ضوء القمر

الضوء الخامس

قراءة ممتعه 🌹

شهر 6/10
يوم بدت اول امتحانات اخير سنه واني ميته خوف بديت اقره ايات وادعيه ورحت للامتحان وحمد الله جان سهل من رجعت لكيت
ام تماره يمنه
امي : هلا بيج يمه سناء ...تعاي سلمي على خالتج.
سلمت عليها : هلا خاله شلونج ؟ تماره شلونها؟
ابتسمت وكالت : هلا بيج داده حمدلله عيني كلنا بخير ...نسال عليج.
امي : والله ياخيه عدها امتحانات وملتهيه بيهم
ام تمارة : الله يوفقها داده.
ابتسمت وعفتهم وصعدت بدلت نزلت اكل لكمة لكيتها رايحه اكلت وكملت ورجعت صعدت اقره وخلصت فترة الامتحانات
بسرعه ماحسيت بيها مثل مايكولون تخلص وتصير سوالف ...اليوم اخر امتحان واني راجعه لكيت سياره عاليه سوده مضلله
واكفه كدام بابنا وشخص واكف عدها انتبهت عليه هذا نفسه غيهب ابن صديق ابويه...
تذكرت من شفته وذب كلمه ماهتميت اله وكملت مشي من وصلت يمه دنكت عيوني ومشيت بس استوقفني بكلاماته
: ها گطنهة !
اني سكتت ردت ارجع امشي بس بده يغني بصوت ناصي وكال
: وإذا طلعت شمس فوت إنت للبيت
لأن شمسين معناها احترقنا.
اني ماتحملت هذا شجاي يمضرط درت وجهي عليه ولكيته واكف ومجتف ايده ويباوعلي بنظرات خايسه
حجيت بعصبيه : هذا وياي الحجي مو ؟
هو هز راسه وعض شفته وكال : وياك ياحلو.
تعصبت وتنرفزت كلش حجيت بعصبيه بس بصوت ناصي الان واكفين قريب على بابنا
: شكـد ما تستحي ؟ شنو هذا الحجي الخايس. ماعندك اخلاق!
واني اتنفس بسرعه ومثل كل مره عيوني غوشت واني ردت اتجاوز اكثر وياه بس على اي ساعه يطلع واحد من اخواني لو ابوي.
هو بقه ساكت بس حواجبه انطبكن ومثل الما عاجبه الوضع جان قرب راسه وحجة
: هسه احنا شكلنا يابويه . وحجاها بطريقه استفزازيه
اني باوعت منا منا ماكو احد جنت لازمه بيدي بطل مي فتحته بسرعه وشمرته بوجهه .
وهو شهك واني خليت فتحت الباب وركضت للبيت بسرعه دخلت من المطبخ وابوي واخوي طلعو من باب الاستقبال
ومحد جان بالمطبخ همزين الان شكلي ابد مو طبيعي وعلى اي ساعه اوكع بسبب كلامه شلون ضوجني والله اذا حجة بعد اكول لاخواني
رحت غسلت وجهي بالسنك بسرعه ودخلت سلمت وصعدت فوك بدلت ونزلت مثل العاقله بس تفكير قلقني خاف هسه يكلهم
بتكم ذبت عليٌ مي وشردت ... بس اكلت اذا حجو اطلع مية عذر .
رحت ساعدتهم بالطبخ وكعدنا ناكل سالت على اخوي جابر بس علمود اعرف وين راحو جان تكول امي
: طلع وي ابوج وي غيهب عدهم شغل .
سالت : وشنو هذا الشغل؟
كالت مادري .
كملنا اكل ورحت لغرفتي اليوم عندي استراحه من كلشي كعدت على چربايه وصفنت اني شلون هيج سويت؟
اني صوتي ماينسمع نوب شمرت مي على ولد! بس هو يستاهل صراحه
بس اني حيل متغيره صاير عندي اللسان مو مثل قبل اتنهدت ولفيت راسي ونمت بدون تفكير باي شي لان تعبت من كلشي.

