير من نظام حياتها ولا تخرج ولاتتفسح ولا ...... ولا .........
أنت تقرأ
فخ الزوجية
Humorكتاب كوميدى يعرض بعض الحالات فى الزواج يعرضها بطريقة الكوميديا السوداء ويحتوى على 12 قصة نصفها على لسان رجال ونصفها على لسان نساء متزوجات وتم نشره ورقيا عام 2017 لدار لوغاريتم للنشر والتوزيع
