ماء مغلي.

البارت 26

# ماء مغلي
#٢٦

نزل سيف ..

عايدنه وطلع .. وره شويه رجع وجايب وياه
ملوكه ...

كلنه صفنه عليهم ..

جان هو شايلهه ويضحك ووياه اخوهه شايل علاكه والايباد وتلفونه ..

امي كامت بكل حيلهه راحتله ورادت تاخذ ملوكه من ايده وهو ماقبل

جابهه يمي كعدهه وضل كامشهه و هي تضحك ..

حضنتهه وضلت تبوسني و تعايدني
وضلت تصيح تريد ريري ..

صحت لريري واجتي متفاجئه كبل كعدت كبالهه وضلت تحضن وتبوس بيهه

وسيف بعده واكف يمهه وكامشهه
واخوهه كاعد يم ابويه ..

كلت لسيف ..

- شوداك عليهم ! السيد يدري اخذت بنته ؟

- اي عمي يدري ويسلم عليك كال وره العشى امرلكم وكالي اترخص من ابويه خاف مايرضى بجيته

- هااا .. هلا بي شعجب رحت !

- عجبني اروح

- سيف بالك شي !

- عمي عجبني اروح واسلم عليهم مو ولد عمتي هذول لو لا !! شصار يعني واذا جبتهم هنا ماخطفتهم انه جبتهم يعايدون اجدادي

- يلا بويه زين سويت عفيه بالسبع خوش مفاجأه سويتلنه


شالهه وراحو كعدو ويه اخوهه وكلمن فتح تلفونه وضلو كاعدين كدام عينه ويلعبون بالتلفونات ويضحكون بملوكه


وهو وره شويه طلع ورجع جايب علاكتين حلويات .. خله وحده الهم والثانيه انطاهه الي وكالي وزعها ..


كعد يفتح بالجباسه ويقسم لكل واحد كدامه يخلي لملوكه واخوهه


كلنه نتصفن عليه واحس الكل مامرتاحين من محنه سيف المفاجأه مثلي .. بس كلنه سكتنا وعفناهم براحتهم ..


شاورت ريري ..
- بله متفهميني هذا شبي !

- ههه عاااادي كلش

- شنوووه العادي !! لج خاف ناويله شي على البنيه هذا مايتأمن بي

- لتخاف عووومري لتخاف هذا هو  سيف بذاته مو متصنع

- هااا وشمدريج ! معاشرته من ورايه ومادري !

- هه تضل غبي انته لو شويه مفتح عينك وياي جان عرفت ليش هيج سيف وليش اني عايفته

دفعتهه وراحت من يمي .. وضلت عيني على سيف ...

لليل اجانه السيد وجايب حلويات وياه
سلم وكعد ويانه وفرحان بخطوه سيف
وضل يكول بلكت يتعدل الحال ويه عادل
وترجع كعداتهم مثل كبل ..

ملوكه اليوم كله منطلقه ويه ريري والولد
وامي تجيب وتخلي بحضنهه .. كل ساع جايبتلهه شغله ومكابلتهه وكاعده وياهم

من بعد هاليوم صارت امي كل يوميه العصر تصيح سيف حتى يروح يجيب ملوكه يمنه

الجناين بعد مارجعن من ذاك اليوم بس عايدن على التلفون وضلن هالضله بعيدات هنه وجهالهن ...

خلص العيد وانه الدكتور سمحلي اتحرك بس شويه امشي جسمي بدون ما اثني ركبتي

اخوتي جابولي عكازات وكدرت امشي شويه وهمه يمي يمشون وياي ..
جانت صعبه عليه اخلي هالرجل عدله ماتنثني
لا بوكفه ولا بكعده ...

بس ضغطت على نفسي وحاولت وضليت كل يوم امشي مرتين الصبح والعصر .. رجلي ماطخهه بالكاع ومثكله جسمي بس حتى ويه العكاز اخوتي وياي سهلوهه عليه ...


قرب يوم الغدير واشوف ريري تتصفن بالوجوه من ينحجي بطاريه .. عاد لليل
من رادت تنام كلتلهه ...