واستمرت ايام بدون تغير بس تسيرة ام تمارة علينا صارت شي من روتين وروحة اخواني لابنهم هم صار من روتين .
واليوم النتايج مالتي ومحتاره شسوي ومثل كل مرة راح محيسن يجيبهم وهل مرة جانت ام تمارة وتمارة وابنهم هم موجودات
واجه محيسن وهل مرة ماهبطني مثل نصف سنه كبل كال معدلج 98 .
من فرحة نسيت كلشي وطكيتهم بهلهولة يمكن سابع جار سمعها همزين ابويه ماموجود . محيسن ركعني على راسي
واجت تمارة باركتلي
: نشالله معدل عالي بسادس حياتي.
امه هم باركتلي امي جابت جكليت وطشته عليه وكالت تمارة
: بنات خل نحتفل...
نسوان اخوتي ماصدگن راحن دزن جهال على عصاير وحلويات وراحت يسوون كيك ههه عبالك خطبه.
وخلصن اكل وضمنه بثلاجة وخلينا تماره وامها يبقون لليل حتى نتسامر واخواني راح يتسامرون وي ابنهم بالحديقه.
وسوينا عشه واني گلبي يرفرف من الفرح وكل شوي اخذ هزة بالمطبخ وكملنا عشه وصلينا ورحنا بدلنا
بقيت واكفه كدام البوفيه شلبس ؟ ماعندي هواي ملابس الان مااطلع بقيت صافنه ...اخر شي انتبهت على فستان جبته بحنة
محيسن لونه وردي فاتح ويصير من فوك دلع يعني جتفي كله طالع وطويل وبيه حزام ذهبي ناعم وردان ماله مكبكب شويه .
لبسته وفتحت شعري وخليت شوي حمره من نسوان اخوتي وشوي مورد حتى يروح صفار وجهي ولبست الحجل ونزلنا كلنا
والكيك والعصير وحلويات وبنات جابن المسجل وشغلن على الموت اخذنا اخذنا ولا تردنا ... ويركصن.
ومن سمعو الاغاني اجو اخواني وام تماره تصفك وتمارة هم تضحك ...وامي عيونها دمعت.
اجو اخواني حاوطني واول مرة احس بيهم واحس بأهتمامهم وجابر كل شوي رافع الفستان على جتفي وجهال يركصون
حرفيا جان احلى يوم بحياتي واخواني كالو راح نروح الولد وحده بقه ...
باسني طراد من كصتي بسرعه وراح وجابر باسني بخدي وهو يكول
: شبيج ماصخة مدري فاهيه .ويضحك
واني هم ضحكت وراح ...محيسن اخذ ايدي باسها ومن سواها اني هم اخذت ايده بستها وباس راسي وراح
من راحو عيوني دمعت ونزلت دمعه فرح خفيفه على وجهي.
بقينا نركص وركصت ركص ماصاير وصارت ساعه ب 9 وكعدنا وسكتنا من ركص وطلعنا بالحديقه وخلينا الولد بالاستقبال
شوي اجو اخواني كالو الولد يكول خل نروح بنات كلها دخلت وجهال اطشرت اخواني بشارع وام تمارة وبتها راحو وكفو بالباب
وسلمت عليهم امي ودخلت...
رحت للمطبخ غسلت وكملت وشفتهم كلهم بالباب واخواني سدوه كلت طلعو هاهيه وصاحتني امي
: يمه سناء روحي طفي الماطور .
هزيت راسي ورحت وجان الماطور يم الحمام الخارجي سديت الماطور بس جنت اشم ريحة جكاير انتبهت واشوف جمرة
مال جكارة وهيكل شخص منتجي على حايط الفاصل رجعت ليوره وكل بصوت
: سلاما قولا من رب رحيم ...اسم الله اسم زهرة
ونظري اني يصير كلش ضعيف باليل مانتبهت جان شوي واسمع صوت ضحكة ويطلع شخص وصار ضوه على وجهه
وشفته غيهب والجكارة بيده وهو يضحك ...كلبي صاربرجلي وصوفرت كلت على اي ساعه ويجون اخواني ...
