(Pola Costa Máxica a bordo do Anonymus)Polas augas cristalinas de Girona,
onde os montes estenden
pendente
abaixo
alfombras verdes de piñeiros
ata as mesmas portas do Marnostre.
Onde o magma de pedra
ofrenda as enrugas poliédricas
a unha nutrida colonia de aves,
e areas e cantos conforman man a man
nas praias e calas o padal da terra
que a lingua do mar lamberá unha e outra vez.
Onde as montañas se suceden sinuosas
como os peitos erectos das amantes tendidas,
e os ubres mariños emerxen picudos
como atalaias privilexiadas,
maquillando de rosa e branco a dura codia de granito.
Onde bocexan as rochas adormecidas
para manter espertas as entrañas da terra,
e un bestiario de pedra exhibe entre esfinxes e grifóns
a galería de clons felinos, cetáceos e cánidos.
Onde fragas de piñeiros durmidos e fragas de piñeiros espertos
loitan con brazos de leña e mans de vento
contra unha barbarie de xigantes que crucifican a paisaxe
con tetraédricas construcións de artificio.
Hoxe perante ti, bravía costa mariña,
a alma e o corpo vístense de pedra e auga
nunha mestura de peles que flúen
da praia
ao monte,
do monte
cara á praia.
Mentres a vida me corra polas veas,
a túa fermosura indómita e única
encherá de luz e esplendor o álbum da miña memoria.
Pois quen te viu unha vez xa non pode esquecerte,
pero quen non te coñece
descoñece o valor e a emoción da beleza.
ESTÁS LEYENDO
UNA TRAVESÍA POR LA COSTA BRAVA
PoesíaDescripción en clave impresionista de la Costa Brava vista desde el mar durante la travesía en barco a bordo del Anonimus, gobernado con sabias manos por el capitán Jordi. Versiones disponibles en castellano, gallego, catalán, inglés, francés e ital...