علاوي خاف نموت ومامودع اهلي
دكول يا الله هسه ربك يفرجها علينا بس كول يا الله
.
اني علي عمري بوكتها ٢١ سنة
راح احاول الخص قصتي وما اطولها عليكم بس حته تعرفون الي صار ومريت بي.
اسكن بالكوت وعائلتنا دخل محدود ع كد العيشة وملزكيها وياها وياها اني الوحيد ل اهلي عدا خواتي.
قدمت للجيش وطلعت اسمائنا و طلع تدريبنا بعد فترة بقاعدة سبايكر.
والدي بيومها اشترالي تلفون نوكيا هذا العادي الاسود لان مانعين التلفونات بالقاعدة لميت جنطتي وشحنت التلفون ومابي بس رقم والدي.
كعدت الصبح صليت وتوكلت..
بعد ما تجمعنا ابغداد وطلعنا بسيارات للقاعدة وصلنا الحمد لله كلنا شباب تقريبا كصة وحدة.
القاعدة عملاقة حجمها مخيف ومليانا ثكنات عبارة عن كرفانات كبار كل وجبة وزعونا بكرفان واكو جان بيها قبلنا متدربين. شكد ما اكتبلكم ع حجمها ماتتخيلو. بيها بوابة وحدة عملاقة. اقرب شي عالقاعدة قرية و اكو قرى بعيدة بعد والباقي ارض جول فارغة ويمها ساكية مي جبيرة وبيها كصب ممدودة ع طولها تقريبا.
طبيت الكرفان.
السلام عليكم...
وعليكم السلام.
شفتلي مكان فارغ رحت حطيت جنطتي بي واجه كعد بصفي اساسا موجود قبلي . تعرفت علي اسمه اسعد من اهل النجف. كل الشباب طيبة وكلهم جايين علمود الراتب.
اجانا ولد المغرب ماعرفت رتبته بس عمره بال ٤٠ تقريبا كال الريوك ساعة ٥ ونص لل٦
الكل يكون جاهز بالتدريب.
... الكل عدنا بدلات من بداية التقديم مجهزيها.
سولفت وية اسعد شوية وطلع اخوه امجد ويانا بس خلو بغير كرفان اخو هم متطوع جديد مثلي.
اسعد شنو الوضع باجر كال لتخاف ابو حسين انت بس لا تسلم جنسيتك بالمشجب من يسلموك سلاح وعوفها ورايا اني اوجهك. شلون يعني ما اسلمها
كال باجر بالتدريب راح يسلموك سلاح من تستلمه تسلم جنسيتك ف انت حاول تضيع الموضوع بالهوسة مال استلام واذا سالك كله سلمتها الك خاف كلشي يصير لان بعد ما ينطوها.
وتظل يومية تستلم وتسلم السلاح بعد التدريب عالسجل ف انت غلس.
....
علاوي اكعد يلا كوم بدل صارت ب ٥
... كعدت كوة شايل راسي صار فترة مامتعود ع هالكعدة كمنا صلينا عالسريع بدلنا وطلعنا تريكنا كلمن بيدة صينية (قصعة) تخلي بيها بيضة سلك وصمونة وشوربة تصب بيدك مخلين جدرية جبيرة
كتل صايرة العالم بالريوك والكل ياكل ماكو سوالف وحجي اجه امجد اخو اسعد كعد بصفنا سلمت علي بهدوء وعرفنا اسعد وهم كاله سوي مثل ما كتلك بالاستلام مو تنسى. كملنا ريوك عالسريع والي يكمل يكوم يخلي القصعة بمكانها اني ذابها ورة اسعد هوه اني ويا نفس العمر تقريبا بس اقدم مني وما سئلته شكد صارلك اصلا.
طلعنا كال ذاك المشجب روحو استلمو السلاح.
طبيت اني وامجد خلينا فرق بيناتنا بالعشر اشخاص و والله صدك مثل ما كال سويت بقيتها بجيبي وصلت الميز هوسة و واحد بس يستلم الجناسي ويخليهن بالجرارة يسجل اسمك بالسجل ورقم السلاح وينطي الك بدون مخزن.
... اسمك وجنسيتك
سيدي انطيتك الجنسية
.... شسمك بسرعة
علي.....
احمد سلاح ورقمه بسرعة
سيدي A451
استلمت السلاح من احمد مكتوب الرقم علي بالابيض
كلت الحمد لله عدت.
ورة شوية اجه امجد كتله ها بشر
كال عدت بجيبي
كتله غلس يلا
سوونا وجبات دربونا شلون نفصخ السلاح شلون اذا تعصه بي طلقة شلون نتحرك يوم عن يوم وزادت علاقتي بالولد وتعرفت عالبقية ماكدرت اتصل ب اهلي بس ادز رسالة للوالد بين يوم ويوم من افوت للتواليت و مو بس اني جايب تلفون تقريبا الاغلبية ومسوين مثلي استلمنا اول راتب ٨٠٠ الف.