ونوب اني بعدني لابسه الفستان وحتى الشال مالابسه من غير كل الايام عيوني من وحدها غوركت ورجلي جمدت ماكدرت اتحرك
جان يقدم جسمه عليه شويه وكال
: مبروك كطنه.
نوب هو طويل كلش بحيث ظهره نگسم بالنص وهو مدنك راسه عليه اني باوعت بعيونه ودرت وجهي وجاي اروح
جان يوكف كدامي واروح يمنه هو يجي يمنه اروح يسره هو يجي حجيت بصوت مرتبك
: وخر شبيك .
هو بقه ساكت نوب كال بصوت بارد
: اني تشمرين عليه مي وتنهزمين؟
من كال هيج الدم وكف بعروكي لو تذبحوني ماكو قطرة دم باوعت عليه لكيته يباوعلي وجكارة بحلكة نوب اول مرة اوكف وي
رجال غريب وانحط وياه بهيج موقف ماعرف شسوي والي صدمني اكثر صوت اخوي جابر وهو يصيح
: غيهبببب ... وينكككك يلا جماعه منتظرين.
نوب صوته قريب عليه كلت هاهي اليوم اني بالنجف ...باوعت عليه ولاهامة اني استجمعت قوتي وخزرته وكلت بصوت ناصي
: ماتستحي واكف هيج وكفه ؟
هو بقه ساكت وصاح بعلو صوته جفلني
: اييي محيسنننن جايييي ثوانييي.
اني اصطكيت بمكاني واخذ نفس من جكارة ونفخه على وجهي واني اختنكت وبديت اكح على كيف هو كال بصوت تهديد
: اعلمج بعدين.
اني باوعتله وعيوني مدمعه من دخان هزيت ايدي وخزرته...هو راح ومن راح غميته باثنين ايدي ودخلت للاستقبال بسرعه
وكعدت على قنفه وجان اكو مي شربته بسرعه واخذت نفس ورشيت مي على وجهي ...حسيت نفسي راح ينغمى عليه
اجت نوره شافتني كاعده استغربت
: ها سنو شو كاعده هنا؟
كتلها : لج طلعت جاي اسد ماطور وكمزت عليه بزونه سوده تخوف هبطتني نوب تخرع
هي كامت تضحك وتهز بيدها
: اوي عيني خفتي من بزونه.
غميتها وسكتت وهي راحت وتضحك... رحت وراها صعدت غيرت فستان ولبست دشداشتي وشال خليته على راسي ونزلت
وشفت اخواني كاعدين ونسوان هم مجتمعين تناقشوا شوي وكل واحد راح لغرفته واني هم صعدت واول مرة انام هيج مرتاحة.
من عرفت ان جمرة تعبي وسهري حصل نتيجة .
كعدت ثاني يوم وابويه جان موجود لذالك كان هدوء البيت حتى جهال تخاف منه ...جان مثل كل مره يباوع عليه بقرف
واستهزاء عبالك مو بته ابد ...اتذكرت موقف من جنت صغيره جنت العب بشارع وجان محيسن بالباب واكف
وجان اكو ولد جيرانه يضحك عليه يكول
: هيه مشهوههه...هييي جنيهههه
ويضحك وجهال تضحك عليه وياه ...اني رحت كتلته وهو اجه فوكاي وتعاركنه واجه ابوي وشافني لو شصار بيه
شياطين راسه صعدت وعيونه حمر جرني بنص شارع مثل الحيوان من الفانيله وشمرني داخل البيت ويصرخ على امي
: فوك ما مشوههه تعلب وي الولدددد ... من هسههه وهيج ساقطهه من تكبر شسوي .
