#غدوية_وعوض
بقلم ايثار كمال 🦋
(1)
_على لسان غدوية ..
يعني اسي آآكلتوم بتدوري تقنعيني انك ما صدقتي رفيدة !!! اتي أكان بالصح ماك صدقتيها أكان ما بتجي تفتحي معاي تحقيق بي هني !!
قبلت علي نبوية وقالت انت رايك شنو يا ستهن؟ كلامي دا غلت؟
نبوية: بريي والله حاشاك قولاََ غلط، اصلها رفيدة الفقرية دي غير ملي الراس بالكلام الماهو صِح آبتسوي في شي شكيتها على الله ..
نقشر في التسالي وناكل ونعاين لي كلتوم
غدوية: عااد انا حدثتك بعد كدي مخيرة اكان صدقتيني ولا لا بي طريقتك
نبوية: عاد يا كلتوم عليك النبي كان رفيدة ماها كضاابة غدوية السمحة الـيا يمة تقول للقمر قوم انقعد في فجتك تقولي بتدور تشلب فوزي !! فوزي القباحة السنين عليه !! مع احترامي ليك يا خيتي لكن كلام اصلوو ماهو منطقي ..
كلتوم: بتقولن عنو كدي في وشي ؟!! ما بتراعن لي مشاعري؟؟ ما اتوقعتها منكن يا بنوت آمنة ( اهيي اهييي اهيي "دا بكاء يا اخوانا😂"
غدوية: هوي هاا خلي كضبك داا، بعدين انحنااا ديل الما اتوقعناها منك عااد خوتك خوة العدوو ..
كلتوم: حصل خير انا بنضم مع فوزي واشوف الكلام دا صح ولا غلت
نبوية: الله يعدلها عليك
كلتوم: في امان الله،، سلاام
____________
كدي مدي كيس التسالي دا جااي نفرق بيه حبه ..
نبوية: اتي آغدوية اختي الود القيافة داك خبرو شنو؟
غدوية: ( غتيت وشي بتوب عاد اول ما اسمع سيرتو بخجل اصلي خجاااالة) نصيح وشديد وحياه اسم الله قبيل عاد قربت اقع مد لي كيس الخدار كداا احيي بس يا يمه عوض السرور المجنن البنوت
نبوية: اكان كدي خلاس، اتي يا يمه بي زولك السمح المالي مركزو تجي كلتوم تقول بدوري تشلبي فوزي اليا عوذ بالله من القباحة غايتو الله يغفر ليناا
غدوية: بري خليها اصلها مجنونه بيه ان شاء الله يضويلا
.. خلاس شيلي مني الشي دا ملحو جاب لي حرقاان
نبوية: اسي التسالي دا ملحو كتير اكان ماك كضاابه، وصحي التسالي دا اداهو يانا عوض اداه لسريرة قبيل وقتها الفاتت الجزارة
غدوية: كدي جااي وحاه الله من قبيل اقول التسالي دا ماهو تسالي عم بدر الدين تسالي جديد ونضيف وملحو معقول ،، كفااك هاا اديني تساليني
نبوية: عااد لينا الله من قلنا حقو نيسينا الحرقاان وكتره الملح😏.
_____
[شخصيات الرواية]
عائلة فرفوشة بتحب الضحك واللمات والحركاات
سعدية: ام نبويه وغدويه زوله لطيفه كدا وهاديه
غدوية: بطله القصه زوله عسل جدا وهي الحتدي القصة طعم عمرها بداية العشرينات
نبوية: اخت غدوية الصغيرة اي زول يشوفهم يقول تومات نفس التفكير والحركات العويرة عمرها 19 سنة
السريرة: اختهم الصغيرة اربعة وعشرين ساعة براا مع فطينه صحبتها
عوض: سيد الجزارة السمح " عوض السرور المكسر البنوت" مقولة غدوية المشهورة
كلتوم: صحبة غدوية وبدوية الا انو رفيدة باديه تلحس ليها مخها
رفيدة: السواطة بتاعه الحله ما عايزة زول احسن منهااا
__________
في نص الحوش ماسكة تلفونها الربيكة اتصلت بي رقم مسجل بي "عادية" وعلى بال ما ترد تتكشم وتحسب في النجوم
....
فوزي: كيفنك يا كلتومتي ؟ صحتك وامورك؟
كلتوم: (غتت وشها بخجله) نحمدلله طيبة بس انا ما قلتلك ما تقول لي كلتومتي كدي بتخجلني🙈
فوزي: انا عندي منو غيرك ادلعو يا ستهن اخجلي ساي الخجل زاتو يشبهك
كلتوم: 🙈. بعد سمعت صوتك خلاس يلا يا فوزي بعد دا نورالدين بجي وبقتلني اكان عرفني
فوزي: في امان الله يا السمحة ..
وقفلو
بينها وبين نفسها
سجميي يا يمة انا ضربتلو عشان اسعلو من غدوية لكن بعد كلتومتي دي نسيت اي شي انضربلو تتااني
...
