ها اسعد شنو الوضع؟؟
والله ما ادري ياخوية وين متوصل خلي توصل
السيد : عمي اني ابو حوراء وانتو امانة بعد يمي هذا الهيكل الي بيتي ابني بي كاملة الصحيات فوتو جوة ولاتطلعون منه ولا تطلعون صوت مابية حيل المشاكل واقل غلط اني وعائلتي نروح بيها..
.
صار يابه تدلل فتنا جوة واحد يباوع ع الثاني مامامنين للوضعية. شوفنا البيت وكال كعدو هنا ماعندي غير هالمكان بس يهدا الوضع اوصلكم لبغداد بنفسي..
ربع ساعة تقريبا جان نسمع سيارة طبكت يمنا. ختلنا اني واسعد باوعنا من فوك طلع نفسه السايق
.. الي وصلنا.
طلعله ابو حوراء كاله ها عمي كول شنسيت؟
..
عمي الولد امانتي ورجعت اتاكد خاف عليهم شي. ؟؟
صدك تحجي روح توكل بطريقك امانتك هيه امانتي.. الدنيا بعدها بخير والله مادام بيها واحد مثلك بعدها بخير...
عمي اني راح اروح اتوكل واخر مرة احلفك.
وداعة بنيتي امن واطمئن روح توكل
.. خير ان شاءالله.. في امان الله... الله وياك يابه
.
علاوي: اسعد الله دزلنا السايق هذا والله شكد غلط علينا وفشر علينا بس شريف من راسه لرجلي..
علاوي ياشريف مو نا... خواتنا بالفشار ومانكدر نحجي هيه امانة وتحملها غصبا ولخاطر الفلوس وين لاكيها كروة بمليون... واني وياك جان سوينا مثلة..
والله ياخوية ما ادري شكلك بس بالنسبة للسيد خاف نام و يدك بينا الناقصة بهالليل.
اسعد: اش غلس اجه.
.. ها عمي هاكم هاي فرشة عندي بالسيارة كعدو عليها نامو اليوم شلون مجان بين ما اجيبلكم اكل الفجر وفراشات تنامون عليها.
وهذا جلكان مي ولو حار بس خاف واحد يروح تواليت شي لان ماكو مي.
.
الف رحمة ع والديك سيد وماقصرت.
لاع بختك وليدي. اني راح اروح ماريد ابقة واكف هواي هنا خاف واحد يجي ويشوفكم لو يسمعكم بس اعيد واكرر لا تطلعون منا لاي سبب كان.
.
صار سيد تامر امر.
.
راح السيد.
لك اسعد بطني ملختني من الجوع.
علاوي رحمة لوالديك انجب واسكت اني بالي كله يم امجد شصار ويا وجعفر خطية لا حس ولا خبر. والله العالم بيا حال هسه همه.
.
من كد ما جوعانين وعطشانين شربنا المي الحار الي بالجلكان.
علاوي نام انت واني ابقة كاعد ساعة واكعدك ونتناوب خاف كلشي يصير
وانطيني رقمك خاف يجي السيد وتريد تحجي وياي دزلي رسالة اذا ماكدرت تحجي.
لا كلبي نام انت واني اكعدك انت منتهي كلش. ((نام اسعد)) بقيت كاعد الدنيا هندس ظلمة ادز رسالة لابوية لو ما ادز!! خاف ادز ويظل بالة النوب ويصير بي شي.
زين طش خبر القاعدة لو لا خاف طاش وعرف؟
لا لو عرف جان خابر لو دز رسالة. ونمت و لا حسيت بروحي من التعب.
ماكعدنا ثنينا الا ع صوت السيد جانا الساعة بال٥ الصبح.
ها عمي الله يساعدكم. اعذروني كعدتكم بس ما اكدر اطلع الغراض بغير وكت.
هاي جودليات ثنين. وهاي مي شرب وهاي دبة مي.
وهاي العلاكة بيها اكل رهموها اليوم ريوك وغدة وعشا شلون مجان لان ما لحكت زوجتي تطبخ شي
. عمي الف رحمة ع والديك ربي يجازيك اضعافهن بجاه الحسين.
.
يابه انتو شنو اسمائكم.
اني علي وهذا اسعد.
تشرفنا عمي.
النا الشرف يابه.
يلا اني اترخص ما اكدر انطيك رقمي خاف كلشي يصير عمي هاي دنيا وانتو رتبوها اليوم شلون مجان لحد ما الله يسهلها وترجعون.
.
الف رحمة ع والديك يابه.
