العُــــقَــــابُ الأســــطــــوري🌼🦅|🇲🇦

🦅الحاكم الغامض و عروسه المغرورة🦅|22

بقا تيشوف شحال و هي تتسنا فجوابو حتى تنهد تنهيدة من الأعماق تيحاول بيها مايخرج حتى حاجة من فمو لي تلوث الأمسية ديالهم لي كان مخطط ليها تكون سعيدة...

شدها من ذراعها و خرجو من تما بلا ماينطق بحتى كلمة حتى هي فهمات البلان و ماحاولاتش تدوي معاه أبدا..هز الدعوة لي كانت فيها بلورة هي بمثابة مفتاح البوابة لي غتوصلهم للحفل..تحلات البوابة قدامهم منها عبرو للضفة الأخرى فين هزات راسها فقصر غريب عليها و اول مرة تشوفو...

بانو ليها الضيوف تيتمشاو فوق السجادة الحمراء على شكل كوبلات قليل لي جا بوحدو ولا مع صديقو ولا صديقتها...

حسات بذراعها تهزات حتى خشاها فذراعو و ولات ضايرة عليه بلا مايشوف فيها...

دخلو حتى هوما و كان الداخل عامر بالمدعوين لي هازين مشروباتهم و صوت حديثهم واصل لعند الباب...

السربايا غاديين جايين ببدل موحدة تيفرقو فالمشروبات و المقبلات على الضيوف حتى وقف عليهم واحد محرك راسو بإحترام: تفضلو سيادتكم...

آزاد هز لراسو و خاطبو بلا مايتسنا جوهر تجاوب: متتشربش..يمكن ليك تمشي!

حنا راسو و مشا بصينيتو يشوف ضيوف خرين بينما هي غير تضور فعينيها تتكتاشف فهاد العالم الجديد عليها يمكن هي أصغر حاكمة أو شخصية كبيرة بيناتهم كاملين...

فواحد القنت كانو عيون متفحصة و التوشويش على الجهد من طرف مجموعة ديال النساء لي تقدمات منهم وحدة قاصدة آزاد و جوهر...

المرأة بإبتسامة: اوه شكون عندنا هنا مرحبا..فخامة الحاكم آزاد و الحاكمة...

سبقاتو جوهر هاد المرة ناطقة بكل غرور: جوهر!...

المرأة مدات يديها باقة محتفظة بديك الإبتسامة د البروتوكول: متشرفين ا جوهر انا الحاكمة السابقة لسحرة الإنتقائي ثيودورا مرحبا بيكم

زادو دخلو للداخل فين كانو مجمعين الأغلبية..فينما تيكون شي واحد عارف شخص آخر تيوليو بحال شي كروب مشاركين حديث خاص بيهم فقط قليل لي واقف بوحدو...

فجأة تسمعات "آزاد" حافية من صوت إمرأة تقدمات لعندهم هازة كاس مشروبها فيدها...

تلفتات جوهر بواحد النظرة متعجرفة شكون هادي لي غتجرأ تعييط لراجلها بسميتو حافية؟!..خصوصا فهاد المأدبة لي غتجمع شخصيات غيقدمو بعضياتهم بشكل رسمي و غير لي تيعرفك معرفة شخصية لي غيعييط ليك بسميتك حافية هنا!...

المرأة وقفات قدامهم و عينيها على آزاد بواحد النظرة لامعة: قلت نسلم عليكم ياك مافيها باس؟