- ريري .. تعرفين الامام علي ؟

- اي اعرفه  مو
هو الي رضع الايمان طفلاً ويافعاً
و ماعرف غير الايمان
ثغرًُ ماولجت فيه كلمه الكفر ابداً
وجَبينٍِ ماسجد لصنم قط 
ونفسًُ ما ركعت الا في رحاب الله
    
ليش  شبي ؟ كول ..

بعلو صوتي كلتلهه ...
- هاااااي انتي صدددددك !!
منين تعلمتي هالحجي !

- تعلمته هسه شعليك
شتريد تكول عليه احجي يلا اسمعك

- طيرتي الحجي من راسي ولج فهميني
شسالفتج ! انتي يوم كافره يوم تحبين الله يوم تعرفين علي !

انتي منو ! من يا مله فهميني !!!

- بعدني اكره الاسلام بس  احب الرب
وبعدني مو مسلمه بس اعرف علي

اني صراحه مااعرف من حبشكلاتكم احد
بس امير الخلافه المظلوم علي

- اسمهم ائمه مو حبشكلات
ريري عدلي كلامج

-ديلاااا لتعيط

- استغفررر الله .. شعرفج بالامام علي وحده ! والبقيه شنو !؟ كنسلتيهم !!

- كيفي اني اعرف اليعجبني
تعترض !
- اي اعترض لان هذوله ائمتنا الهم احترامهم
ومكانتهم عدنا لو تحجين بالزين عليهم لو لاتجيبين طاريهم على لسانج فهمتي !

- هسه اني حاجيه عليهم !
لك بابه اني اصلا ماعرفهم شكو داجيب طاريهم بالموزين !!!

ماعرفهم لا بزينهم ولا بشينهم شعندي وياهم
يشرقون يغربون لا اتدخل ولا احط بالي يمهم

انته سألتني وجاوبتك بعد شكو حجيت شي موزين وكبيت عليه !!! لو بس تريدلك حجه

- هاذ هوه بويه سكتي اسف انه اسف
بس احجيلي شلون عرفتي وحده وليش بس هو ! اشو عايفه الانبياء مالج دخل  بيهم وتعرفين بس الامام علي !
ليش تلكطين شي وتعوفين شي !!!!


- تره اني اصلا عرفته بالصدفه

- شلون احجيلي فهميني

- اكو شيخ يعجبني واحبه
الشيخ الدكتور احمد الوائلي

- تعرفينه !!!

- اي اعرفه واسمعله هواي محاضرات
يعني من باب الفضول لا اكثر

هذا عجبني من بين الكل بشغله وحده
انه رجل علماني .. ياخذ الدين بالعلم والدلائل
وعبالك يسولف ويه الواحد ويقنعه شلون كانما واحد كاعد ويه بيبيته وتحجيله سالوفه

هيج عجبني هادىء مو مثل هذولاك متعصبين ويرطنون من المنبر بس عذاب وصخام واقتلو وجاهدو وعزو وصخمو


يمكن انته تشوفه شي عادي بس بالنسبه الي
شي مهم  .. لاني ماعرف شي عن الدين
ولا توارثته من اهل ويكون عندي مثلا هالكلام من ابويه واخذه سند لانه متوارثه من اجداداه وماشين عليه صح

او من ام وتعلمني بيهه تعاليم واصول الدين
منو الرب منو النبي منو الامام .. ليش اكو نبي وامام !؟ شنو همه !  شلون عاشو هذني اني ماعرفتهن ..

ماحصلتهن ويه جيتي للدنيا ولكيتهن متحضراتلي كبل امشي عليهن مغمضه

اني اصلا الرب تعبت وبحثت وسألت بكل الاديان يلا عرفته

- ليش انتي مو داخله مدرسه ! ماعلموج عن الدين بالمدرسه !

- مادخلت مدرسه اني ولا بعمري وصلتلها

- جا شلون انتي هيج ومدارسه !

- تعلمت بالبيت

- ليش بالبيت ! ليش اهلج مدخلوج مدرسه شعجب !

- شعليك بهالسوالف
انته هسه تريد تعرف على الدين لو سوالف اهلي !