وتعارك ويه امي بسببي واني جان عمري بس ٨ سنين وكلشي مافهم...
كعدت من ذاكرتي على صوت نوره وهي تصيحني ورحت الها
: اكلج سناء اليوم امي تروح لبيت ام تمارة ليش ماتجين ويانا؟
باوعت الها وبدون تردد كلت
: لا عيني ماروح .
تذكرت هذا ابنهم المخبل نوب يكلي اني اعلمج هو بس مرة مدري مرتين شفته واخذ ميانه.
كالت بترجي : يلا حبابه تعاي غيري جو مو خلصتي امتحانات ؟
هزيت راسي : هيي شنو جاي اكلج ماروح.
كالت : شبيج مامليتي من البيت؟ تعاي طلعي شويه شوفي العالم.
غميته : يعني اشوف العالم اروح لبيت ام تمارة مو؟
كالت: اي قابل شبيها ؟ غيري جو ويانا
وكامت تلح وتنك فوك راسي اخر شي عصبت
: ايييي... كافي راح اجي كافي.
هي كامت تكمز جان العصر طلع ابويه ونسوان راحن للسوك وي رجولتهن واحنا هم طلعنا وماما تعجبت
: ها هاي شعجب راح تجين ويانا؟
كتلها : غير بتج موتتني ...يمه اكلت راسي اكل
كامت تضحك وسدينا الباب وطلعنا ...جنت لابسه جبة ونوره بشت ...تمشينا لبيتهم وجان يم بابهم سيارة نفس الي شفته ذيج المرة
دكينه باب وطلعت ام تمارة وسلمت علينا واجت تمارة وكعدنا وجانت نوره وتمارة مثل صديقات واني اطرش بالزفه
جان تكول تمارة : بنات تعالو وياي للغرفه.
نوره كامت عادي واني جرني جر كالت ام تمارة
: محد بالبيت بس غيهب وهسه نايم اخذو راحتكم بنياتي.
من ذكرت اسمه قشعريره اجتني من تذكرته بارحه يكلي اني الج واصلا اني لا اعرفه ولاشيفته والله مخبل وشايف نفسه ومسودن
نوب ماخذ راحته هذا كله احجيه بكلبي واحنا صاعدين لغرفه تمارة جان بيتهم كلش حلو وجبير ومرتب  جان بالطابق ثاني غرفتين
دخلنا بوحده من الغرف وجانت كلش مرتبه وبناتيه عود غرفتنا خرب حضي ...
بدت تسولف وي نور وتبتسم وياي الان اني بطبعي ماحب اختلط وي ناس .
وراحت جابت جبوسة هواي وشرابت وكيك مال بيت وحب
تمارة : بنات اليوم تبقون يمي لليل !
نورة : اي والله ملينا من البيت خوش فكرة نتسامر سويه
اني بسرعه حجيت : خاف امي وابويه مايقبلون ...
التفت على نوره : وانتي شبيج تحجين من كيفج
حجت تمارة بهدوء وابتسامه : لا تخافين سوسو اني اقنعهم وها على كيفج وي نور ترى ماكالت شي خطأ.
اني اتنهدت وسكتت وصدك راحت قنعت امي وامي راحت وكالت
يمه بنات بالليل ادز عليجن واحد من الوليدات.
وبقينا بغرفه تمارة قبل المغرب ردت اروح للحمام
: اكلج تمارة بس الحمام وين؟
كالت : بنهايه المرر على ايدج اليمنه.
طلعت من غرفه ورحت بسرعه للحمام وغسلت وعدلت الحجاب الان خنكني فتحته شوي ...باوعت لكيت حمره
اخذت وخليت شوي وطلعت ... فتحت الباب مال غرفه وجانت ظلمه باوعت وانتبهت هاي مو غرفتها شكـد عيب واني جاي اسد
الباب احس ايد سحبتني بسرعه بداخل الظلام.

يتبع........................