زوجوني منقبة 🌹مكتملة 🌹

الجزء 24 🌹

🌸زوجوني منقبة🌸
🌼بقلم: Aicha _mos 🌼
🌸البارت 24🌸

جلسوها وبداو بالتعشاق والصلاة على النبي والزغاريت تعالات فالصالة...لعيالات واللبنات عينيهم غير على صفاء وختها...جمالهم زايد نغزة تشهى غير تبقا تشوف فيهم....بداو يشطحو ويغنيو وناضو لبنات بشعوراتهم الي تخطف الأنظار كيتباهاو بيه....كيتمايلو غير بشوية على إيقاع الاغاني...بحالا تيشطحو فوق نفسهم....جلسو تاني ونوضو صفاء تشطح بيناتهم وهي تتبتاسم غير بشوية دايرين بيها حسناء وزاينة وسامية وخولة وبنات عماتها يزغرتو وفرحانين ليها وحتا هي فرحانة وعلاش لا وهذا عرسها 😍.....خرجات تاني طلعات لبيتها عيانة...اما هوما بداو يحطو لعشا ويضايفو الناس....عائلة سيف غير كيوشوشو بيناتهم بلا زوينة لا خايبة وحكلها دايرة النقاب لا داعشية متليقش لسيف هي وياه متناقضين كيفاش غيعيشو لا ميستاهلهاش لا هي متستاهلوش المهم كلا ولغاه شي حاسد وشي معجب شي فرحان وشي مكسور القلب💔......كملو لعشا وتجمعو الطوابل وجلسو تيتحتتو تاني وفرقو اتاي والحلوى عاود.....حتا بداو الناس يعياو وبغاو يمشيو.....طلعات سامية عند صفاء الي كانت لابسة غوب فالبيض مستورة د العرائس المحجبات مع شال بيض ونقاب بيض حتا هوا وبالغين مكيعجبهاش الطابون....سامية بقات غير تتشوف كانت تتبان فقمة الرقي والأنوثة وحشمتها عاد مزادت زيناتها....قربات منها وباست ليها رأسها وصفاء تترعد والدموع فعينيها لحظة الوداع شحال صعيبة فجميع المواقف ولكن وداع العروس لأهلها عندو واحد الطابع دالحزن بوحدو....هبطات ليها النقاب وشدات ليها ايدها وهبطات معاها وحسناء موراها تتبكي وتصلي على النبي مع بنات عماتها وحتا سامية....هبطوها لتحت كان تما جلال جاسم وراجل حسناء واكيد لعريس البقية كولشي خرج برا شي ركب ومشا وشي باقي غيمشي معاهم للفيلا.....مهبطينها وزاينة حابسة رأسها غي بززز شوية تبكي الدموع فطرف عينيها....سيف غير كيشوف  مبهوط بهاد الجمال بحال شي حمامة نازلة من جنة غتكون ليه وختارتو هوا بوحدو دون جميع الرجال....وقفات قدام باها تتبوس ايدو وتبكي وهوا يعنق فيها ويطبع قبلات فراسها ويرضي عليها والغصة فقلبو مسخاش ببنتو وطرف من كبدتو تمشي ولكن هادي هي سنة الحياة💔

عنقات مها تاهيا وتبكي فحظنها بحال شي بنيتة صغيرة لاصقة فيها ومبغاتش تفرق عليها جابت ليهم البكية كاملين....زاينة مقدراتش تحبس دموعها وبدات تبكي حتا هي وتهمس لصفاء فوذنها وتوصيها....بعدات من مها غير بالكشايف وسلمات على حسناء حتا هي ومحبسوش من لبكا وعلى جداتها وبنات عماتها وعماتها....مشى سيف وراجل حسناء وشي بنات عمتها يعاونوهم فباليزاتها داروهم فالسيارات وبقات صفاء واقفة حدا مها شادا ليها ايدها وتترعد...قرب منها جاسم وبتاسم وشكرها حيت واقفات تزوج بسيف وقداش هوا حزين حيت ولدو خارج الطريق وبلي هي الي غتنقدو من لي هوا فيه وهي ردات بحياء وقالت بلي غتحاول دير الي فجهدها باش تخليه يكون كيف بغاوه وتعاونو على نفسو...وعلى هاد الحوار دخل سيف الي عقد غوباشتو تاني عاد كان فرحان ولكن هاد الكلام الي جرحو والي خلاه يبان قدامهم بحال شي ولد صغير داك الولد الي معارفش اش يدير وخاصو الي يعاونو...معرفش علاش محملهاش تاني علاش كل مرة تيحاول يتقبلها تترجع تقول نفس لكلام لا هي لباه شنو زعما غتقدر تبدلو غير حيت بغاو كيفاش غتخليه يتقرب من دين !؟ لهاد الدرجة متأكدة من قدراتها كرز على ايدو وكرهو ليها تكون من جديد فقلبو واكد لراسو بلي مستحيل يخليها تلعب بيه كيف بغات وخا عارف بلي هي وباه باغين مصلاحتو ولكن علاش يتحكمو فيه هوا معندو شخصية ولا معندو رأي !! ضبط اعصابو بزز وتقدم نحوها....

...مد ليها ايدو وشداتها زير ليها على ايديها مي متنابهاتش بالها غير مع الفراق💔 .... تم غادي بيها مخرجها وهي عينيها ولاو حمرين باالبكا خطوة القدام وجوج للور....مقاداش تمشي ركبها فاللوطو الي مزوق بالورد وداكشي...وسلم على جلال وزاينة وعلى راجل حسناء وتوادع مع مو وبها وركب لور حداها وكسيرا....طول الطريق وهي تبكي فصمت لحال شي مشة صغييورة...سيف بقا مضارب غير مع راسو  بغا يواسيها عزو عليه دموعها ولكن كل مرة تتجي فوذنو كلامها تيتراجع ويعقد غوباتشو ويحقد 😤.....وصلو للاوطيل الي كان خمس نجوم كان كادو من جاسم جناح ليهم واحتفالا بزواجهم.....هبط من اللوطو وهبطات حتا هي ودموعها حبساتهم....دخلو للداخل والشيفور تابعهم بباليزتهم...سيف قدامها وهي موراه حادرة راسها....سجل دخولهم وعطاوهم سوارت الجناح وباركو ليهم...طلعو فالمصعد وحتا واحد فيهم مكيشوف فلاخر سيف مباغيش يشوف فيها غيضعاف قدامها للمرة الالف...اما هي حشمانة وتتلعب بايديها بتوتر....وصلو للجناح وحلوه ودخلو....صفاء بقات غير تتشوف جناح كبيير بحال داكشي دالافلام...جناح مخصوص للشخصيات المهمة تتمشى بشوية ووتشوف وتستكشف......حط الشيفور لي فاليز وخرج مخليهم بجوج....سيف مشا بلا ميدوي معاها خرج للبالكو كياخد نفس حاس براسو غينفاجر....
#يتبع...👑