- واذا سألتج هسه شبيها يعني
انتي شكو هيج يم اهلج تشيش اعصابج

- اييييي بكيفييي
ميعجبني تدخل باهلي وشبيهم مابيهم
تريد شي مني اسئل واحجيلك طاري اهلي لتجيبه على لسانك .. ناس ميتين عوفهم لا كل يوم واهلج واهلج

- يلااااا بويه يلاا عوفيهم
الله يرحمهم عوفيهم كافي سدينه سالفتهم

- اي اووكي

- زين هسه اريد احاجج بشغله بس طولي خلكج شويه

- اييي كوول عادي احجي شنو

- حسب الفهمته عليج .. انتي من وعيتي ماتعرفين لا رب ولا نبي ولا اي شي بالدين

-اي

- زين من كبرتي وصرتي تسألين عن رب العالمين وتسمعين للشيخ ليش ما تبعتي دين الاسلام ؟ ليش ضليتي بدون دين !


- شوف اني يعني قبل جنت شخص ملحد
عشت بس ماعرف شلون تدبرت عيشتي
يعني هواي شغلات صارتلي جنت اكول ليش دتصير ؟

بعدين عرفت اكو شي اسمه قدر ومكتوب
صارت بالي منو الي كتب القدر ! واسئله هواي على تفاصيل الدنيا فصرت اطلع على الديانات عرفت بوكتها اكو رب خالق الكون وكاتب القدر وعرفت اكو يوم حساب وجنه ونار ..

عرفت اكو انبياء وائمه بس ماتعمقت بيهم
هيج قريت اسمائهم بلمحه يعني حتى هسه ناسيتهم

ادري انته دتتعجب بس الشخص الملحد
يحتاج دلائل حتى يؤمن ويتبع شريعه دين مايحتاج احنه لازم هيج وهيج نسوي طقوس الدين وامشي كبل وانتهى ...

دتفهمني ! اني الشغلات الي انتو على الفطره عشتو بيهه ماااااعرفهه


وماقتنعت الا بالقليل من كل ديانه
اخذ كل نقطه منه بدليل واقناع عقل يلااا اكول اني اعرف واحب واتبع هالشي

بس مال اجي واحط اسمي ويه دين اني عميه بي كلشي مافهم وامشي ويه الجماعه بدون علم وفهم شديصير ! وشبقصدون ! وليش هيج !


هااي مااسويهه لو اموت واني كافره وملحده بس ماامشي على خطى واحد يجي يجرني وراه بحجه ان هذا دينا وانتي ملحده وانتي كافره وانتي منبوذه من المجتمع وانتي وانتييي ....
يبووو شيخلصهه وياكم اهل العمايم

- صراحه ماتوقعت هيج مبدأج

- اي عادي انته اثول بكل شي وياي شنو الجديد !

- انجبببي لج

- ديلااا هسه شتريد من سالفته ! اخر مره تحجي لو لا

- ولج عبالي ماتعرفيه حتى احجيلج عليه
لان باجر وعكبه وعكبه عدنا احتفاليه

- ليش تحتفلون بشنو !

- عيد الغدير

- هااا عيد الولايه
هههه شستفاد المكرود من هاليوم
ضلت العالم لليوم تتذبح من وره غيرة ورفض الناس اله بيوم الغدير

بشر محسووود على كولتهم لا يخلص من الحسد امام ولا نعام

- ههههههه اي بعلي صحيح
ريري
ايدج ويه امي بالتحضيرات
احنه كل سنه نسوي احتفال من احتفاللان هذا جدنا علي .. احنه من نسله مو اي ناس تحبه لا هذا جدنا من ظهر لظهر
فلازم نسوي كلشي يليق بمقامه

- ايييي نيالكم عيني يالعلويين
جدكم يشفعلكم عسى ماصخمتو ولطمتو
عدكم الكارت الاخضر بالاخره

- هههههه ولج بويه كلمن باعماله وبعد على كبر محبه الامام بكلوبنه نحصل شفاعه
مو ياهو الجاي ويحصلهه

- هو انتو بس يدفنوكم يمه هاي كعد حظكم
بعد الباقي هم عدكم حظ بي
شنو جديد على اهل العمايم !

