*' رباط الحب '*

part 7

ʚϊɞ ʚϊɞ •.¸(7)¸.• ʚϊɞ ʚϊɞ

وقفنا البارت إللى فات عند

أول ما رجعوا ياسمين راحت هى وملك على أوضتها وماسابتش ملك فى حالها غير لما حكيتلها عن كل حاجه وبالتفصيل الممل وكانت ردة فعل ياسمين:

الله الله عليييييكي يا لوكه ما تتخيليش أنا مبسوطه عشانك أد إيه

ملك: يا بنتى محسسانى إن فى حاجه حصلت يعنى دى مجرد مواقف عاديه مابتقولش يعنى إن أكيد فى حاجه عشان خاطرى بلاش مخك يروح لبعيد أنا بس قولتلك كل إللى حصل عشان إنتى أصريتى

ياسمين: لا وماكونتيش ناويه تحكيلى يا روح طنط !!!! والله يا ستى من إللى حكيتيه أنا شايفه ومن الواضح جداً جداً إن وليد ميال ليكى وإنتى فى الطريق إلى الميلان ليه وحاسه كده يا أختى يا حبيبتى إن البوكيه صدق لما وقع عليكى عشان يتنبأ بإنك العروسه إللى عليها الدور

ملك: بطلى هبل يا ياسمين الله يكرمك انا مش ناقصه ، ماتخلنيش أندم إنى حكيتلك بقى ولو سمحتى قفلى على الموضوع خااالص وبكره أثبتلك إن كل كلامك ده تهيؤات وغلط جداً جداً كمان!

ياسمين: طاب لما نشوف يا قطقوطه مش بعيد أنا إللى أثبتلك بكره إن كلامى هو إللى صح وهنشوف هقوم عشان ولاء قرفانى رن وللحديث بقيه يا مزه

خرجت ياسمين من هنا وملك فضلت تكلم نفسها:

معقوله يكون كلام ياسمين صحيح؟؟!! معقوله يكون وليد ...!!!ومعقوله إنتى يا ملك تفكرى فى الحاجات دى ؟؟!!!! لا لا يا ملك شيلى الهبل ده من دماغك عشان ما ترجعيش تتصدمى لأ بطلى يا ملك إنتى مش بتاعة الحب والكلام ده إنتى كده كويسه

وكالعاده فضلت تطرد كل الأفكار دى من دماغها

وبالليل كلهم قرروا يسهروا للصبح عشان دى آخر ليله ليهم فى الرحلة

الأمهات قعدوا يرغوا مع بعض ،،وجمبهم بشويه الأباء بيلعبوا طاوله وشطرنج

أما عن الشباب فـ ولاء إقترحت عليهم يلعبوا لعبة الصراحه وقد كان

بدأوا لعبة الصراحه وأول سؤال كان من

مروان لياسر : خطيبتك أول حب ليك ولا لأ؟ وعرفت خطيبتك إزاى أصلاً؟؟

ياسر : أممممم مابحبش أسئلتك الرخمه دى يا عم مروان >_

مروان: لو سمحت لا مجال إنك تهرب دى إسمها لعبة الصراحه يعنى تحكى كل حاجه وبالتفصيل ومش هتنازل عن سؤالى المركب ده

ياسر: ماشى يا زفت ، أيوه حبيت قبل هدى ،بنت أيام الجامعه وروحت إتقدمتلها وإحنا فى 3 كليه كده وأهلها رفضوا عشان وقتها كنا لسه بندرس وباخد مصروف من أبويا ، بعدين بقى حسيت بجرح فى كبريائى وإن أبويا كان عنده حق لما رفض الموضوع ده وصرفت نظر عنها خالص وركزت فى دراستى وخلصت وإشتغلت على طول لأن تقدريى كان كويس ، وبعد سنه شغل ليا فى الشركه إللى أنا فيها دى بنت لسه بتدرس جت تدريب وكنت أنا إللى بدربها ولما إتخرجت إشتغلت عندنا فى الشركه أُعجبت بيها وتحول الإعجاب لحب فروحت إتقدمتلها وبقالنا سنه كده مخطوبين وقريباً جداً هنتجوز بس، إتبطيت يا عم مروان ؟؟؟!!!