-
طالعه من الجامعه بيدها علبه مويه وشنطة واليد الثانيه تكلم فيها
نوره: اه ابشرك خلصت اخر فاينل بصيح من الفرحه
غيم : اخييراً عاد وش تقولين عني مخلصه قبلك ب اسبوع
نوره وهي تفتح باب سيارتها وتركب : كلنا نهون الا سحاب
التفتت غيم على سحاب الي كانت ضايعه وسط كتبها وتذاكر بكل جد : والله لو تشوفينها مسكينه ضايعه وسط كتبها
نوره: بس معليه كلها يومين وتتخرج وتدخل عالم الجامعيين
ابتسمت غيم : باقي لها الاحد والاثنين بس
نوره: عاد شوفي الاسبوع ذا بنسوي لها حفله بدون علمها
غيم بهمس : قد فكرت فيها ! بس وين ؟ بيتنا ؟
نوره: لا تستهبلين ؟ عندنا عشان جّدي والعايله كلها
هزت راسها غيم ونطقت نوره : اسمعي بطلع الحين للبيت اذا وصلت بكلمك تمام ؟
غيم : اوكيي انتبهي لنفسك حياتي
قفلت نوره ومدت يدها تشغل السياره وتاففت بخوف من حاولت انها تشغلها ولا اشتغلت ، نزلت توقف امام السياره وتفتح الكبوت حقها ، طلع هواء حار لفح بوجهها ، نوره : ايووووا ، وقتك يالشيخه !! رفعت يدها على رقبتها بتفكير وهمست : مالي الا انذل عند سلطان وسعود : اف ياربي
ركبت السياره وفتحت جوالها تدق على سعود اخوها بس مارد ، مره مرتين برضوا مارد واتصلت على سلطان..
"
جالس بمطعم مع نواف وعايض يتغدون جاه اتصال ، حط جوالها على اذنه ووصله صوت نوره : الاخ سلطان رجُل المهمات الصعبه ؟
سلطان: اسلمي وش عندك من مصيبه ؟
نوره: لا مو مصيبه بس خربت سيارتي وانا بالجامعه إتصلت على سعود ومايرد
سلطان: يعني ؟
نوره: يعني ؟ اكلم جدي صح ؟
سلطان: تكفين نوره شوفي اوبر
نوره: خرا عليك انقلع ، قفلت منه ودخلت تطبيق اوبر اخذت 5 دقايق وتنفست بغضب ورجعت تدق على سُلطان : هاه وش تبين بعد ؟ مارتاح انا ؟
نوره : شوف معك 6 دقايق ورب البيت لو ماتجي اكلم جدي ، قفلت بوجهه وتافف سُلطان ووقف
عايض: وين ؟
سلطان: بالله عطني مفتاح سيارتك وحده من البنات تعطلت سيارتها وبوصلها للبيت
عايض : بجي معك نواف بيروح عنده محاضره
سلطان: اقعد لين اجي
عايض: مريض انت ؟ بتخليني هنا لمتى ، بجي معك امش
مشى سلطان وعايض متجهين لنوره الي طال انتظارها وتعكر مودها من الحراره والشمس
-
وقف امام الجامعه ونزل سلطان يشوف سيارتها المتعطله ويناظر يدورها بعيونه ماكانت داخل السياره ، ألتفت من شافها طالعه من الجامعه وتكتفت تناظره بعصبيه ، مشى سلطان ووقف قدامها : تستاهلين ليه ماشيكتي عليها قبل تركبين ؟
نوره: ليش تاخرت ؟ وين سيارتك ؟
سلطان: جاي مع عايض
نوره: مين عايض ذا ؟ تستهبل سلطان ! والله مااركب
سلطان : براحتك اجل ، مع السلامه : راح بيركب ولحقته نوره ورفع راسه عايض من انتبه لهم متجهين ونزل عيونه لجواله
ركبت نوره بدون صوت وركب سُلطان: حرك
عايض: لبيتكم ؟
سلطان: اي
مشى عايض ومد يده سلطان يشغل اغاني ويدندن معها ونوره صدت للشباك وعاقده حواجبها بعصبية ، من صغرها ماتحب تركب مع احد غريب
"
كانت بالمطبخ تدخل المواعين في الغساله وسحاب تساعدها
ساره بهدوء: أبوك كلمني اليوم
وقفت سحاب تناظر امها دقايق ورجعت تّدخل المواعين ونطقت ب صوتها الهادئ: وش يبي ؟
ساره : الاجازه بتبدا ،يقول بيحجز لكم تروحون تسلمون على عمانكم .
