كل مُّر سيمرْ

حقيقة أم كذب؟

يعّم الهدوء أسمع أنفاسي ، تضارب دقات قلبي المتسارعة ، يتصبب العرق من جبيني قطرة تلو قطرة، والتوتر سيد الموقف ، أرفع عينّي نحو عيناه يتوقف الزمن لحظتها ..

قبل اسبوع في المحكمة:
بعد تبين برائته من تهمة القتل التي حصلت قبل سنتين وتم الحكم عليه بالمؤبد، وبعد النظر في الأدلة الجديدة وإعادة فتح القضية لتبين أن هناك شاهد، حكمت المحكمة بالإفراج عن المتهم (سيف سعيد ال***).

سيف: سنتين .. سنتين ماغبتي عن بالي، سنتين احسب فيهن الدقايق والايام والشهور، سنتين ادور برائتي واطلع من هالظلم كله لأجل لعيونج وارد الصاع صاعين .. ياك الموت يا تارك الصلاة ..

من جانب آخر .. اليازية توها تقعد على كرسي الطيارة قسم الـ first class, وتسمع المضيف يطلب من الركاب الجلوس في اماكنهم والاستعداد للإقلاع، ويرن تيلفونها بالمتصل (ريم💕💕)، توها بترد لكن ارتفعت الطياره وانقطع الإرسال ..

*** : امييي امييييي امييي كانت تركض ملهوفه والابتسامة تشق ويها وعيونها دموع وتنادي على امها بأعلى صوت، امييييي البشارة البشارة، امها توها تنزل من الدري بكامل زينتها وكشختها،
الام:شوفيج تصارخين جي عنبو حتى الييران سمعوا زعيقج، وين هدوء البنت ورقتها و ا ا ..
وهيي تتكلم بتكمل جملتها تطيح عينها على بنتها اللي ويها كله دموع وابتسامة عريضة.
الام: علياا؟ شو بلاج ليش جي ويهج مختبص ماينعرفله.
عليا: سيف سيففف امي سيفف طلع طلع افرجوا عنه امييي سيف طلع سيف بيردلنااا واخيراا طلع الحقق.
ام سيف طاحت من طولها وهي تصيح بصدمة فرحة وشوق وحب ولهفه لولدها اللي اشتاقتله واشتاقت لريحته وصوته ووجوده وحسه.
ام سيف: قولي انج ماتقصين علي قول انج تقولين الصدق، مب ناقصه شي يزيدني مب ناقصه هم فوق همي لاتشوقيني وتفرحيني على ولا شيء ودموعها ماوقفت..
عليا نزلتلها وحضنتها وتصيح وياها ، والله صدق والله صدق الحين الحين قبل شوي طلع الخبر ونشروه في كل مكان كل الإمارات تدري عن خبر إفراجه وانه طلع بريء، الحمدالله الحمدالله ..
قبل سنتين ..
سيف: شو سويتييي؟؟؟ اطلعي سرعه اطلعي وحسابي وياج بعدين اطلعيييييييييي بكل قوته وبصوته الجهوري، **** خافت وارتعبت من صوته طاحت السكين من ايدها وهي ترجفف وصوته يتردد في مخها والمشهد اللي قدامها، سالم طايح عالارض والدم في كل مكان، وهي تشوفه وتشوف ايدها اللي كلها دم،
سيف يروح بسرعه ويسحبها ويطلعها من المكان كله ويقوللها "روحييي روحييي لأي مكان بعيد من هني ولاترجعين، انتي ماسويتي شي ولا صار شي" ، **** تركض وهي ضايعه وكلها دموع وخوف ماتعرف شو صار وكيف كل شي صار بلحظه وكيف قدرت تحط السكين في نص صدره .. كيف قتلت سالم؟ من وين يتها القوة؟ ..
نرجع لواقعنا ..
اليازية فزت من النوم بسرعه وهي تسمع المضيفه تقولها انه كل الركاب نزلو وباقي هي، وانها من نص ساعه تحاول توعيها ..
انتهى.

{كيف أول بارت؟، هل اكمل ولا لا؟، بشوف تفاعلكم لو ماكان فيها تفاعل بوقفها وما بكمل لانه متردده اكملها او لا}

ومبروك عليكم الشهر حبايبي وصيام مقبول وافطار شهي🤍🤍🤍
اللُهم خير الحياه ،وخير النجاح، وخير العمل، وخير الخاتِمة يا الله.