حازم & فيروز

قرة عيني

قرة عيني

من مجموعة " اسكربيتات حازم & فيروز "

                                                   بقلم زهراء صابر  
                               

_ ابوس إيدك ياحبيبتي خليكي هادية ومطفشيش العريس دة كمان .، أبوكي جاب أخره منك
قالت هي ببراءة = والله ياماما ما بطفشهم أنا بقعد معاهم وبحكيلهم عن نفسي  بس همن معرفش ليه بيغيروا رأيهم
لطمت والدتها = عن نفسك!!
انتفضت فيروز بخوف من مكانها = أكلمهم عنك طيب ولا إيه
والدتها وهي تقترب منها ببطء = بتقوليلهم إيه ؟!
فيروز وهي تبتلع ريقها بخوف = بقولهم سني .. ومبادئي اللي انتي عارفاها إنه يكون مش بيدخن وبيصلي وكدة يعني
قالت والدتها = كملي بتقوليهم إيه عن نفسك
وقفت بعيدا عنها تقول بخوف من نظراتها  = ياماما انت مخوفاني ليه .. عاملة زي الظباط .. أنا مقبوض عليا طيب
_ فيروز  ! اتكلمي بتقوليهم ايه
قالت هي بانتفاض = بقولهم بسمع كرتون وبحب الكتب وكمان .. لسة بتعلم الطبخ وبحب الشيكولاتة  والمصاصة
_ يعني بينتي قدامهم انك عيلة ..
  اومال اصدمهم وبعدها اطلقلك ياولية =فيروز بنزق
صرخت والدتها بنفاذ صبر = آه ياني هتموتيني.. عملت إي في حياتي علشان ربنا يبتليني بيكي .. آه ياني
اقتربت منها فيروز بتأثر = معلش ياسعاد إرادة ربنا
مسكتها والدتها من شعرها على حين غفلة انتفضت لها فيروز فقالت والدتها بتهديد  = قسما بالله لو ما عقلتي وبطلتي الحاجات الهبلة بتاعتك لكون معلماكي الأدب من اول وجديد
فيروز ووالدتها لا تزال تمسكها من شعرها = وحدي الله ياسعاد .، كل اللي تؤمري بيه مجاب
قالت والدتها بتحذير = مفيش كرتون  فاهمة و هتتعلمي الطبخ وهتنضفي البيت وحدك
قالت فيروز باحتجاج = لا كله الا الكرتون .. أنا هتعلم الطبخ وتوضيب البيت وكل حاجة والله بس الكرتون لا ياماما
قالت والدتها بسخرية = لما نشوف  .. يلا اجهزي العريس على وصول
فيروز بنزق_ طيب
تركتها والدتها لتجهز وخرجت.
وقفت فيروز أمام المرآة بنزق = شكله النهاردة مفيش غامبول .. علشان عريس الغفلة.. ياربي أنا مالي ومال الجواز .. اتجوز واحد يشخط فيا كل شوية ... واكيد بيحب الكورة يعععع .. ونتخانق طبعا كل شوية على التلفزيون.. واعمله أكل وشرب ... والله أنا مش بتاعت جواز هظلمه معايا.. بس يلا سنة الحياة وهيكون هو نصيبه كدة بقى .. او هيكون ربنا مبتليه بيا ... ياحظك ياقرة عيني
قالت وهي تنهي لف الحجاب = بس وربنا قمر دة يابخته والله..
تنهدت بملل بعد أن انتهت .
بالخارج كانت تجلس والدتها ووالدها بانتظار العريس ووالدته، سمعا صوت جرس المنزل فانتفضت والدتها ووقف والدها= اهم جوا
والدتها على عجل = طب يلا افتحلهم
فتح الباب والدها يرحب بهم = أهلا أهلا نورتونا والله
والدة العريس = أهلا استاذ جلال اخبارك حضرتك ايه
اقتربت سعاد منهم مرحبة بزميلتها بالعمل = ناهد حبيبتي نورتيني
ناهد بابتسامة = بنورك ياحبيبتي
_ اتفضلوا اتفضلوا ..
نظر جلال للعريس الذي ينكس رأسه بخجل فقال له جلال = اهلا ياحبببي عامل ايه
العريس بصوت منخفض = الحمد لله يا انكل
لم يعجبه ولم يرتاح له فقال لزوجته بعد أن دلف العريس ووالدته الى غرفة الصالون = ايه دة ياسعاد.. العريس دة طري كدة ليه
سعاد بنزق = طري اي بس ياجلال دة بس تلاقيه مكسوف ولا متوتر عادي يعني
ردد جلال بتعجب = مكسوف!
ذهبت سعاد لتنادي ابنتها وعادت وجلست معهم، كان جلال يتابع العريس بصمت وعدم ارتياح، كان العريس طوال الوقت رأسه بالأرض لا يتحدث أبدًا إلا إذا أمرته والدته بذلك.
دلفت فيروز بصنية التقديم بخجل وقدمتها لهم فنظر لها العريس بخجل تعجبته فيروز وجلست بجوار والدها تتعجب معه، قال العريس فجأة وهو ينظر للتلفاز = هو التلفزيون دة شغال يا اونكل
جلال وهو يهز رأسه له بتعجب =أيوة يا ابني
قال العريس بلهفة = طب افتحهولي يا اونكل
نهرته والدته = بودي وبعدين
جلال بصدمة مرددا لنفسه = بودي !
وضعت فيروز يدها على فمها تكتم ضحكتها وهي ترى صدمة والدها الجلية وتعجب والدتها.
  يا ماما غامبول اشتغل _
رددت سعاد تلك المرة هي بصدمة وهي تضع يدها على خدها  = غامبول!
فيروز بحماس = انت بتسمع غامبول
بودي = أيوة بحبه اوي .. وبحب الكرتون خالص
فيروز بلهفة وهي تقف =وأنا كمان اوي .، استني هشغله نسمع سوا
كان جلال وزوجته يفتحان فمهما بصدمة وهما يتابعان مايحدث ،فتحت فيروز التلفاز وجلست تسمع وبودي يسمع معها ويضحك بكل طفولية لا تليق برجل
قالت ناهد والدة بودي بفرحة  = ياروحي عليهم ياسعاد لايقين على بعض خالص. بصي عليهم
نظرت لها سعاد وهي لا تزال تشعر بالصدمة والدهشة، وجلال ينظر لابنته وبودي بصدمة .
بعد وقت انتهت المقابلة وذهب بودي ووالدته واثناء ذهابه قال لفيروز = يلا سلام المرة الجاية نبقى نسمع سبونج بوب
فيروز بموافقة = ماشي
شعرت سعاد وكأنها ستأتي لها سكتة قلبية، وبعد ذهابهم قال جلال بجدية وحدة  = أنا يستحيل اجوز بنتي لدة العريس دة مرفوض
سعاد وهي تجلس لشعورها بالدوار = توافق على ايه بس.. أنا مستحملة بنتي بالعافية وهي كدة
فيروز باصطناع = ليه بس ياماما... دة عسل خالص وهنسمع كرتون سوا
وقفت والدتها تهم بضربها = غوري من وشي .. غوري
ركضت فيروز لغرفتها وهي تضحك، وما إن دخلت غرفتها حتى وقعت على الفراش تضحك بشدة .