كلتوم: الوو؛ ات 'انت' صحي آفوزي بدور اسعلك من غدوية قالو بقت تضربلك نص الليل تتونس معاك الكلام دا بصح؟ ما تكون بتدور تشلبك مني؟
فوزي: لا مو صح جبتي الكلام دا من وين يا الشقية ؟
كلتوم: كيفن يعني مو صح ؟!! كلامك دا انو رفيدة بتكضب علي !!!بتدورني اكضب صحبة عمري يعني ولا كيفن؟
فوزي: ما قلت كدي انااا، بعدين غدوية دي مي ياها صحبتك من زمنكن الشفع اسي تجي تسوي فيك كدي. دحين الشفع ما يصدقو الكلام دا. خلينا دا كلووو ماك واثقة مني وكضبتيني عشان رفيدة ! سمح خلي رفيدة تنفعك
وفصل الخط ..
كلتوم: سجمي سجمي قفل فيني الخط اريتني اكان ما سمعت كلامك يا رفيدة كررعلي ود الناس ما يطفش ولا تحصلو مصيبة بي سببي ما بتحمل فراقي ما يقوم ينتحر ولا يرمي روحو في الترعة ولا يمشي لي غابة اولاد احمد ياكلنو الحيونات كرررعليك يا كلتووم ( اهييييي اهييييي اهيييييي)
_فوزي
الله يهديها المجنونة دي اسي دا كلام تقولو بتدور تقارني بي رفيدة وتكضبني عشانا
نمشي نشرب لي جبنة نظبتبها المزاج وامشي الكورة افرق شوية
التلفون اتصل لقاها كلتوم قال والله يا كلتوم اصلي آبرد عليك الليلة مش اكان دقيتي 100 مكالمة اكان 1000 الليله آبرد
_______
من الدغش "الصباح بدري" نسمع ليك في صوت الباب وحياه اسم الله ناس الشرطة في المسلسلات آبدقو كدي
نبوية: ايا ايا جيناا .... مالك آ كلتوم من الدغش المات منو؟ والباب دا اكان تقلعي بالمره ..
كلتوم: اهيي اهيي اهييي وينا خيتك جابت لي المشاكل اسي بي سببها فوزي بفكر في الانتحار والغرق
نبوية: اجي يا جنس داا ؟ كدي اسي اسكتي خلي البكا شان نفهم
جات غدوية طالعة
غدوية: اصبحنا واصبح الملك لله خير ان شاء الله عسى ماف زول مات
كلتوم: فوزي البدور اموت بي سببك اهي اهي
غدوية دقت يدها في صدرها بي خلعة
سجميي!!! مالي اناا
كلتوم: اتخلعتي كدي مالك شان بتحبيه ما بتدوريه يموت مش كدي؟
غدوية: وحياه الله يا كلتوم الله واحد تتهابلي كدي الشبشب دا ببلعك ياهو
كلتوم: بعد رجعت منكن دقيت لي فوزي سعلتتو من الكلام قال لي ماحصل قلتو كضاب انا ما بكضب خيتي رفيدة واصدقك
نبوية: نان اسي الانتحار وينو وبعدين كان في انتحار صحي صحي بنتحر أنا دي وارتاح من نقتك دي.
غدوية: هي يعني بتدورن تقنعني انو فوزي دا بنتحر لي عشان بت ؟ عاد والله مستحيل وحياه اسم الله دا كان جاه الموت بياباهو استغفر الله عااد لكنو اكتر زول بدور يعيش يجي يموت عشانك غايتو الله يهديك
نبوية: صحي والله كلامك صح، اسي بالله خلي دا كلو جاينا من الصباح خلعتينا وقطعتي قلبنا شان تجي تقولي كلامك دا ..
الله يهدبك صحي صحيي ...
________
رفيدة: هي ما شفتيها ما انا كلمتك وقلتلك الموضوع دا خلي علي هي طرورة ساي وبتصدق اي كلام وانا فوزي دا اكان ما خليتو ليك تفي لي في وشي داا
عشه: حيااا منك يا رفيدة انا وحاه الله بحبك اها كدي بعدين امشيلا شوفي الحصل شنو سمح؟
رفيدة: سمح خلي الواطة تصبح شوية
وكم يوم كدي وفوزي يبقى ليك
عشه: حيااا ان شاء الله عااد دا يوم المنى
_______
سعدية: سريرة اسريرة آسريرة
سريرة: ايا يا يمه!
سعدية: تعالي امشي لي عوض قوليلو امي قالتلك عَزِّل لي بامية سمحة كدي وشليلو القروش من مطبقتي
غدوية: خليها يمة بعزاها براي اصلي عندي مزاج احوم وبالمرة اجيبها
سعدية: سمح امشي
طلعت الحوش
نبوية: مزاج لكن ان شاء الله كل يوم عاد
غدوية: عاد كيفن ما يكون في مزاج دا المزاج زااتو اصبح بي شوفتو احيي بسس من عوض السرور المجنن البنوت اصلو اكان ما جنني آبرتاح والنجيب منو من تساليهو السمح داا
نبوية: لا ملحو كتير قتي
غدوية: بري ما حصل، اريتو تسالي الدكاكين يا يمه تساليه نضيف وطاعم اخير من حق بدرالدين الكلو محرق ومعتت
نبوية: عاد نكارره جميل ماك كنت شايفة بدر الدين دا ماف اسمح من تساليه النهار النهار تاكلي في
غدوية: بري دا طرفي من بدر الدين وتساليه ودكانو انا بس مع عوضي داا الله يحفظو لي من البنوت الشلابات امات عيوناََ زايغة اي واحدة تدورو ياعاينلها ان شاء الله عيونو ما يشوفن غيري هي استغفر الله ما يقوم بعد كدي يعمى ...
يتبع...
#ايثار_كمال
