فصليه ذيب

البارت الثاني

مرحبا
اني حرير عمري 20 سنه صف سادس علمي احب ادرس كلش واحب اقرا حيل يعني وكت العطله اقرا قصص ورويات ومن تجي المدرسه لتفت ع دراستي اني من العشره الاوله ع مدرستي الحمدلله والشكر موصفاتي كلش حلوه بيضه ع گد مابيضه وناعمه ابويه الله يرحمه سماني حرير ابويه متوفي صار له 16 سنه كلش اتاثر من مات لان جنت كلش احبه
والحمدالله امي واخويه سيف عوضوني عن هذا الفقدان اعرفكم ع اهلي
امي اسمها سوزان عمرها 40 سنه
سيف اخويه عمره 26 سنه عنده معرض سيارات
واخر العنقود ملاك عمرها 19سنه طالبه وياي خامس اعدادي
حرير: صباح الخير
لكل.. صباح النور
سيف: هلا حرحر صباح الورد
حرير: صباحك عافيه سيوفي
سيف: وين ملاك اكيد نايمه
حرير: لعد شوكت شفت ملاك تكعد الصبح
سيف: دروحي كعديها خلي تجي تتريك وتبدل حتى بطريقي اوديجن المدرسه
حرير: تمام.. ملاك ملاككك اكعدي ولج كافي نوم راح تفوتنه المدرسه
ملاك: حرير شكو من الصبح تره بعد وكت
حرير: شوفي ساعه
ملاك: تره ساعه 7 الصبح حتى الحارس ماكاعد هسه
حرير: مو حتى تتريكن وتبدلين نص ساعه
ملاك: اوووف شوكت تخلص المدرسه وانام اسبوع كامل وارتاح من صوتج حرير
حرير: كومي احسلج
ملاك: اووف كعدت كافي تعيطين
سيف: كعدي ولج كافي تدللين
ملاك: اني كاعده بس هاي حرير تبالغ علمود تسمعك
حرير: اني ابالغ مو
ملاك: يي نعم يس تبالغين
سيف: يلا كافي مشاكل وتعالن اكلن
.. صار اجينا
سيف: يمه دير بالج ع البنات انه اليوم اروح بغداد واحتمال ابقه هناك باجر الصبح اجي
سوزان: انشاء الله يمه تروح وترجع بسلامه
حرير وملاك: تروح وترجع بسلامه خويه
سيف: الله يسلامكم يلا صارت ساعه 8 امشي واديجن المدرسه
ملاك: يلا حرير انتي دائماً متاخره
حرير وسيف: 🤨
ملاك: 😁😁
حرير: وصلنا سيف المدرسه ودخلنا والجو حار متت رجعنا البيت وحضنت السبلت وبقيت كدامه ساعه كامله وسألت امي ع سيف كالت راح كعدنه تغدينه ورحت كملت واجباتي وبقيت اباوع بالموبايل وصارت تقريباً ساعه 8 بليل رحت نزلت اشوف امي مو ع بعضها يمه بيج شي
سوازن: لا يمه بس شويه دايخه
حرير: اخاف ضغط صاعد عندج راح اجيب الجهاز واقيسه لج
سوازن: يلا يمه راسي يريد ينفجر
حرير: صار رحت اركض ع جهاز الضغط وصحت ع ملاك تروح تبقه يم امي لحد مااجي ملاك روحي يم امي شويه تعبانه
ملاك: شبيه اسم الله عليج يمه
حرير: روحي هسه شوفيها
ملاك: ولج حرير تعالي امي واكعه لحكي
حرير: نزلت اركض من المخبله يمه كعدي شبيج يمه هى هى كعدي يمه 😭😭 ملاك انتصلي ع سيف
ملاك: 📞📞📞
.. الو هلا حبيبتي ملاك
.. هى هى هى سيف
.. ولج شبيج احجي امي بيها شي حرير احجي صاير
.. امي مادري شبيها
.. انطيني حرير بسرعه
.. تمام حرير هاج سيف يحجي وياج
.. الو اسمع حرير لبسي عباتج واخذي امج المستشفى بسرعه واخذي وياج ملاك لا تعوفيها وحدها وانتي خيتي ادري بيج قويه
.. تمام سيف راح اخذها
.. عفيه بنيتي
.. مع سلامه
حرير: لبست عباتي ولبست امي عبايه وملاك بقت يم امي وانه رحت بشارع ادور ع سياره شوي ولكيت واحد
.. خويه فدوه امي متخربطه واريد اخذها المستشفى واحنه بس بنات
.. صار خويه وين الولده
.. جوه راح اطلعها اخذت امي انه وملاك ركبتها بسياره ورحنا المستشفى وصلنا وخطيه الولد ماقبل ياخذ فلوس منه دخلت المستشفى وجابو سديه وراحو جوه اخذوها

