بداية يوم جديد
الساعة ١٢م الظهر ، نزلت نوره لابسه عبايه كلوش لون بُني ، نزلت وشافتهم مجتمعين بالصاله يتغدون
نوره: مساء الخير
فيصل: هلا حبيبتي من البارح غاطه وينك فيه؟
ابتسمت نوره : موجوده بس اسمعوا لحد يطلع اليله
سعود: وانتي وين طالعه
نوره: اليوم حفله سحاب بسوي لها سبرايز هنا وبروح اجيب عمال التنسيق واجيب الكيكه واجي
منيره: ماعلمتينا نجيب هدايا !
نوره غمزت ل امها : هداياكم علي بجيب لها من كل محل هديه ب اسمكم
سلطان: مع من بتروحين ؟
نوره: سيارتي ب الصيانه بتجي اميره تاخذني ، يلا توصون على شي ؟
فيصل: الله يحفظك يابوي
طلعت نوره ومشت بهدوء تركب مع اميره "
اميرة باابتسامه : ايوه وين تبين ؟
نوره : امم بالاول وقفي ناخذ لنا شي بارد بعدها نجدول
اميرة: قدام
نوره: وبعدها الرياض بارك ، باخذ لها سلسال تبيه
هزت راسها اميرة "
وصلوا وكانو يتمشون بـ اركان المول ويتقضون من كل شي ، طلعوا ويديهم محمله نص المول ، اشترت نوره كل شي تطيح عينها عليه لسحاب "
- بيت ساره "
ساره: تغدوا وتجهزوا جدكم مكلمني يقول لازم تجون المغرب
غيم: كنا ناوين انا وسحاب اصلاً
ساره بهدوء: زين ، جهزتوا لسفرتكم ؟
ضحكت سحاب تناظر امها وشربت من كاس المويه الي قدامها
ناظرتها ساره بحده وتكلمت غيم تقطع نظرات امها : اي يمه خلصنا كل شي
هزت راسها ساره وهي تناظر سحاب وقامت من الاكل تطلع لغرفتها
غيم : سحاب خلاص عاد ! صايره تضايقين امي ترا
سحاب رفعت كتوفها : ماسويت شي
تنهدت غيم وفتحت جوالها تقرا رسالة نوره : اليوم حفله سحاب كشخيها زين بس لاتوضحين لها شي
ابتسمت غيم وناظرتها سحاب : شفيك ؟
غيم: نوره تقول تعالوا واكشخوا اميره عندها
سحاب: ياعمري نوره للحين مادرت ؟
غيم : انتي سدي حلقك وماراح تدري
سحاب قلبت عيونها وفتحت جوالها تدردش فيه : الموضوع بينقلب ضدك
"
في بيت مساعد
مساعد رفع صوته بعصبية: اقطع واخس ! انا رجال وعطيت الرجال كلمه ومانيب متراجعً فيها لو تموت
عبدالله: يابوي يرحم والديك ماحنا متفقين نخطب حفيده فيصل ؟
مساعد: وش نبدي ياعبدالله ؟ بنت فيصل على بنت اخوي !
عبدالله وهو شوي وينجن رفع صوته: شوف ناصر ذا قدامك زوجه انا ماانيب ماخذ بنت اخوك
مساعد بحدّه: بتاخذها غصبً عنك
ناصر مسك ذراع عبدالله : يبه الله يهديك الامور مهيب بالغصب ! اخطبها لي انا عادي موافق عليها
شد مساعد على يده بعصبيه وماحس بنفسه وهو يعطي ناصر كف،
انصدموا كلهم وشهقوا بصوت واحد
رفع سبابته مساعد بتهديد : اي واحد يتجرا انه يكسر كلمتي بكسر راسه ، ناظر لعبدالله وكمل : يا غيداء ياتحرم علي امك وغير بنت اخوي منت بماخذ
نزل عيونه عبدالله بالارض بصدمه ومشى يطلع عنهم وعيونه تدمع بلا شعور ، ولحقه ناصر وهو معصب
ام عبدالله وهي تبكي : ياويلي على ولدي اخ ياويلييي
ناظرهم ابو مساعد وطلع يدخل غرفته ويسكر الباب بقوه،
"
-بيت نايف
كانت غزل جالسه مقابل عايض الي منسدح على رجول امه وهي تلعب بشعره وريم الصغيره جالسه جنبه تتابع جواله ...
عايض: فارس مع ابوي ؟
غزل بضحكه: ايه يقول ابوي لازم يخليه يسترجل
ام عايض : والله انه صغير ومايعرف شي الله يسامح ابوك
سكت عايض لما جت بباله البنت الي شافها بغرفته البارح ، ماتخطاها كل ماغمض عينه يتذكرها امامه ويتذكر كيف طلعت بوجهه مرتين ، يناظر الارض مهوجس ، يفكر فيها ومن هي ،
غزل : يهوه اكلمك انا خير ؟
عايض ناظرها وهو مضيق عيونه: بسألك غزل الي البارح لابسه فستان اسود منهي ؟
ضحكت غزل : اغلبهم البارح لابسين اسود وش عندك ؟
ام عايض نزلت راسها تناظره : خير ياعايض وش طرا عليك ؟
عايض عدل جلسه بحماس: والله يايمه شفت وحده البارح ، حط يده على قلبه وضحك : تكفين يمه منهي ؟
ضحكت غزل بصدمه : وين شفتها ياحيوان !
عايض : بالغرفه كانت مضيعه شكلها
ام عايض عقدت حواجبها تشوف غزل تتذكر ، شهقت غزل وناظرت امها
: نوره بنت منيره ؟
ام عايض التفت لعايض : هي ؟
عايض: وش دراني يمه ماعرفها
ام عايض : ويوم انك تسال عنها وش تبي ؟
غزل وهي تغمز لعايض : عيوض نخطبها لك ؟
أبتسم عايض: هي اخت سعود ؟
ام عايض: أي بالله اخته واكبر منه بسنه
هز راسه عايض وقام : مدري بشوف ابوي ان كانه وافق بخليكم تقيسون نبضها
ام عايض:وين بتروح
عايض : بروح أريح من صبح صاحي