- هههه وعلي انتي تضحكين عليه وهسه تطلعين مسلمه بس تدورين وياي دروب

هاي سوالف الي بالدفنه والشفاعه ماتجي هيج بالخالي بلاش

- اي طبعا مو كلتلك اني ادور بعقل

- احجيلي بله شدورتي بعقلج هذا الفريد
شلكيتي مالكيتي علينه

- لكيت الشيخ الوائلي احبه خوش انسان
ماينبذ احد ولا ينتقص من احد كائن من يكون
شكد تمنيت التقي بي بس مالحكت عليه وكت الي عرفته هو شابع موت

احجيلك شغله تريد تزعل تريد ترضى كيفك
بس انتو نسل علي ماتعرفون علي

- هاا هاااا شبيج شايفتنه ولج!!

- تعرفون هالحجايات الماخذيهه مقاوله بينكم
هالحديث وهالكلمتين وهالوصيه بس
ولا بيكم روح علي

- انتي ليش هيج تكرهينا بويه !! هسه انه عاشرتيني شفتيني اذيت احد بديني !
شفتيني زليت بشي ! اهلي شفتيهم مقصرين بعباده مقصرين باخلاق ويه الناس !
شبيج انتي تنزلين هداده بدون فهم .!

- اني معليه بيك ولا باهلك
اني داكولك الي اشوفه بعيني

كم مره اكولك اني الديانه عندي سطر وتفسير  .. عقل بابه عقل ماخذتهه

كلتلك انتو تحبون علي وتمشون بوصايا علي بس متعرفون علي

جان الشيخ الوائلي الوحيييد الي صدك هذا بي ريحه وحب وعقل وشيعه علي

اما انتو البقيه مجرد استنساخ محبه وسيره

وكلشي كلشي تورثوهه نفسهه لولدكم وولدكم ياخذوهه بدون علم وفهم وهم يرحون يطشوهه هنا وهنا يزامطون بيهن ولوو تجي تكعد واحد منهم وتحاججه بحجايتين من الكالهن علي .. هيلاااه اذا عرف يجاوبك مثل الاوادم


كبل يكولك شنو تشكك بدينا ! تشك بالامام علي ! ويسويهه مشكله شكبرهه شكدهه
لان ميعرف هو يجاوب ينحرج فيكوم يزامط ويلعلع بحسه


- صح حجيج شهاده لله صحيح
لان الامام علي بحر علم ماينعرف بيوم ويومين ولا من ورث الاهل بالدين

زين انتي تعرفينه اكثر منا  !

- يمكن مادري
بس اني حبيته لان علماني

امير الخلافه المظلوم .. يعجبني بثقه نفسه
ورزانه كلامه .. قريتله ردود قصيره على محاججه من الناس اله بذاك الوكت وعجبني رده البليغ

اني يعجبني الي من ينطق كلام يعرف قدر واثر كلمته بالمقابل

وهذا رضى متطلبات عقلي صراحه
فضليت ابحث عليه .. اكثر شي عرفته من الشيخ الوائلي .. يمكن جان يجسدلي ولو شي بسيط منه

يعني جنت احب اسمعه يحجي عليه حتى اعرفه اكثر .. طبع بعقلي ورضى كل تفاصيل شكوكي الي جانت بالي لدرجه صرت اسأل نفسي

هذوله الي عاشروه شلون كدرو يجذبونه !
شلون عادوه وهو هالكد مسالم !

اني حبيت علي لان عالم ومظلوم
حبيت شخصه الي تصرف بي

ماحبيته كونه امام والكل تحبه وتوصي بي
لان اني اصلا ماجنت ادري هو امام
ولا اعرف اصله من فصله

شويه صير افهمني اني مالي دخل بيكم مو لان انتو مو زينين واني عود يعني زينه

بس مااحبكم لان ماعرفكم مثل مااريد

والي عرفتهم وطلعو بحياتي كرهوني بام الاسلام والعمامه والصخامه الي بروسهم

عاد صرت الكط الدين والشريعه الالهيه
بعقلي .. الي يكدر يقنعني يطبع بيه حبه ويأثر بيه والي مايقنع عقلي لو الف نبي يبصموله بالولاء والمحبه اني ماكون منهم


- ريحتي كلبي والله كلامج هيج ثلج كلبي ثلج

ريري كل انبيائنه وائمتنا عندهم علم ويحاججون بالعقلانيه ماجبرو احد على الدين
ولا فرضو دينهم بالقوه

كلشي بدلائل الهيه يحجوه ..انتي هسه يمكن الج نفس تعرفين عن الديانات والج نفس تناقشين وتطلعين وتسمعين من المقابل
بس اهل كبل جانو جاهليه ..

