يـــــــّردلَي ( محبوبة القلب )

مشاهد من عمق الرواية

مرحبا حبايبي.. اشونكم..

طبعا اعتذر عن حذف القصة وبلغتكم قبلها
السبب اشنو؟

لذلك كلت انزل هاي المشاهد حتى تتحمسون
للقصة
ولا تنسون تحفظون هاي القصة بمكاتبكم
وتنتظروني اخلص السادس وارجعلكم بكل ما
هو جديد ان شاء الله..

مشاهد من رواية يردلي (محبوبة القلب)

بشارع مهجور من الناس حتى الطير ما يرف بينو
دمار بيوت وانقاض ودخان سيارات مفجرة
واسلاك حديدية.. المدينة اشبه بمكان
وقعت بينو اكبر معركة بالعالم..
مكان ما كنتو اتصور اني اشوفو الا بالافلام
البوليسية او الخيال العلمي..
لكنو صار ع ارض الواقع وقدام عيني..
لكن عقلي يرفض التصديق..

بفستان يصل لكعب رجلي وعبايه سوداه
فوقا وشال خفيف تاخ 
وكانت احواسي (ملابسي)
مشقوقة ومنقعة بماي المطر..
ماشية معاهم حافيي  ورجليي تنزف دم
بس ابطي بالمشي شويي..
هيم يجوني ويدفعوني حتى اكمل مشي
وويحد منم حشك البندقية بظهري فزعتو
وبكيتو ومشيتو واعرج بمشيتي..

من وجع رجليي صحتو وقعتو ع وجهي
صاح واحد منم وكانت لهجتو ما عراقية
يمكن سوري..

_ انتي.. قوومي احسن ما افضي هالفرد براسكِ

لطيتو ع وجهي.. وصحتو ببكي

_ رجلييي... ما اقدر امشي.. والله..
برداني وجوعاااني والاسوء رجليي ما
يعينوني اقف... دخيل الرب تعوفوني..

زاغني (خزرني)  بعيونو ودنگر (دنج) عليي
وجر ايدي ولواها  وقومني وصاح بوجهي..

_راسكِ بكسرو ازا بتضلي تحلفي هيك..

_ ابوس ايدكم اتركوني..

دفعني قوي ورجليي وجعوني لان دستو عليهم
اثنينم مجرحات من الشظايا الي بالارض..
مشيتو وانا رافعة لراسي للسما وعيوني
تتوسل ببكي.. همست بصوت خافت بيني
وبين نفسي

_ يا عذررا يا قديسة.. انجديني

دفعني بسلاحو

_ تحررركي يلللاا... وبلا علاك مصدي..

......

_ مامااا.....

_ ررراح اموووت.. اخخخ

_ ماما... اتحملي شويي 

_ رجليي يمكن انقطعو...

صحتو بهستيريا...

جواني... جووااااني.... وينننك...
بابا... بااااابااااا...
قمتو اضرب ع رجليي معرف شسوي
شلتو الطابوق بيدي الترجف..
احاول اشيل شويي
من الحجر بلكي اقدر اطلع ماما..

اصطبري ماما.. الله يخليكِ تحملي..

......

صوت يرجف ع اللاسلكي ودموعو تنهمر..
يشاهك بالبجي ويدو الثانية صايبتها
شظية وعتنزف.. صاح باللاسلكي الي
بالزور عيلقط اشارتو..

_ سيددددي..

_ كووول..

_ سيدي.. وبجى مكدر يسكت..

_ ولكككك احجي شبيك تبجي..؟

_ اخخخخ... شكول لامه هسه لو سالت عنه

_شكوووو ولك وگعت گلبي..

_ .. خضررر

_ يا ستتتار شبيه..

_ خضرررر تصاوب سيددي..

_ اهدا... خضر راح يكون بخير اطمن..
راح احاول ادزلكم احد للموقع ولو بيها
خطورة لان بعدنه ما مشطنا الاماكن القريبة منه

اصاااابته قوووية....؟.. الوووو..؟ وينننك..؟

صاح بضجر وزت اللاسلكي من ايدو بعصبية
ومشى..

......

مرررحبا.. شلونكم..

قدمت هالمشاهد حاليا حتى تاخذون فد
فكرة عالقصة لان اغلبكم تتحدث عن عنوانها..

عنوان القصة يردلي وهي كلمة تركية اردفوها
بالفلكلور المصلاوي ومشت عند اهلنا
بالموصل وخصوصا الموصل القديمة..
فحبيت امزج الفلكلور المصلاوي وبين معناها
الاصلي باللغة التركية تعني (محبوبة القلب)
حتى كلما مرت هالكلمة ع بالكم تذكرون
موصلنا الحلوة طبيعتها الخلابة وفلكلورها
المميز.... وجمالها الساحر
وجمال بطلتنا الي ما تقل جمال عن مدينتها
الحدباء..

وانتو اكيد راح تعرفون بالنهاية ليش اختاريت
هاالاسم الغريب من خلال هالقصة..

اللهجة راح تكون مصلاوية بحته
مع اللهجة البغدادية الي يتميز بيها
بعض ابطال القصة.. مع ارفاق بعض
المصطلحات التعريفية باللهجة
حتى الكل يفهم ع اللهجة باعتبارها
لهجة صعبة الفهم..

الرواية تحمل في طياتها احداث حصلت
بالفعل وجارت ع فتاة بعمر الورد..
بدءا من قسوة مجتمع لا يرحم الى
بطش وحوش بشرية احلت سفك الدماء
واباحت هتك الاعراض والاموال
واضاقت ذرعا بكل من كان تحت حكمها..

انتظروني في الرواية الشعبية الاطلق..

رواية يرردلي..(محبوبة القلب)

ادعموني بتصويتكم وتعليقاتكم ومشاركتكم القصة
واذا وصلت 2000 مشاهدة خلال فترة قياسية
راح ابدي بيها ان شاء الله فور انتهائي من رواية
حلم السنين3..

همتكم يلااا ادري بيكم كفوو

تحياتي الكاتبة _اية الملا رعد ♥