صعب تطولني لو غلاك بقلبي كبير

Part: 1

دخل البيت بصراخ: والله ماربيها ولا تطب البيت انااا يمشون كلمتهم علي انااا  !؟
دخل ابو مشعل وراه ويتعكز بالعصا يحاول يهديه: هد هد ياسعد هذي بنتك وانت ملزومن فيها وين بتوديها تنام بالشارع  !!؟
سعد بردح والغضب معمي عيونه: تنام بالشارع ولا بجهنم هذا الي ناقص اربي بنتها ويرتاحوا منها
ابو مشعل بغضب: ويومنك ماتبي تربيها وين بنودي وجيهنا عن كلام الناس بيقولون رامي بنته للغرب وتطيح سمعتنا بالتراب؟!، اسمعني زين بنتك ماترجع لهم وغصبن عنك بتاخذها واذا على شوفتها ارميها بالملحق ولا ان شاءالله عند الخدم ومعيشتها مابتنقص من حلالك شي
ابو سلمان جا بيرفض الا ويقاطعه ابوه: والله ماترجع لهم هذاني حلفت واذا ما مشيت بحتسيي لاانت ابني ولانا ابوك ومتبري منك ليوم الدين
سعد انفجع من كلام ابوه كله الا ابوه يبيع الدنيا كلها عشانه بس القهر والغبنه بقلبه ماطفت ومايقدر يتنازل: بس يبه
قاطعه ابو مشعل: هذانك سمعت الي عندي واذا ماعندك لي قدر وحشمه توكل والله يسهل دربك
تقدم سعد وحب راس ابوه وكفوفه:محشوم يبه حقك علي سامحني والله ساعة غضب
وبغى ينزل لركبه بس ابو مشعل مسكه ورفعه: قوّ باسك يابو سلمان ولا تضعف للعذال وان تسان تبي رضاي فرضاي من رضا رب العالمين والمرحوم الله يغفر له ماتسان بيرضى بالي قاعد يصير
سعد تأثر وذكريات هذاك اليوم انعادت قدامه ورجعت النار تشب حرايق بقلبه من قهر وحزن وغضب: الله يطول بعمرك يبه ومايكون خاطرك الا طيب بس بنت السيجه ماتدخل بيتي على حلفاني ولا ابي اشوف رقعة وجهها خلها تكتفي بالملحق ولا تطلع منه الا بشوري
**
**
**
عمرها ست سنين وهي بهالملحق اكلها وشربها يجيها من الخدم ماتعرف الشمس من يوم دخلته وهي بعمر السنتين تحت يد مربيه تتكفل بكل شبر منها كبرت وكبر عقلها قبل عمرها قاعده قدام الدريشه المسكره بالمفتاح ماعمرها انفتحت تطالع البزران يلعبون ويتراكضون الي يضحك والي يبكي والي صراخه مالي المكان البنات كاشخات بالفساتين ويتدلعون والعيال يتراكضون بالكوره وحالتهم حاله ومتحمسين كانت تشجعهم بنفسها ودها تصارخ معهم وتلعب معهم بس ماتدري ليه من يوم تعرف نفسها ماطلعت من هذا المكان الي بالنسبه لها سجن
لفت على سوزان مربيتها الفلبينيه تسألها بطفوله ونطقها اكبر من عمرها: هم ليه جايين الصباح
سوزان: هما في عيد عند بابا كبير
الريم بعدم فهم: وليه في عيد وش يسوون في العيد ليه ماعندنا عيد وهم عندهم؟
سوزان بطفش من اسألتها: هذا في عيد يجي عيال بابا كبير عند ابو سلمان وانتا مافي عيد مافي تطلع من هينا