مايعرفون غير الاصنام وتوارثوها هم بدون علم وفهم من نزلو الانبياء على الناس نزلو بادله وبراهين قطعيه لوجود الله لان يدرون الحل الوحيد حتى يفتحون كلوبهم هو عقلهم وادراكهم ..

فما اخذو الدين الا بالعقل والاقناع كلهم جيل بعد جيل تعاملو بعقلانيه وعلم جانو جايبين بايدهم علم ومنفعه للناس بس الناس هي الي ماترضى تفتح عينهه وتشوف هذوله شيقصدون !!


- اي ادري الخلل من الناس مو من الرب وطريقه تنزيل الدين اعرف هالشي

- جا ما بحثتي عن الدين كله والائمه كلهه
ليش واحد ووكفتي ! عندج الامام الصادق عليه السلام .. منبع علم وبلاغه .. مرجع صاير للناس من بعد الامام علي عليه السلام

- مادري ماعرفهاي لتصفن بوجهي .. مااعرفه

اني الامير المظلوم بالخلافه هذا عرفته بالصدفه وبعد قفل عقلي عليه ضليت اذا ادور بس لاسمه البقيه اتجاهلهم حتى لو ولده ابوه عمه خاله ميهموني ..

اني طبع بعقلي بس هذا مااصدك اكو بعد يجي مثله نفس الانتيكا هاي متطلع ثانيه

- غلطانه والله
مو بس غلطانه وانما حرامات هيج انتي عقل وامكانيه فكر ونقاش وقابليه بحث وعلمانيه لهالدرجه ومتعرفين باقي الائمه

كل اماام بي كتب تعرفين شنو كتب للنقاش الي براسج
لو نريد نحجي بيهم واكعد اعددلج واحجيلج سالفه كل واحد للصبح مانخلص

بس اكلج حرامااات هيج انتي قابليه معرفه وشغف علماني ومتعرفين اهل العلم وممهتمه الهم

- اممم
كلهم عندهم شفاعه ؟

- اي كلهم لان كلهم احباب الله والنبي
بعد احنه من نتوسل لرب العالمين بحاجه نتوسل باهل بيت النبي وهمه الائمه كلهم من اهل بيته فيشفعون عند الله النه ولقضاء حوائجنا

- هااا  زين اكو مقبره يعني مثل مال علي ؟
يعني كل واحد عنده هيج مقبره يدفنون بيهه يمه لو بس هو !


- لاا مو كلهه
لان اكو ائمه عاشو وماتو مظلومين
منهم الي تغرب ومنهم الي تفلش كبره وصار معزول بس من بعيد تشوفيه

ومنهم الي موجوده مراقدهم بس المقبره بعيده عنهم شويه مو مثل النجف تحسيهه حد بحد

- عررررفت
من حجايه الشيخ عرفتهه المكانه هاي بس لعلي

- يا حجايه يعني ؟ تره كلهم يشفعون بس هي المقابر بعيده شويه عنهم

- لاا .. الشيخ جابهه بالمضبوط

- شلون ؟ شسامعه منه احجي خلي نتفاهم !


- اسمع وانته احكم بعد
يكول الشيخ :

ايا رملةً على مطلع  الحمى سلامًُ على
رمل الحِمى  وشعابه

على منزل حطو الاحبه رحلهم به
ف أراحو الخد فوق ترابه

وعهدي ان القبر خوفًُ ووحشهًُ 
فلا منشدًُ ولاسامع لخطابه

ورملُ علــي  بالغريب طلاقه ًُو بشرًُ
وافقًُ ضاحكًُ  برحابه

فَديت أثراً فيه شددت مشاعري 
واهلي ثثو في مفرعٍ ممرعٍ من جنابهِ


ضحكت وكلتلهه..
- تعالي رور تعالي

كامت من فراشهه واجتي .. جريت ايدهه وكعدتهه يمي .. ضلت رافعه حاجبهه وتكلي ..