.. دكتور رمح دكتور
.. ها شذى
.. اجتنه حاله صعبه مره صاعده عدها الضغط وصاله جلطه
.. يلا اجيت يلا فراس .. حاضر دكتور
حرير: دخل دكتور ونص ساعه طلع ورحت اركض له دكتور فدوه طمني امي شون صارت
رمح: لا تخافين الحجيه بخير بس ضغطها حيل صاعد وهسه الحمدلله احسن
حرير: الحمدلله والشكر دكتور اذا صارت تمام نكدر نطلعها
رمح: حوالي 3ساعات اذا صارت تمام تكدرين طلعينها
حرير: شكراً دكتور
رمح: ولو واجبي
فراس: اكلك رمح شفت ضيم
رمح: يا ضيم ولك
فراس : دباع هاي البنات لي امهن الحجيه لي جبوها
رمح: شفت بس وحده بس ضيم حتى اخجلت اباوع
فراس: شوف ثانيه بربك شوف
رمح: لتفت ياريت مالتفت ع جمال لي شايلته حوريه شارده من الجنه اكلك فراس انه اول مره اشوف وحده من تبجي يصير خشمها وجها احمر
فراس: اي وعلي شوف خشمها وشكلها لان تبجي
رمح: جعل محد غيرج يبجي ولك فراس هاي لو اخذها اخليها يوميه تبجي علمود اشوف هيج شكل
فراس: شوف بربك لي بصفها تلمع مو بنيه انظف من قطن المستشفى
رمح: هههههههه  انته دباع يربي استغفر الله تخلق بهل حلوين واحنه ابتلينه
فراس: جا شذى من تبجي صير بنفسجيه
رمح: هههههههه ولا تكعد ادبسزز

ممرضه.. لو سمحتي اختي تعالي سجلي عدنه اسمج واسم المريضه
حرير: تمام حبيبتي جايه
ممرضه.. شنو اسمج حبيبتي
حرير:  حرير فائق رشيد علي
رمح: الاسم مو غريب عليه هذا اسم اهل سيف لو سمحتي اختي ممكن سؤال
حرير: تفضل دكتور
رمح: انتي مو اخت سيف فائق رشيد علي
حرير: يي صح انه اخته
رمح: كل الهلا علي صديق الطفوله بس هو اختار المعارض وانه اختاريت الطب
حرير: يي صح هو يحب سيارات
رمح: شعجب جايات وحدجن وين سيف
حرير: اليوم راح بغداد علمود وجبه سيارات
رمح: يي اكول محتاجه شي خويه اوصلكم
حرير: لا سلامتك احنه نروح
رمح: براحتج خويه اي شي تحتاجينه انه موجود
حرير: ماتقصر خويه
ملاك: ليش دكتور يحجي وياج
حرير: طلع صديق سيف من الطفوله وعرفني من الاسم
ملاك: هو مو دكتور ضيم شوفي جمال والضيم
حرير: استحي ولج هيوو عيب
ملاك: شنو حجيت غير صدك هو صاك
حرير: اللهم صبرج ياروح امشي نروح نشوف امي طلعنا من المستشفى والحمدالله صارت احسن اكلت ونامت وبقيت كاعده يم راسها
سيف.. 📞📞
.. هلا سيف
.. هلا حرير خويه شون امي شون صارت رجعتي من المستشفى شنو سويتي يابعد اخوج
.. اي خويه امي بخير ورحنه وجعنا واكلت ونايمه وهسه الحمدلله
.. يابعد اخوج وگلبه الحمدلله والشكر
.. الحمدلله
.. خويه محد حجه وياجن وسمعج كلمه
.. لا خويه محد بس صادفت دكتور بالمستشفى اسمه دكتور رمح وبس سمع بااسمي يم الممرضه عرفك وكال سيف صديق الطفوله
.. رمح ابن شيخ فواز اي هذا صاحبي ونعم صاحب والله ولد معدل
.. يي والله وكف ويانه لحد ما طلعنه من المستشفى
... الله يوفقه انه شويه وانتصل عليه واتشكره
.. تمام خويه
.. يابعد اخوج نامي ورتاحي باجر الصبح انه يمكم
.. انشاء الله توصل بسلامه
.. الله يسلمج مع سلامه
.. الله وياك خويه
حرير: سديت الجهاز ونمت من تعب واجت ملاك هم نامت يمي الصبح ساعه 6 اندك الباب طلعت اركض ادري بيه سيف اجه وع كد ماخايفه فتحت الباب واحضنته وبقيت ابجي لان البارحه حيل خفت ع امي
سيف: لا تبجين يابعد اخوج هاي انه اجيت ماراح يصير شي
حرير: انشاء الله
سيف: وين امي وملاك
حرير: نايمات
سيف: خوش خويه سويلي ريوك تعاي ناكل انه وياج واحجيلي شنو صار