باقي كم يوم وننزل
.........
اسعد : وجهه اصفر..... علاوي بيني وبينك ومتكول لخيالك.
اليوم الفجر نشرد منا اني وياك وجعفر وامجد.
وين نشرد يمعود وجعفر منو وليش شصاير
معليك سمعت شي وان شاء الله ميكون صح بس اسمعني وخليها ورايا وجعفر صاحبي يجي ويانا
اسعد بس فهمني شسمعت لخاطر الله. علاوي الوضع يخوف و واحد ويانا اهلة هنا قريبين خوش ولد وصاحبي من اول يوم ويانا كالي اخي حاول تطلع اليوم من القاعدة بكل وسيلة الفجر وما احجي زايد انت افتهم.
علاوي : اسعد شبيك تخبلت بالكوة حصلناها الشغلة هاي وتريد ع حجي ولد تخرب كلشي علية.
اسعد : باوع غبي لا تصير هاي حياتك تريد تجي خير ع خير ماتريد بكيفك ظل ماجابرك ع شي بس كلمة ما تحجي لاحد ان صار شي او ماصار.
وسد الموضوع.
طلع اسعد بقيت وحدي اتكلب بالفراش شسوي هسه اخاف اتصل بوالدي هوه مجلوط قبل النوب ينجلط من الهبطة لو يروح بيها.. شسوي ربي شسوي خلاني بنص نار هسه
رجع اسعد ورة ساعة.
ها اسعد..
رحت اكدت الخبر لاخوية وجعفر ع نفس الشي والفجر طالعين وانت بكيفك.
طفو الاضوية ونامت الشباب بقيت كاعد اتكلب بمكاني لا اكدر انام ولا شي
صارت ساعة ٣ وشوية تقريبا الفجر اجه ولد ع اسعد كعده بكل هدوء اندار علية اسعد.
كوم علاوي لا تظل تلعب بخر... كوم يلا
كلت مابيها بعد خلي اكوم وامري ل الله الولد ماطلع منه شي موزين. ومتردد بنفس الوكت.
فلوسي بجيب التراك و جنسيتي بالثاني والتلفون بجواريبي وبدون جنطنا ولا شي
طلعنا انس واسعد وجعفر.
من الكرفان.
اسعد : جعفوري امجد وين؟؟؟ ما ادري غير كال يجي ويانا...! اي خاف اخذته النومه؟؟
والله ما ادري ياخوية.
لا نكدر نعبر للكرفان مال جعفر ولا شي بقينا متبسمرين بالكاع بصف كرفانا لان اكو ابراج وبيها اضائة يشوفونا اذا عبرنا.
جعفر : روحو كدامي للساكية مال مية عبرو من السيم وروحو اني راح افتر من بعيد واروح ل امجد لتخاف بس طلعو وفتحو السيم النا زين حته بسرعة نعبر.
اسعد : جعفر اعتمد عليك.. روح خوية اني حافظها شبر شبر روحو كدامي وانتظرونا.
اسعد: امشي علاوي فلوسك هويتك؟؟جبتهن؟ اي يمي
يلا نتوكل.
رحنا اني ويا بصف الكرفان ومسافة مشينا وصلنا السيم رفعنا من جوة وعبرنا للساكية مال مية.
صايرة مثل التلة الصغيرة مال حفر يعني و وراها الساكية والكص بقينا ننتظر ننتظر.
صارت بال٤ ونص ماكو شي
اسعد بده يتحرمص ع اخو
صارت ب ٥ الا ربع بدت الدنيا ستوها تكشف اجه جعفر من بعيد عبر من غير مكان مسافة يعني عنا وهم ختل بالساكية
.
اسعد :ماكو امجد!!! وين صار.
خاف جاي ورا انتظر شوية
علاوي ماكو اخوية وين صار هالكوا..
بس اصبر جاي ورة جعفر اكيد.
صارت ب ٥ وماكو شي.
مانسمع الا صوت تريلات ورمي..
تريلات حمل فاتن للقاعدة والرمي اشتغل وحدة ورة الثانية. وكل تريلة بيها خمسة سته مسلحين عدا السايق وال ويا
فاتن للقاعدة ودك رمي
اسعد يريد يركض للقاعدة لاخوة واني مجلب بي اني اقوة منه ولازمه بالف يا علي ولك اكعد لا تفضحنا اكعد لخاطر الله
.
لك علاوية اخوية راح يروح علاوي اخوية راح يكتلو
