دخلت الغرفه وهي تحس الدنيا كلها سوداء بعيونها رمت نفسها على سريرها وهي تبكي تبكي بقهر وحرقه بعد ماسمعت كلمة ابوها لامها وهو يقول بكل كراهيه : انتي طالق طالق بالثلاث روحي الله لايردتس
طفله بعمر السبع سنين تبكي تبكي لانها تحس نفسها سبب كل شي طفله كانت تتمنى انها مانولدت تشوف الاطفال كيف مرتاحين وعايشين وهي لا ليلها ليل ولا نهارها نهار تصحى على هواش امها وابوها وبعض الاحيان توصل للضرب ماصارت تستغرب ماعندها وقت تبكي او تطلع الي بخاطرها من العيشه الي عايشتها ماعاشت طفولتها نفس البنات من يوم ولادتها المشؤوم بالنسبه لها
كانت تكرهه ديرتها وقرايبها وكل شي يخص اهلها كانت تتتمنى الموت ولا هالعيشه تصحى على هواش امها وابوها وضرب ابوها......
.
.
.
صحت وهي تحس راسها ثقيل من بعد الاحلام الي راودتها امس تعوذت من الشيطان وقامت تصلي الفجر وتستغفر دخلت المطبخ تحاول ترفه عن نفسها واخذت الراديو حق جدتها وشغلت اغنيه وبدت تغني معها كانت تحاول تشغل نفسها ماتبي تفكر اخذت دفترها وفتحته وبدت تكتب تلتجئ إلى الكتابات تعبر عن شعورها فيها ....
اذهب لنومي لعلي ارتاح من التفكير
اجدني قد انغمست اكثر... شي مزعج
لااستطيع التركيز لااستطيع العيش براحه...
كل شيء افكر به كل شيء!!!
افعل شي لأحد افكر به
اتكلم مع احد افكر وافكر...
بكل وقت حتى عندما افعل لنفسي اجدني افكر به
حتى مشاكل وهموم الناس افكر فيها
ماهذا! وصلت لحد الجنون بالتفكير !! يزعجني ذلك انه شعور مرهق...
دائما اعتقد انني قد نمت ولكنني لا لم انم " قد انغمست بالتفكير "
واعتقد ان ذلك حلم ولكن ليس ذلك " انه فقط تفكير"
عقلي لايصمت ابداً ابداً انه يزعجني جداً
اريده انه يصمت لدقيقه فقط اريد ان ارتاح حقاً
اه شعور مزعج جداً ..مزعج لحد الجنون
.
.
وقاطع كتاباتها اليد الي على عيونها قفلت دفترها وحطت يدها عليها وقالت : يمه؟
بعدت يدها ودفتها وقالت : خيررر للحين ماعرفتي ان ذي الحركه حقتي
ضحكت ولفت : وعددد
وحضنتها بسرعه
وعد: وحشتيييننييي
ملاذ: اكثرر متى جيتو وليه ماقلتي لي
وعد : حبيت اسويها مفاجأه
دخلت وراها ريم وحطت الاغراض : مفاجعه والله
حضنتها ملاذ وهي مبسوطه بجيتهم وقالت: كثرو من ذي المفاجعات
ريم : الحين يابزر ماتعلمين يمه نوره وشوله
وعد: خلاص اسكتي كنت بسويها مفاجأه
ملاذ : وشبلاك انتي معصبه
ريم : امي عصبت وحطتها براسي
وعد ضحكت: العذر والسموحه
ملاذ : وعد ماتخلي حركاتهاا المهم بروح اسلم على خالتي من زمان عنها
طلعت وطلعو البنات معها وقابلتها خالتها وحضنتها وسلمت عليها وقالت خالتها : ملاذ ناحفه؟
ملاذ ضحكت : ليه تبيني اصير دبه
خالتها : ازين لتس من ذا النحف مب زين ياامي
ملاذ : من عينيا باكل كثير عشان اسمن
ضحكت خالتها وباست راسها : الله يوفقتس يبنيتي
وعد : خير وش حركات المراهقين ذي
امها ناظرتها بطرف عين : انا مراهقه يعني يالعجوز
ضحكو كلهم وقالت وعد: محشومه
خالتها : الا ملاذ وينها امي ماشوفها
ملاذ : امي نوره رايحه من الصبح لاام صقر
ريم: يوه ام صقر ذي شوي وتطلع بااحلامي
ضحكت وعد: لاتسمعك امي نوره
خالتها :خلو عنكم الكلام الزايد ونظفو ورتبو اغراضكم مابي اشوف الشناط ذي قدامي وانا بروح لهم
ملاذ : خاله ماودك تريحين شوي وتروحين لهم
خالتها : لا بسوي مفاجأه على قولتكم لاامي
وعد جلست : اوف احسني سنه ماجيت هنا
جلسو كلهم وانسدحت ريم : تتتوقعون خالي منجد بيجي؟
ملاذ : اي واحد
ريم : وش متوقعه يعني فهاد! اكيد فايز
ملاذ ضحكت : نسيته احسه ماله وجود
وعد : لاتحسين تاكدي
ملاذ : مافهمت واذا جا شفيها
ريم قامت وتربعت : تستهبلين وانا وش قلت! عادي بس انه يعيش هنا للابد صدق غريب !
وعد: تو ماتش انتي شفيها يعني اكيد معد يبي يجلس في ديرته بعيد عن اهله وقال بعيش عندهم
ريم : مو كذا على طول !
