كل مُّر سيمرْ

كراهية وحقد؟ ام هو شعور آخر؟

يصدح صوت ميحد حمد في اجواء المنزل بصوته الشجي وهو يقول ..

بت سهران الليل و أنوح
و أرضف الونات بصياح
أبكي و دمع العين منضوح
فوق وجنات الخد و أنضاح
كل سببي من مالك الروح

اليازية وهي تركز في معاني الكلمات وفي مخها فكره وحده بس .. يقطع شرودها صوت يدتها وهي تقولها تسكر المسجل وانه لو حاطه قرآن احسن ..

تسكر الاغاني وتتوجه للصاله اللي تتوسط البيت، و ريحة الچاي بالزعفران والقرص والهريس أحلى المأكولات والمشروبات الصباحية اللي ماتخلى من أي بيت إماراتي ..

تدخل اليازية الصالة وتردف: الله الله اشتقتت لهالريحة الغاوية، شو احلى من اني انش ع صوتج وشوفتج وطبخ ايدج الغاوي، وتبوس راس يدتها .. وتكمل جملتها .. الله لا يحرمني منج ويهل يومي قبل يومج ..

اليده: بسم الله عليج عن هالرمسه البايخة وبعدين حبيبتي اي صوت اللي ناشه عليه متاكده انه مني انا مب صوت ميحد؟ اللي قبل شوي شال البيت شل..

ضحكت اليازية: صوتج عن مليون ميحد و الله الله وصرنا نعرف ميحد بعد ها وتغمز ليدتها وتكمل.. منو اللي ماخذ بالج وتحبينه؟ من ورانا؟ ومعلمنج على ميحد بعد وهي تضحك ..
ماتحس الا بعصا على ريلها.. وتفز من الالم .. اميه الله يهديج خفي شوي من العصا دخيلج ...
اليده: يوم بتعدلين رمستج الخامه وبتصطلبين بخفها .. قالت شو تحبين اونه .. هي اخر عمري عيل اسوي هالسوايا.. لا حبيبتي نحن بنات عرب وقبايل ماتربينا على جي.. وبعدين مب لازم حد يعلمني شو عبالج يعني اذا وصلنا فالستين مانسمع اغاني ولا نعرف شي؟ والله
اليازية: ياعيني ياعيني اللي يواكب التطور ويعرف علوم الدنيا .. منو قدجج
انزين اميه بقولج شي..
اليده: تريقي اول وبعدين قوليلي شو عندج انا بسير خاري اشوف الزرع والنخيل واجيك على راجو شو مهبب..
اليازية: ان شاءالله، و عنبو البارحة تراج هازبتنه ارحميه شوي اميه حبيبتي وريحي، بعدين الشمس صاقعه وين  ترومين تشوفين شي ..
اليده: انتي مايخصج وطلعت

من جانب آخر ..

سيف في مركز الشرطة من البارحة وشكله مبهدل حاط ايده على ويه وهو يفكر ..
وين رحتي وين؟؟ يعني حتى كاميرات الشارع ماقدرت تتبع اثرجج .. شكله موضعنا بيطول وياج .. قطع عليه
أحمد: انزين ماعندك صوره لها اي شي عسب نقدر اندور عليها؟
سيف: هي شي اكيد عند امها .. عيل بقوم الحين بسير بيت عمتي وبشوف لو شي صوره لها ..
طلع من المركز وتوجه لبيت عمته ..

عالظهر ..

قامت اليازية الحجره ترتب اغراضها وركبت الشنطه السياره ، اتصلت على ريم.. هلا ريم عيوني..هي الحين انا بطلع وسايره بوظبي ان شاءالله بستقر هناك.. هي عندي مقابله وظيفة باجر عاد لازم اسير قبل بيوم احسن، زين عيوني بينا..

سارت عند يدتها وخبرتها عن استقرارها في بوظبي وانها بتمر عليها كل ويكند ..

~~~~~
أحمد وهو يتأمل الصوره وملامح الويه اللي موجوده فيه ... شوي ويفز من مكانه واقف .. ليردف قائلاً وهو يطالع سيف.. "سيف هالويه مب غريب علي وجنه مار عليه".. سيف يرفع عينه ل أحمد بصدمه وهو كله ترقب. ويقوله انه حاول تتذكر وين واعصابه مشدوده.. ويشد لكمة ايده وبتركيز على امل انه احمد يتذكر ..
أحمد: تذكرت تذكرت!! البارحة وانا ياي من ليوا مرت من جدامي بنيه بنفس الملامح هذي في الشيشة عند ادنوك..
سيف: متأكد؟؟
أحمد: متأكد اصلاً يوم شفت ويها حسيت اني مشبه عليها والحين تأكدت ليش شدتني.. يوم اشوف ملامحك احس انه في شبه بينكم لصلة القرابة ..

يوقف سيف وهو يقول: ليوا!!!! شو بيوديها هناك؟؟؟
خل حد يجيك على كاميرات الشيشة هناك ويطرشلك التسجيل سرعه!!

~~~
الساعة 5 العصر

فالسيارة اليازية توها توصل بوظبي ..
وتوجهت لفندق قصر الإمارات عشان تنزل اغراضها وتسكن فيه اسبوع لين تحصللها شقه ..

دخلت الغرفه خذت ورقه وقلم وبدت تكتب بكل تركيز...

في هالاثناء كان سيف قاعد يكتب مسج عالواتساب والابتسامه كل مالها تزيد على ملامح ويهه ..

شوي ويوصل مسج محتواه ..
( اتوقع الاخبار وصلتج صح؟ مستحيل ماتعرفين اني طلعت؟ ياحيج طلعتي ساكنه في ليوا كل هالفتره .. بس ابشرج انتهى وقت الراحة .. ومابيخلص هاليوم الا وانتي عندي وبتخبريني كل شي صار بالتفصيل هاك اليوم! ليش وكيف!! مايحتاي اوضح و أَكثر كلام.. بينا المسا .. بتفاهم وياج عدل وقتها يا مجرمة..)

اليازية تقرا محتوى الرسالة وابتسامه خفيفة ترتسم في ملامحها،، تاخذ الورقه اللي كانت تكتبها وتفعصها بإيدها وهي تضحك بقوو .. وتقول في خاطرها،، عيل خلاص ماله داعي هالورقه .. يابك الله لين عندي وفرت علي الوقت والجهد وضحكتها ترج الغرفه ..

انتهى.

خبروني شو تتوقعون الاحداث الياية بتكون؟ في شو اليازية تفكر؟ وهل سيف بس يبا يعرف السبب ولا عنده شي ثاني؟
أحبكمم ولنا لقاء آخر🤎
(‏اللهم إني أصبحت منك في نعمة وعافية وستر فأتم علي نعمتك وعافيتك وسترك في الدنيا والآخرة، استغفرك ربي وأتوب إليك)