-شبيك شو ممرتاحتلك

-هههههه مكسر عيني انتي كلشي ماسويلج
بسسسس
ردتج يمي افرحج وتفرحيني

- بشنو افرحك !

- اول شي انتي هسه كِلش فرحتيني

تصدكين انه لو هسه ابويه سامعه يقرا هالابيات بحق الامام جان نقهرت والله
بس من سمعتهه منج لاااااا وعلي هووواي فرحت

- ليش يعني

- ابويه يقراها وينعى بيها ولده واهله
بس انتي غير شكل

انتي شي مختلف .. من اشوفج تعرفين شي عن الدين وتحبين احد الائمه بهيج عقليه
وطابع بفكرج كل كلمه عليه
افرح فرحه ماتتوقعيهه والله لو هسه يكلولي باجر ترجع عافيتك وتكوم على حيلك ماافرح مثل هالفرحه وياج

وعلي انتي بنيه طيبه وعقليتج حرامات تضيع هيج .. انتي هسه جاي تصيرين بعيني احسن من هواي نسوان هجامات بيوت متغطيات بالعبايه

- هاا زين

- اييي بس بعد ناقصج تكملين معرفتج بالبقيه وتصيرين توب

- اي ادري بس يعني يحتاجلي وكت
كل واحد اذا اريد انبش كلشي عليه براحتي يحتاجلي فد كم شهر
وانتو اسلامكم بي عشيره شيخلصهم !

-هههه ااانه احجيلج عليهم واختصرلج الوكت
وشيجي بالج اسئليني والي ماعرف اجاوبج عليه اجيبلج عليه مصدر وانتي عرفيه بنفسج

- لاااا ماريد
مالي خلك هسه ... اني شوكت ماطخ بالي اروح ابحث عليهم

- زين على راحتج شوكت ميعجبج بحثي
بس خلي اكلج شي

- شنو بعد

- انتي مو تحبين الامام علي
باجر راح افرحج باجواء خاصه بس اله

شوفي هو عيد الغدير عكب باجر بس احنه اهلنه من باجر يبدون يحتفلون بي ويحضروله

- شيسون يعني ؟ امك كلتلي عدنا هواي شغل باجر بس مفهمتهه شتريد بالضبط

- اول شي اخوتي راح يتسوكون مال عزيمه
وانتي وامي واختي باجر تجي هم تعاونكم
تضلون تحضرون للتوزيع

باجر توزيع فواكه وحلويات اخوتي صياني راح يجيبون وهاي كلها تتوزع على حب الامام

الشارع راح يتنظف من الطول للطول
وتصير بي كعده مرتبه .. سكملي وطبلات
وسماعات كبار ونشرات ضوئيه يعلكوهه الولد على البيوت
والشموع على كل سياج تنعلك

ويبدا كل بيت يطلع صينيه مشكله ومرتبه
ياس وحلويات وشموع ويعرضهه بنص الكعده يعني ..

واحنه كيكه جبيره نعرضهه بدل صينيه
وتلتم كل الولد بالمنطقه يمنه
وولد عمنا وخوالنه باجر من وره الغدا همه هنا ساعه ثنتين تلكيهم دكو الباب

- يااااا هالكد هوسه حتصير باجر !

- اي اسمعي
ولد عمنا بينهم واحد اسمه ' غدير '
هذا رادود هو بعمرج هيج بس واحد حجاااي و اله صوت عجيب

هذا متكفل الاحتفال يعلك الجو بالقصايد والاناشيد لحب ومدح الاماممن وره صلاه المغرب والعشه يبدا عاد الاحتفال كلهه تلتم بره وتتوزع الحلويات والفواكه والماي ويبدا عاد هو ينشد والكل وياه تهوس ..


