Deewangi

Chapter - 4 : Pehli Mulaqat

Jahan ek taraf maa ke sar pe chinta ke kaale badal chaye hue hai wahin dusri aur apne pita ka suit pehen dono bhai Malabar Hills mei ghoom rahe hai, kissi mauke ke talash mei ki kaise wo jhat se ameer ban jaaye.

Aur bhagwan ki daya drishti se unhe aisa mauka bhi mil gaya hai. Raste mei ek badi si bungalow se guzarte waqt unhone kuch baatein sun li jis se unhe acha khasha mauka mil gaya.

Andar baithe log, kissi ladkon se milne ki baatein kar rahe hai jinko unhone kabhi dekha nahi hai par tareef ke pul bandh rahe hai unke liye. Saath hi koi shadi ki baat kar raha hai. Vineet aur Viren ke mann mei laddoo phoot pade. Aisa mauka fir kahan milega unhe? Ameer ladkiyon se shadi karenge aur fir unki property toh aise hi unki ho jaayenge.

''Oo ho ho!!! Bhai lagta hai aaj toh apna kaam ho hi jaayega, inn ameer zadiyon se shadi kar hum bhi ameer ho jaayenge aur fir humko koi jarurat nahi hogi uss jhopdi mei rehne ki!!" Vineet, hadh se jyada utsuk hote hue bola.

''Haan, sahi bola. Ye roz roz ke gareebon ki jindagi se tang aa gaya hoon main. Hamari sakal Tata, Birla, Ambani si hai par bhagwan ne Rastogion ke wahan phek diya par koi baat nahi aab hum ameer ban sakte hai.'' Apne bhai ki haan mei haan milta hua, Viren bhi badh chadh ke bola.

But as it is said, even to do nothing you have to first do something. Bhale hi dono bhai apas mei plan bana le par unn ladkon ka kya jo aane wale hai? Unhe kaise rokenge wo?

''Viru kuch toh sochna padega humko unn ladkon ke liye, aise hi ye mauka nahi jaane de sakte apne haath se hum.'' Vineet ne apna demag chalate hue bola, par kare kya ye fir bhi na sujh raha tha. Fir khayal aaya kyun na wo pehle hi pahuch jaaye aur ye kahe wahi wo ladke hai, sab vishwas toh kar hi lenge kyunki kissi ne dekha nahi hai, fir unki achi angreji kab kaam aayegi. Aur rahi baat unn ladko ki toh unke liye bhi kuch soch liya jaayega.

Vineet ne saara plan Viren se bataya jisne jhat se uski baat mann li aur dono bhai chal diye ghar ke andar. Main gate pe unhe watchman ne rok liya, puch tach ki aur Girish ko bulaya.

Girish ke aate hi dono bhai unke charno mei gir pade.

''Pranam uncle ji!!" Dono ne ek saath sur milate hue kaha, Girish ji ko toh samajh bhi na aaya kuch par ashirwad de diya.

''Beta kaun ho aa dono? Mujhe nahi lagta main janta bhi hoon aap logon ko!!" Girish ji bole, apne demag pe kaafi jor diya unhone par fir bhi dono ka chehra yaad nahi aaya unhe.

''Uncle ji hum US se aaye hai, aapse bat ki hogi na..wo shadi ke liye!!" Jhoothi sharmahat dikhate hue Viren ne jawab diya.

Uski batein sun Girish ji ka chehra 240 volt ke bulb sa khil gaya, toh aa hi gayi wo ghari jiska unhe barso se intezaar tha, akhir aab unki betiyon ka bhi ghar basega, wo dulhan banegi, sasural jaayegi, apne pati sang khush rahegi aur kuch saal badh Girish ji apne natin natio sang apne garden mei khelenge. Kuch hi waqt mei Girish ne saare sapne dekh kiya aur kahin na kahin khade khade wo khel bhi rahe hai.

Vineet aur Viren ne ek tak ek dusre ko dekha, fir samne khade aadmi ko jo jaane kya soch raha hai par unko sochta dekh dono ko ye laag gaya ki shayad ye aadmi paagal hai jo khuli aankho se baat karte karte sapne dekh raha hai.

Girish apne sapno ki duniya se kuch waqt badh khud wapas aa gaye aur jab unhone fir ladkon ko dekha, phut ke muskura pade. Khich ke dono ko andar ke gaye jahan unke saare rishtedar baithe hai.

Waise toh dono itne sabhya hai nahi par sab ke pair chu liye jaise ki maano kitne tamizdaar ho jabki apne ghar mei dono ne aaj tak bas apne pita ka khoon hi choosha hai.

Khair, yahan toh minute mei sabne unko pasand kar liya aur unke bina kuch kahe Bindu toh unke tareef ke pul bandhe jaa rahi hai aur dono ko iss baat ki jada bhi chidh nahi hai kyunki unki baaton se hi unhe dab pata chal raha hai - khud ke baare mei.

Fir jab akhir mei unse hi sawal kiye jane lage toh dono ko aasani ho gayi jawab dene mei aur fir Bindu toh thi hi wahan jo unn se pehle unke bare mei bol rahi hai.

Kuch hi waqt mei ladke Girish ji ko hadh se jyada pasand aa gaye aur wo aab iss soch mei padd gaye ki betiyon ko kaise milwaya jaaye ya fir kaise unhe manaye kyunki wo puri tarah convince ho gaye the ki inn se acha ladka unki betiyon ko mil hi nahi sakta.

''Beta ye toh batao, aap dono ke parents kab aayenge yahan? Hum unn se hi shadi ki baat karenge na!!" Girish bole, ladkon ne ek dusre ko dekha.

Par iss se pehle wo kuch bole Bindu fir kud padi.

''Maa baap ka kya hai bhai saab, inke mata pita ne puri choot di hai inhe. Meine jab baat ki unse toh keh rahe the agar beton ko pasand aa jaaye ladki toh aa jaaye shadi kar ke unke liye intezaar kar time na waste kare.'' Bindu ki baat na toh Girish ko pasand aai na hi baki baithe kuch logon ko.

Bhale hi wo na aaye par baat toh Girish karenge hi unn se par pehle betiyon ko mana le.

Kuch waqt badh rishtedar chale gaye apne ghar ko, dopahar toh ho hi chuki thi toh unhe laga aab ghar jaana jaruri hai kyunki ladkiyan aati hi hongi lunch ke liye aur unhe dekh bilkul khush na hongi wo. Waise toh Girish ne kaafi roke unhe par wo na maane kyunki unhe fir apni baizzati na karwani thi isliye chalte bane aur Girish ji ko mauka mil gaya apni betiyon ko ladkon se milane ke liye par jis tarah sab unhe himmat de ke gaye dono ladke atyant soch mei dub gaye. Akhir aisa kya hai milne mei??

....

To be continued...