انا العذباء
الفصل 3 _____4
يلومُ العقلُ قلبي ليس يدري
بأنّ الحُبّ سِحرٌ يعتريهِ
فلا عقلي يحِنُّ لما اعتراني
ولا قلبي يتوبُ فأتّقيهِ
تعِبتُ ولم أعُد أقوى احتمالاً
صِراعاتٌ وتيهٌ بعد تيهِ
أنا الدمعُ المسافرُ لستُ أدري
متى تحنو الدروبُ فألتقيهِ
لنَبني فوق ذاكَ الغيمِ قصراً
ونحتضنُ الغرامَ ونستقيهِ
سأحفظُ حُبّهُ بين الحنايا
وأرقُبُ طيفهُ كي أحتويهِ
نداءُ عقولِنا يعلوهُ ريبٌ
ونبضُ قلوبِنا لا ريبَ فيهِ
لشاعرها
بقلمي اساور فهد
جوانه : صرت مثل المخبله
اقرا رساله وره رساله
المكتوب سجاجين وتگطع بگلبي وريت بنار
رسائلهم قبل لا نتزوج كلها حب وهيام صارلهم سنه حسب ما مكتوب بالتاريخ ما مخلين شي ومو ذاكرينه
گعداتهم سوالفهم نظراتهم
والرسائل الي وره ما تزوجنه كلها عتاب من عدها عبن تزوجني وهو جان مواعدها بالزواج
اخر رساله كاتبتله
(علوا ظاله كاتمه حبك بگلبي واعيش عمري احبك من طرف واحد اني لخاطرك ذليت نفسي وين اكو بنيه تروح تعترف لرجال انها تحبه وتريده اني الوحيده الي سويت اجان علمودك تالي تكسرني عگب ما بادلتني المحبه واعدتني بالزواج
وين تروح من ربك هيج تصدمني بعرسك
جان مفروض هاذ عرسنه اني وياك جان مفروض اني عروستك واني البس البدله وتزفني وين اروح بأحلامي الي بنيتها وياك ليش هدمت كلشي ليش )
جوانه : كلام جثير وعتاب يشگ الگلب
طلعت الرسائل كلهن شفت دفتر بنص الصندوگ
فتحته لگيته كاتبلها رساله ذبحتني من الوريد للوريد
مختصر كلامه
نشمي :كلشي صار غصب عني البنيه الي اخذتها لا اريدها ولا تريدني انجبرنه ثنينه هيه كلها فتره واطلگها وكلمن يروح بحال سبيله اني بعدني على وعدي اخذج بس انطيني مجال اساير ابويه هو الوحيد الي واگف بطريقي )
جوانه : عيوني غوشو من البجي نهاريت
الرساله كاتبها وره عشر تيام من زواجنه حسب التاريخ بس مو دازها للها
متربعه وادحگ عالصور والرسائل وانحب طگيت من البجي طگيت
سمعت حس نشمي بالبيت ركضت بساع واسرگ الباب وارجع الصور والرسائل وكلشي بمكانه حت المفتاح
گام نشمي يدگ بالباب رحت فتحته
واني مدنگه ورجعت زعم اعزل بملابسي بالكنتور
فات مدري شأخذ وطلع بساع
گمت اصبر بروحي
وقررت اطلب من يطلگني بكرامتي احسن ما اصبر شهر انوب مليت عايشه حالي حال المزهريه بهل حجره رجلي جسمه يمي وگلبه يم حبيبته شهل حياة هاي
مرت ايام واني افكر شسوي اذا طلبت الطلاگ
هسع خاف ديالا يلوحها حجي وخاف عمي صياد يزعل تعبت من التفكير
وكل ما الگه مجال تا احجي الساني ينربط ويضيع الحجي مني وبهاي الأيام زاد الجفه بينه گمت حت من نگعد ويه الوادم ما ادحگ بوجه ولا احجي ويا وهوه نفس الشي