الريم بزعل: وليه ممنوع اطلع ابي العب
سوزان: اذا انت تطلع بابا يعصب يمنع مصروف حقي انت يرضى علي يمنع مصروف حقي؟
الريم: بس ليه انا لا والباقي اي ابي اطلع
سحبتها سوزان بلطف بتغير جوها: خلاص تعال نلعب انا وانتا سوا واجيب لريما كيكه تمام
الريم بعدم رضا ماده بوزها: تمام
**
**
**
ام مشعل تطالع سعد بلوم وعتب: ياقسوتك ياوليدي للحين ماطاح الحطب الي براسك اربع اسنين ماحنيت ماقلت يتيمه مالها دخل بالسواه!!
سعد تنرفز من ذي السالفه امه كله تعيد وتزيد ومصره يطلع بنت السيجه على قولته من الملحق ويعيشها عنده: يمه انا قايل وحالف من قبل هذي مب بنتي وطلعه من الملحق مارح تطلع لو على جثتي
وكمل بهمس: ناقصني مغثة الثانيه(يقصد زوجته ام سلمان)
ام مشعل بحميا: وريعه مالها في الدنيا الا انت هذي امها وماتت ورموها علينا حرام عليك من تسانت (كانت) ام سنتين وانت راميها بذا الملحق بين الخدم الي ماينعرف طيبهم من شرهم ارحم نفسك وارحم المسيكينه الي مايندرى هي حيّه ولا ماتت بين الي مايخافون الله
سعد طفش طفش ليه امه تعاتبه وتصدع راسه بسيرتها كل مره مع ان الكل مايهتم لذا الموضوع ويقولون بحريقه تحرقها بنت المعدي!!.:والي يرحمك يمه قفلي على السيره مالي خلقه
ام مشعل بزعل:من متى اصلاً لك خلق تحتسي (تحكي) ماغير تراددني ومايهمك حتسيي راميه بالطوفه الي جنبك وانا بحري..
قاطعها قبل تكمل وتقلبها مناحه يدري امه ماتسكت ولسانها وش طوله:يمه الله يرضى لي عليك مب قايله من قبل بنت آل معدي ماتبين تلمحين خلقتها وش قلب عليك الحين وذابحه نفسك لسواد عيونها؟!
ام مشعل:هذاتس اول يمه انت صادز(صادق)اني تسنت مابيها يومنها بنت المعدي بس العمر سرا وانت رامينها تسنها لعبه وانا اخاف حوبتها ماتتعداك وهي ماغير بزرن مالها شغل بالي صار والي استوى
مشعل الكبير تدخل بحكمه:امي صادزه بزر ذنبها ان دم آل معدي بعروقها حرام تاخذ اثم من ورا ظليمتك لها الله سبحانه وتعالى لا يرضى بالظلم لعباده لا تظلم نفسك بذنب غيرك والبنت مردها بيت ابوها غصبن عن الراضي والزعلان
ابو سلمان لوى بوزه بعدم رضا عشتو كان طرف واحد محايد والحين اثنين والله يستر من الباقين:كلامي واضح وانا عند رايي قولو الي بتقولون ماني بفاعل وخلو اسلوب الحكمه ودقة الصدر لشي يستاهل
ابو محمد:اشوف الحتسي مو عاجبك ومالي كلمه بمجلسك هذا وانا التسبير(الكبير)
ابو سلمان تكلم وهو يشوف اخوه زعلان:محشوم ابو محمد والبيت بيتك وانت الداخل وحنا الطالعين مايسوى الي يقلل من قدرك انت على راسي بعد ابو مشعل الله يطول بعمره

