"بين ظلماتهم "
سيء جداً أن تَحمل هموم ليست مناسبه
لسنك في وقت المفروض انك في
اجمل ايام حَياتكَ!!
__________________________
قراءه ممتعه.........
( 1 )
اكثر شعور مكروه هوه فقدان أكثر انسان غالي على قلبك انسان بدونه الناس واقاربك يتحولون لوحوش
خاصه اذا جنتوا بس "بنات"
وبين يوم وليله يروح "الاب" الي العائله من يروح تتفكك وانته طفل صغير متعرف شديصير بل دنيا كل همك اللعب والونسه وبس..
طفله مثل أي طفل يحب يلعب ويطلع بلشارع ويا الجيران وأجواء وصراخ والنسوان الي كاعدين كدام بيت وحده من عدهم وجديتي وياهم ايام من تذكرها
صدك تحن الها
ايام كلها سعاده وانته وجيرانك ناس طيبه
صديقاتج الي جنتي تلعبين وياهن "بيت بيوتي "
اللعبه المفضله بالنسبه النه
بس فجئه بسنه نحسبها مثل اي سنه عاديه تمر فرح وحزن
بس ابدا منتوقع هاي الي والسنوات الي بعدها كلها "حزن"
يوم وليله ناس أكثر من قذ**
تقتل
تسبي النساء
تغتصب الاطفال والنساء
تهجر عوائل
ناس بلا رحمه بقلوبهم عوائل تهجرت فقدت ابنائها نسائها أطفالها
"داعش" أكثر ذكرى سيئه صارت بالعراق شباب مثل الورد راحت بسبب هذا التنضم القذ*
وللاسف نص الشباب رضخوا الهم بحجه "الدين"
نص محافظات العراق دخلولها ومن ضمنهن
"الانبار"
المحافظه الي اسكن بيها اكو اجمل من هاي المحافظة بس احبها المحافظة الي عشت بيها طفولتي ومراهقتي والى الان لازلت بيها
وللاسف هاي المحافظة ضمن المحافظات الي احتلوها تنضيم (داعش)
طفولتي من أي طفل مثل محجيت بل بدايه
ابوي الوحيد لأهله ويا عمتي جديتي اكبر من جدي بخمس سنوات جدي ابن عشائر وجديتي لا
بس صارت القسمه عن طريق احد الأقارب
وتزوجوا...
Flash back
2007
ابوي الي اسمه "محمد" مواليد "1988"قرر يتزوج بنت عمته الي هي
ماما بس جديتي مرادت ماما جانت تريد أحد أقاربها
لكن بابا عند اله يتزوج "قمر" الي هي ماما وجديتي تقبلت وتم كلشي وتزوجوا
امي مواليد "1990"جانت صغيره نجحت للثالث متوسط
وتزوجوا بشرط امي "تكمل دراستها"
مرت ايام ومعامله جديتي وعمتي مو زينه ويا ماما
وللاسف مكدرت تكمل دراسه وهذا أكثر شي غلط سوته
المهم امي وأبوي مو عن حب تزوجوا
ومرت الايام وامي طلعت "حامل"
ومعامله جديتي كلش سيئه وعمتي جانت كليه
حسب معرفت انو هيه محضرت عرس اخوها الوحيد
تخيلوا!!!
وره تسع اشهر امي جابت "بنيه"
2008/6/7
سموها "ايه" الي هيه اني جديتي ام امي سمتني على اسم بنت احد الأقارب
ابوي جان يشوفني ويروح وجديتي حسب معرفت مرات قليله اجت وجدي معرف اذا اجه أو لا
جان شهر كلش حار تموز وما ادراك ما حر تموز
جانت خالتي الوسطانيه هي تهتم بيه هيه وجديتي
مواليد 1993 وخالتي الصغيره 1999 وامي الجبيره
وعندي خالين الاول مواليد 1994والثاني 1997
وره مطلعت ماما الاربعين رجت لبيت جدي
ابوي جان شرطي وعصبي كلش
وره سنتين كبرت لكن جنت كلش اتمرض مناعتي كلش ضعيفه ومره من المرات حسب مكلولي ردت اموت جدي جان بل حج وحاروا بيه والحمد لله شفيت
صرت سنتين كبرت وامي طلعت "حامل"
وجابت البنيه الثانيه
2010/24/8
وره كم شهر من ولادة امي جابت بنيه وجديتي ام ابوي سمتها على اسم امها "عائشه" تزوجت عمتي ابن عمتها
كبرت ووعيت شويه ابوي تعامله حريص جدا بحيث اي شي ميخلنه نسوي جنت مكدر اطلع ويا صديقاتي اله من يروح جنه اني واختي نخاف كلش من عنده
جان كلش حريص على نظافته وملابسه وسيارته كل ما يمل يغير الحمد لله حالتنه زينه وملابسنه زينه بس جان عصبي اكو موقف لهسه اتذكره