ملاذ : ريم مافيه اي شي غريب في الموضوع ليه معلقه عليه
وعد: تتابع مسلسلات واجد
ريم قامت: كلو تبن الشرهه علي
ملاذ : وين تروحين
ريم : وين بروح يعني بدخل اغراضي احسن من مقابل وجيهكم
وعد :دامك لابسه عبايتك روحي لنياف وقوليله تقول امي دخل الاغراض
ريم : فارقي بس
-
في بيت ام صقر
ام صقر : حيا الله من جانا حيا الله ام نياف
ام نياف " الخاله" : الله يحيتس وشلونتس وشلون العيال والاهل وش مسويين
ام صقر : الحمدلله انتي اخبارتس
ام نياف : ابد والله امورنا تمام وشلونتس انتي يمه عساتس بخير
الجده نوره : ابد ماننشد الا منكم
طلعت لهم بنت بالشاهي وحطته وسلمت على ام نياف وقالت ام نياف : ترف؟ وش ذا الزين ماشاءالله
ام صقر : ايه هذي ترف
ام نياف : وينتس معد نشوفك
ترف : موجوده الا انتو الي معد نشوفكم في الديره
ام نياف : ايييه ياامي اشغال
الجده نوره : وذا الاشغال مابعد خلصت
ام نياف : الله يعين
ترف : البنات جاو؟
ام نياف : ايييه ينشدون منتس روحي لهم
ام صقر : لا اكيد تعبانين الحين خليها بعدين
ام نياف : لا والله لو تشوفينهم الحين مافيهم الا العافيه ماتقولين جايين من سفر
ترف ضحكت : خليهم يخلصون ويرتاحون بكره ان شاءالله اروح لهم
رفعت جوالها ام نياف تتصل على وعد وردت
وعد : لبيه
ام نياف : اطلعي شوفي نياف برا قوليله يدخل ادق عليه ولا يرد
وعد : ثواني بس بشوفه... لا يمه مب موجود
ام نياف : وين راح ذا الولد حتى جواله مايرد عليه
وعد : يمكن يتمشى شوي
ام نياف : انا قايله له لاتدخل لين اشوف البيت فاضي اطلعي دوريه
وعد : يمه انتي اوفر وش بيجيه يعني
ام نياف : انا قلت لتس اطلعي ودوريه واذا لقيتيه قولي ادخل ولاتروحين لحالتس
وعد : ابشري
-
في مكان بعيد يركبون اغراضهم بالسياره
سلطان : يابنت الحلال جيبيها هناه
الهنوف : اسكت انت مالك دخل
سلطان: لاحول ولا قوة الا بالله هنوف والله لو ماتجيبينها ان انزلتس ف البرحه
الهنوف : ع اساس خوفتني الحين انت ووجهك
ابو سلطان " الخال فايز ": يابوي انتي وياه وش بلاكم
سلطان سحب منها الشنطه وحطها بالمكان الي يبيه
الهنوف : خيررر والله تندم اوريك
ام سلطان : الهنوف اركبي ولا اسمع صوتس
الهنوف : طيب طيب يصير خير
ركبو كلهم وقال ابو سلطان: توكلنا على الله ناقصكم شي
ام سلطان: لا
مشو ومن بين السوالف والكلام الهنوف قالت : يبه بسالك الحين عندي 3 بنات عمه صح
ابو سلطان : الهنوف الله يهديتس ماتعرفين بنات عماتس يعني
الهنوف ضحكت : اقصد فيه غيرهم
ابو سلطان : عاد عيال خواني من ابوي مايجون كثير
الهنوف : يبه طيب ماعرفهم انا ليه!
سلطان :كلنا نعرفهم الا انتي
الهنوف : من هم
ابو سلطان: ريم ووعد ونياف عيال اختي الي من امي منيره ومنال بعد اختي الي ماندري وين ارضها وبنتها ملاذ وفهاد عمتس ذولي كلهم اخواني تعرفينهم اما اخواني عيال ابوي محمد وراشد وسالم ومنصور
الهنوف : طيب يبه وش سالفة عمتي منال
ام سلطان : يووه ازعجتي ابوتس
ابو سلطان : ماعليه خليها
ام سلطان : زين انا بقولتس الله يسلمتس منال خذت ابو ملاذ وهو متزوج وطولت ماجابت احد بعدين جابت ملاذ ومدري وش صار بينهم وتطلقو وملاذ عاشت عند جدتس نوره ابوها مع مرته وعياله وامها اعرست وراحت مع رجلها
الهنوف : يعني جابو ملاذ وتطلقو؟
ابو سلطان: لا جلسو 7 سنين وتطلقو
الهنوف وهي تعد : اوف يعني الحين ملاذ عاشت عند امي نوره 11 سنه
ابو سلطان : لا 13
سلطان : طيب عمتي منال وين راحت يوم اعرست
ابو سلطان: راحت مع رجلها وماعاد قامت تجي اهلي بلا بينهم مكالمات
الهنوف : الحين علاقة ملاذ بعمتي زينه؟
ابو سلطان تنهد : الله اعلم يابنتي
الهنوف : طيب ابوها؟
ابو سلطان : اذكر قد خذاها وعمرها 10 سنين اسبوع ورجعها
ام سلطان : يعني ماخذاها مره ثانيه؟
ابو سلطان: الله اعلم
.
.
.