ماتقدر تستحمل الكبت الي بداخلها ونار الغيره تشب فيها وهي تشوف خالتها وابو محمد يدافعون على بنت الكلبه لا والشاطر يبيها ترجع بيت ابوها وتقعد على قلبها علّه مو كفايه امها خطافة الرجاجيل خطفت زوجها وانحطت على راسها ضرّه بس هيّن ان ما طلعت قهر السنين من عيون بنتها وورتها نجوم الليل بعز القايله
تكلمت بخبث تتصنع الحزن: عن اذنك يابو سلمان بس كلام خالتي وابو محمد صح البنت بزر ودوبها ماصحصت للدنيا وما ورا قطتها بين الخدم الا الشقى وذنبها برقبتك انا اقول تجيبها للبيت وانت مالك شغل فيها انا اربيها واكبرها واكسب اجرها يا انها كاسره خاطري هالبنيّه ريح راسك من همها وازهلها وانا ام سلمان
ابو سلمان تعجب من وين طالعه الحنيّه يدري في زوجته ماتطيق للريم طاري وش قلب الحين:على اساس ماتحبينها شطاري؟
ام سلمان بمسكنه:هذي صغيره وقعدتها بالملحق بذالعمر غلط جيبها للبيت وانا اتكفل فيها واربيها وعد مارح تشوف طيفها
ام مشعل ماعجبها تغيّر ام سلمان ومتأكده وراها شي كايد بس تعيش في بيت ابوها ارحم عندها من الملحق:ها ياوليدي وهذي ام سلمان موافقه وش قلت؟
زفر ابو سلمان بضيق وقلة حيله تعب منهم ومن تكرارهم لنفس الموال:خلاص خذوها وفكوني منها من يوم جت وماشفت من وراها الا وجع الراس وهذاني اقولك ي ام سلمان قدام الكل رجيعها وتعاملي معها وانا رقعة وجهها مابي شوفها خلي اكلها بغرفتها وافتحي لها الغرفه الي بأطراف البيت غير كذا ماعندي وبلا حكي زايد
ابو محمد شاف امه تبي تعترض وتكلم قبل يدخلو في مناوشات وهو يدري راس اخوه يابس لا يستقبل ولا يرسل:خيرن تسوي ياخوي وام سلمان ان شاءالله ماتقصر فيها بس ماوصيك البنت تسبيره دخلها ع الروضه ولا المدرسه لا تضيع مستقبلها من الحين
ابو سلمان بنرفزه:مالي دخل فيها درست مادرست في ستين داهيه قدامكم قايل
رفع يده اليمين وكمل:انا رافع يمناي ومالي شغل سوو الي بتسوون
ابو محمد ماعجبه:يصير خير
**
**
**
**
دخلت البيت وسوزان تمسك يدها وتوصيها تكون مؤدبه وتسمع الكلام رفعت نظرها للي نزل من الدرج بيطلع وقف وطالعها بنظرات مافهمتها بعدها تعداها وطلع من البيت وهي واقفه مكانها رفعت نظرها لسوزان تسألها بطفوله:مين هذا؟
سوزان:هذا بابا مال انتا
الريم:هذا بابا؟ هو زعلان مني
سوزان باستغراب:لا بابا كبير مو زئلان(زعلان) ليه؟
الريم:لأنه طلع وهو يطالعني وزعلان
نزل من الدرج:بابا مو زعلان من احد
ونزل عندها:شسمك ي حلوه؟
طالعته الريم بخجل ونزلت راسها:ءءء اسمي ريم
ابتسم بأريحيه ورفعها لحظنه:واحلا ريم بعد
طالعته الريم مو متعوده تتكلم مع احد عدا سوزان:ابي انزل
سألها:ماتعرفيني؟
الريم طالعته كأنه مجنون هي ماتعرف احد غير سوزان كيف بتعرفه:لا
تكلم بإبتسامه مريحه:انا اخوك سامي
الريم:اخوك؟
ضحك ضحكه قصيره:لا مو كذا اخوك يعني انتِ اختي
الريم: انت اختي
سامي:لا مو اختك اخوووك قولي اخوي
الريم تمط بالكلمه مثله: انت اخوووي
سامي ابتسم:ايوه كذا ياحلوه
وحطها ع الارض:والحين انا بمشي بعدين اذا جيت بجيب لك حلاوه اوكي
الريم ابتسمت بخجل وطفوله وفرحانه بالحلاوه:طيب
طلع وهو يدندن ومبتسم ماينكر انها حلوه وبيضاء لدرجة لما ابتسمت توردت خدودها
سرعان ما تحولت ملامحه بضيق..

تشبه المرحوم...

°
°
°

STOP!!:
اوكي مدري كيف البدايه خلونا صريحين واعطوني آرائكم🤡
س: وش اول انبطاع اخذتوه عن الجده؟
س:نظريتكم عن ابو الريم؟
س:رايكم بالبدايه تستحق المتابعه ولا انسحب؟

ادعموني اتشجع اكثر

3>
.