راح ومباشرة فتحنا العلاكة مال اكل اني واسعد بيها بيض سلك ٨ بيضات وبصل وطماطة وخيار ع قطعتين قطعتين وخبز هلكد ما جوعانين اكلنا كل واحد بيضتين وباقي الشغلات شوية شوية يلا استقرت المعدة وضمينا الباقي للغدة والعشا. اسعد لفلفهن وية بطاله المي الباردة حته يحافظ عليهن شوية اكثر.
. طلع الصبح اباوع لاسعد وجهة صاير خر.. و اكيد وجهي هم.
غسلنا بقطرات مي اني ويا حته متخلص الدبة.
.
للظهر صارت جمر الدنيا. صيف الدنيا وتسلك سلك والله روحنا تموع من الحر بس شنسوي مضطرين.
بالليل زين الجو لان بساتين يمنا ويصير الهوا بارد بس الظهرية الله لايشوفها لواحد نزلنا جوة من الحر.
ساعة ٥ وربع العصر دك تلفوني.
وحجيت لوالدي كل السالفة واسمع امي تدك وتلطم كتله يابه ترة راح يخلص الشحن احنا زينين بس ماعدنا شاحنة واطمئن ولتخاف علية بس ادري بي ميت بدمه علية من الخوف.
واسعد هم خابر اهلة ونفس القصة وخطية متزوج هوه.
ماعدنا شي نسوي تخيل كاعدين بغرفة حارة وكلشي ماكو يمنا وخايفين باي لحظة يفوتولنا ويكتلونا ومانندل شي بهالمكان واحنا و الله لا سالفة لا حجاية اسعد كل تفكيرة متشتت ومهموم.
ع ما اجه الفجر الثاني هالمرة سويناها واحد نايم واحد كاعد.
رجعلنا السيد.
جابلنا اكل ومخدات ثنين ومي هواي ودشاديش ثنين. وتشكرنا منه هواي.
يعني اذا ترجعلها ماكو شي يدفعه يسوي هيج غير والله انو كال هذولي امانه يعني اذا صار بي شي لو بعائلته..!! المن يلوم. عالعموم.
مرت ايام ع الحالة هاي يوم يجر يوم اخذ تلفوناتنا شحنهن النا ورجعهن.
فات ع كعدتنا بالبيت ١٣ يوم بالضبط اليوم ال ١٣ ساعة ٨ عبرت المغربية.
نسمع صوت رمي مو مثل كل يوم..
لا صوت مال حرب
اخذله بالساعتين الرمي لحد ما خف شوية جان يجينا السيد بالسيارة طاير.
علييي. اسعد..
نزلو بسرعة.
طايرين نزلنا.
ها عمي شكو خير.
عمي الجيش والقوات المسلحة العراقية اخذت السيطرة تقدمو من سامراء واخذو السيطرة امشو يلا نروح خاف باجر تنعكس.
احنا ما كلنا باطل صعدنا ويا لحد ما وصل السيطرة وكفونا الكل تنزل...
اباوع الجثث مال دواعش بكل مكان ناخليهم نخل ومسفطيهن واحد بصف الثاني.
.
طلعنا الجناسي الهم وحجينالهم السالفة باختصار والسيد هم حجالهم الموضوع يلا خلونا نعبر
. علاوي مامصدك طلعنا.
اسعد مو كتلك عوفها ع الله وهيه تسهل.
اي والله ابخت السيد احنا عايشين دخيل جدك سيد بيش نجازيك والله لو نصير خدام الك ما نجازيك.
يابه كولو يا الله واني سويت هالشي لله.
فرحانين وكلشي منعرف شصاير لانعرف بالبقية وشصار وياهم كل تفكيرنا انو عبرنا الهيكل والحر مالتة وطول الطريق سيارات الجيش بكل مكان.
٣ ساعات لو اكثر و كال عمي وهاي بغداد وصلناها ومي بارد نزل على كلبي.
عبرنا مسافة وصلنا لسيطرة الجيش وكال هنا تنزلون بعد لازم ارجع لاهلي خاف كلشي يصير الساعة ١ وربع بالليل.
الف رحمة ع والديك بوسنا ثنينا من كل كلبنا شكد بست ناس واهل قبل بس المرة الوحيدة الحسيتها من كل كلبي من بسته وشكرته.
راح السيد ومودع بالله.
طبينا للسيطرة. اسعد نكمل ونشوفلنا سيارة لو نرتاح يم السيطرة..
بكيفك علاوي انت شتخيط نلبس..
ها ابو حلك ذبيتها وراية انت.
جا عليمن اذبها شو شفنا الموت اني وياك اكثر من اهلنا.
هاهيه خيي خلي نكعد نستراح شوية ونكوم وية طكت البريج (بداية الفجر)