سكتت سحاب بدون رد والتفتت عليها امها وناظرتها برجى ونطقت وهي ترخي ملامحها : تكفين سحاب وانا امك اقنعي اختك غيم انتي تدرين لو رفضتوا وش بيسوون ب اخوكم ؟ يكفي انهم حارميني شوفته ، لاتوجعوني ب اخوكم
سحاب ناظرت امها وضحكت بصدمه : بس هذا الي همك ؟ سالم وبس ! يمه انتي ماتخافين علينا انا وغيم ؟ نسيتي اخر مره لو ماتدخل جدي فيصل وش بيصير ؟ كانوا بيزوجونها اكبر مروج مخدرات بالديره يعني مدري وين الراحه الي انتي فيها وحنا بعيد عنك ! يمه تكفين احنا من نروح هناك ماتغفى عيوننا ولأ نأكل ولا حتى نبتسم
ساره : انا اكثر وحده اعرف ا
قاطعتها سحاب وتجمعت الدموع بعيونها : ماتعرفين شي للأسف ، كل همك ولدك الي من ٢٠ سنه مالتفت لك ولا فكر يسجل رقمك عنده اصلا ، ارمينا في التهلكه يمه برافو
طلعت سحاب مسرعه تتجاهل امها الي تناديها بصوت مهزوز وطلعت لغرفتها وسكرت الباب بقوه ، جلست على سريرها وضمت رجولها ، نزلت رأسها تبكي ماتبي تروح للديره لانها تعرف وش بتواجه هي واختها ، شي اكبر منهم ومايتحملونه ابداً
طلعت غيم من دوره المياه تجفف شعرها المبلل بالمنشفه وعقدت حاجبينها تشوف امها تدق بآب غرفه سحاب
غيم: يمه ؟ وش صاير
ساره ناظرت ب غيم وتجاهلتها تنزل لتحت ، مليت راسها ب استغراب ونزلت وراء امها : يمه ! يمه شفيك قاعده اكلمك
ساره : نعم ؟
غيم : وش في سحاب ؟ وانتي بعد وش فيك تغير وجهك
ساره جلست عالكنب وفتحت جوالها تمثل عدم الاهتمام ونطقت بجّديه : ابوكم كلمني ، حجز لكم طيران بعد ماتخلص سحاب اختبارها ، رفعت راسها لغيم وكملت : بتروحون زي الآلف تسلمون على عمانكم وابوكم وتجون ،لايقولون امهم منعتهم من اعمامهم بعد !
غيم جلست بقله حيله وجت بتنطق وقاطعتها امها بحّده : الي عندي وصلته لكم ! ، رفعت اصبها بتّوعد : لو وصل الكلام ل ابوي ولا منيره والله ماتشمون الرياض ثاني مره شم فاهمه ؟
قامت تاركتها ، ونزلت راسها غيم تبكي بصمت
"
نوره فتحت الباب ودخلت وهي تهاوش
سلطان: الله واكبر عليك تعالي اشوف ، سحبها سلطان ولفها حول نفسها ورفع اكمام يدها يتفقدها
سلطان: هاه شوفي مانقص منك شي
نوره: يلعن السخافه ياشيخ ، بس...
منيره: لا اله الا الله ! خير وش العلم جايين تتهاوشون ؟
سلطان: السلام عليكم اولى ، ثانياً شوفي بنتك هالمصروعه
نوره دفته بخفه : ماالمصروع الا انت ! يمه تخيلي جايني ياخذني من الجامعه مع خويه
منيره: واذا ؟ لوحدكم يعني انتي وخويه ؟
نوره : لا ، تافتت ونطقت : بس ماحبيت ليش ماجاني لوحده
سلطان تافف : قسم بالله بزر ، ترا والله مادرا عنك الرجال
نوره : ميته عليه انا ! بس ماحب ياخي
سحبها منيره: امشي قدامي بس غيري ملابسك واضح تدورين حّرش ، بعدين وين سيارتك؟
سلطان لف يناظر نوره واشر ب اصابعه لمنيره : يلا جاوبي ؟ جاوبي جاوبي اشوف
نوره بصوت خافت : خربانه
منيره وسعت عيونها : خربانه وتهاوشينه بعد ؟ احمدي ربك اخذك
أبتسم سلطان ورفع حاجبه بانتصار ومشت عنهم نوره طالعه لفوق
منيره: ماعليك منها ، تغديت ؟
سلطان: اي اي بس تراها ماتغدت عطيها شي قبل تنام
ابتسمت منيره وهزت راسها ،ومشى سلطان يدخل لغرفته