وره ساعتين من يتعبون والكل تكعد ترتاح
هنا ابويه وعمامي يكصون الكيك ويوزعون للزلم الكبار .. وابويه معودنا قطعه الكيك مالته ياكل منها شويه والباقي احنه ولده ناكل منهه .. يعني ماناخذ قطع لا ناكل من الي ياكل منها ابونه ..

- ليش يعني ؟ شهالتقاليد شتسوي هيج !

- هو جان من احنه صغار يوكفنه يمه
ياكل شويه ويوكلنه واحد واحد ويكوللنه
ولد علي معلمين على قسمه اللكمه بحلوها ومالحها

وعاد لهذا عمرنا هو يخلينه نتقاسم القطعه مال كيك بيناتنه

- حلوووو
زين هنا هم ياكلون منها لو لا ؟ يعني البنات

- ايي ياكلن نبقيلهن قسم من الكيكه هنا يوزعنها بينهن

- اوووكييي زين اني شلون راح اشوف اذا تكعدون بالشارع !!

- هاااا .. راح اوصيلج سيف يخليج بغرفته من شباكه تباوعين بس طفي الاضويه
ولا تفتحين شباك هو الجام مضلل تشوفين براحتج بس لا تشغلين اي ضوا حتى مال موبايل تره كبل تبينين

- اييي اووووكيي

- ايي باجر لنص الليل تره تضل هاي اللمه
وثاني يوم اللمه هاي كلهه تتحول هناك بضريح الامام

يرجع غدير هناك يعلكهه الهم ويلم شكو واحد من جماعته وياه والعشيره كلهه تلكيهه هناك تحتفل وتزور ومايرجعون هم لليل


وثالث يوم توزيع زرده هاي امي مسويتهه نذر من اول زواجها لان جانت ولادتها تتعسر
فد نوب فنذرت توزع زرده بس تتيسر ولادتها .. وكل سنه هي بيهه حيل مابيهه توكف تطبخ وتوزع

- ايييي اخيراا راح اضوك الزرده
مره وحده اكلتها وجانت حلوووه حيل
محبيتها بس اسمع بيها هواي يوزعون بهيج اجواء عندكم

- هههه اشبعي بيهه من ايد امي ماتنشبع صدكي

- اووكييي

- هسسسه اريد منج شغلتين رور

- ايي كول

- اول شي تكعدين براحتج باجر بغرفه سيف
وتركزين ويانه خلي كل بالج يمنه انتي بعد تحبين علي .. شوفي محبين علي شلونهم
وشيجي بالج بالليل من نكعد سوه اسئليني زين

- ايي اوكييي
بعد شنو

- اريدج متخافين من اي شي يصير
بهالتلث ايام الله يخليج ضلي بهيج كلبج القوي

- ليش شكو شيصير ! شتسوون بعد !

- مو احنه نسوي
بس بيتنا راح ينهجم ههههه

- جذااااب

- والله ينهجم هجمه مال خبال
بس انتي لتخافين احنه هيج نكيف من ينهجم
وتلكينه كلنه كلوبنه قويه  واصلا هالايام ننتظرهه بروحنااا

- شكو بس فهمني شكو ليش شنوو !!

- شوفي
كل شي يصير لان بيتنا مسكون ومسحور
وهالجماعه يكرهون علي كره العمى

وعلي يهجمون البيت هجم لا تضل بوب لا كاونترات لا كهرباء لا صياح اصلا نوم مانكدر نام تلكين الليل كله اهلي فاتحين شموع وقران و الهوسه تضل وكل مااايجي ابن عمي غدير هنا  لااازم لو ينجرح بشي لو ينضرب ويوكع كل مرره هاي لازم تصير

هالحجي انه احجيلج من كبل ثمن سنين يعني مو مال مره مرتين

- عزاااا وهاي شلون هيج تضلون صخام بعينكم

- ميخالف نتحمل وبعدين نخلص منهم شر خلااص

- يعني كلشي يروح ! بيتكم يرجع زين !!

- والله اي بس هالمغضوب عليهن مايخلنه يدوم بزينه

تدرين انه ليش شكيت بيهن نسوان اخوتي

- غير هنه قريبات ويكدرن يمدن ايدهن على غراضكم !

