الحلقة ١
تشك تشك صوت المفتاح
السلام عليكم
حوش مظلم، اياه قداش مرة نقول خلوا لامبة الممر والعة، تو نعلقهالهم ف الجديد دركت وخلاص
أفضل شي يصير ف اليوم هو المرواح للحوش بعد يوم مرهق
خدت عيني ع الدار لفة
حتى السرانتي مش مصكرينه
ترا بالله الديار التانية.. لا
هكي هلبا، الواحد يتصل يهزبهم
خط يقطع سكنة حرفة
الواحد يخش يدوش ويسك النوم أرجل
ندندن وأني نوتي ف حوايجي
فتحت الحمام برضو سرانتي مفتوح يالله جت عليه هو عيون مرهقات الواحد يغسل وجهه
قمت عيني ف المراية أني مش أني
نزلت عيني بسرعة وغسلت من جديد وقمت راسي
أعوذ بالله من الشيطان الرجيم
للحظة نحساب شكلي اللي تغير
تلفتت ما فيش حد، قلبي مش حاس بيه من كثر الدق
#يتبع
أنت تقرأ
العوامر
Werewolfالعوامـــــر تتكون القصة من ٦ شخصيات أساسية عائلة صغير فيها الأب خالد والأم ثريا والأبناء سلمى وأحمد ومن اتنين صحاب أسامة وعلي والجار جمال كاشخصية ثانوية .
