𝗠𝗼𝗿𝗲 𝗧𝗵𝗮𝗻 𝗛𝗮𝘁𝗲 || 𝗦𝗨𝗡𝗚𝗝𝗔𝗞𝗘 ||

𝗠𝗼𝗿𝗲 𝗧𝗵𝗮𝗻 𝗛𝗮𝘁𝗲 [𝗨𝗻𝗶𝗰𝗼𝗱𝗲]

" ပတ်ဆောင်းဟွန်း! ပြန်ပေး!! "

ဖတ်လက်စစာအုပ်ကိုဆွဲယူပြေးသွားတဲ့ ပတ်ဆောင်းဟွန်းက တကယ်ကိုတစ်ခုခုပဲ။ ကိုယ့်ဘာသာကျောင်းပိတ်ရက်မို့ အေးဆေးထိုင်ရင်းစာဖတ်မည်ကြည့်တော့ အနှောင့်အယှက်လာပေးသော ဆောင်းဟွန်းနောက်သို့ အော်ဟစ်ပြီးပြေးလိုက်ရပြန်သည်။

" ရအောင်လာယူလေ အသေးလေးရဲ့ "

ကျန်တာထက် ကိုယ့်ခန္ဓာကိုယ်ကိုထိပါးလာလျှင် ငြိမ်မခံတတ်သူမို့ ဒေါသကပို၍ပင်ထွက်လာရသည်။

" ပြန်ပေးလို့ပြောနေတယ် အရူးကောင် "

" ငါ့ကိုသင်္ချာကူတွက်ပေးမှ ပြန်ပေးမယ် "

" အခု ငါ့ကိုလာခြိမ်းခြောက်နေတာလား "

" မသိဘူး၊ တစ်ပုဒ်လောက်ပဲကူတွက်ပေးလို့မရဘူးလား ငါ တကယ်မတွက်တတ်တော့လို့ "

" ငါက ဘာလို့ မင်းကိုကူညီရမှာလဲ "

" ရတယ်လေ အဲ့ဒါဆိုလည်း မင်းစာအုပ်ကိုပြန်မယူနဲ့တော့ပေါ့ "

" ဟာကွာ တကယ်ပဲ၊ အေး တစ်ပုဒ်ပဲတွက်ပေးမှာနော် တစ်ပုဒ်ပဲ "

လိုချင်တာရသည်နှင့် စပ်ဖြီးဖြီးမျက်နှာကပြန်ပေါ်လာကာ စာအုပ်ကို မျက်နှာဆီသို့ပစ်ပေးလေသည်။ ရှေ့မကြည့်နောက်မကြည့်‌လုပ်တတ်လွန်းသော ဆောင်းဟွန်းကြောင့် ထလုပ်ချင်သော်ငြား ပြဿနာထပ်မတက်ချင်တော့၍ လက်သီးသာဆုပ်ရင်း စာအုပ်ကိုဖွင့်လိုက်ရသည်။

" နံပါတ် ၄ ပုစ္ဆာနော်၊ တွက်ပြီးရင် ငါ့ကိုပြော စာအုပ်ပြန်ပေးမယ် "

" အလကား ငပျင်းကောင် "

" မင်းပြောတာ ငါကြားတယ်နော် "

ဆိုဖာခုံတွင်ပျင်းရိစွာထိုင်ရင်း ဆရာကြီးစတိုင်လ်ဖမ်းနေသော ဆောင်းဟွန်းအား ဂျယ်ယွန်းလျစ်လျူရှု၍သာ သူပြောသောပုစ္ဆာကို တွက်ပေးလိုက်တော့သည်။

သူငယ်ချင်းဖြစ်ရုံမက အိမ်နီးချင်းလည်းဖြစ်နေသေးသည်က စိတ်ရှုပ်စရာများထဲကတစ်ခုပင်။ ယခုလည်း ဂျယ်ယွန်းမိဘတွေရော ဆောင်းဟွန်းမိဘတွေပါ ခရီးသွားကြ၍ သူတို့နှစ်ယောက်သာ ကျောင်းတက်ရမည်ဖြစ်၍ မလိုက်ရဘဲ ကျန်နေကြခြင်းဖြစ်သည်။ ထိုထက်ပိုဆိုးသည်က ဂျယ်ယွန်းကို မိဘများက တစ်ယောက်တည်းကျန်နေမည်ကို စိတ်မချ၍ ဆောင်းဟွန်းအိမ်တွင် နေခိုင်းခဲ့ခြင်းပင်။ အခုတော့ တစ်ယောက်တည်းနေရသည်ထက်ပင်ဆိုးစွာ ရန်သူနှင့်တစ်အိမ်တည်းတွင် နေနေရတော့သည်။