- اي بس هاليوم هو الثبت شكوكي عليهن
شايفه هنه كل سنه هيج وكت يروحن لاهلهن
مرات امي تحجي على اخوتي تريد نسوان وياهه توكف تساعدهه بس همه كبل كم يوم هم شلون هيج هالايام يدزوهن لاهلهن
ويضلون يتعذرون كل مره بشكل

بس خلي نخلص الاحتفالات هنا وره يومين يرجعن ..

البيت نظييييف وكله بخورات وقران ومطهر من كل شي وحتى نفسيتنه مرتاحه
نفسس الليله الي يرجعن بيهه بيتنه يرجع ينهجم لوو واحد منا يصيرله فد قدر

مرات ابويه يفول عنده الضغط يضل حتى خشمه ينزف وهو كلش ملتزم باكله ودواه

امي تختنك فد نوب .. حتى اخوتي ينزلون يهجون من البيت يعوفون الجهال ونسوانهم ويهجون  مايرجعون لثاني يوم بالليل


وانه اصدع فد نوب ويجلب عندي وجع بظهري مال موت .. اذا امشي خطوتين وارفع ظهري شويه تشوغ روحي

واحنه كلنه بنفس الصبحيه الي هنه ماكو بيهه
احنه مرتاحين وعليييي اخوتي ما يهللهم حتى يطلعون للشغل و يكعدون يسولفون ويه ابويه وامي وهذيج الكعده نكعدها براحه نفس
ولليل كلهه تلكيهه تزوهرت بعد

كلمن يلوب من جهه ... ولثاني يوم كلهه على نفس الحال بسسسس ام سيف تلكيهه واكفه مثل الصل

ووجهه يضحك وتكمش البيت مسح من فوك لحد باب الشارع وتطلع الجهال يغسلون الشارع هم وهي فوك راسهم

و شتسوي بعد .. تاخذ الجدر الجبير الي امي طبخت بي .. تاخذه وتصعده بالسطح هااي انه شفتهه بعينيتاخذه وتترسه طين ريحته ماتنعرف شني
كلشي بيهه حتى ريحه نكاسه وتشمر بنصه
شكو شمعه مال احتفال شكو عود مال ياس
هذني يضلن يعني كم وحده من الاحتفال هنه تلمهن كِـــلهن وتذبهن بنص الجدر المطين
حتى الجكليت هم تذبه وياهن وتعوفهن لثاني يوم تروح تلم الطين الي بي ويه هذني وتغسل الجدر وتنزله

- عزاااااااا بعينهه
ولك هاي طنطنول خاف هي سحاره !!!

- كلشي يصير لان هي دكتهه هاي ماتنغفر

- عزااااا يمه صخام بعيونهن
زين هذا الجدر بعدكم عايفي هنا وتطبخون بي !

- لااااااا بويه اكيد لااا
انه من يوم الي شفتهه اخذته ورحت شمرته بالزباله هيج عبور شارعين

وامي تستخدم غيره عدنه هوااي جدوره نطبخ بيهن بمحرم بس هي غايتهه جايده
لو منين ماراقبهه واحط عيني عليهه هي تضل تنتظر الفرص للاذيه

- ولك حويدر هاااي السنه مانخليهه
راح اسوي تصفيه واخليهه تشيط
اصلا خلي تجي وانطيهه طرح سبع اياام
بالفراش اهيج القرحه عليهه

- ههه الله وايدج صدددك تنقذينا اذا هيج

- اووكيي خليهه عليه
بس اكولك هاي من يصير بيتكم هادى ء
يعني راح السحر !

- اييي ابويه يسوي جلب للسحر بس
اخر مره مافلحت ويانه

-شلون هاي جلب السحررر فهمني ؟

- تشوفيه بعينج رور اهم شي لتخافين
هي ايام زينه هاي احنه تفيدنا بس رادلهه كلب قوي ماشي

-اوووكيي

- تضلين تنامين يمي ؟

- لاااا ماريد

راحت نامت بفراشهه وضليت انه اباوعلهه
وادعي الله يهديها للطريق الصح وماشوفهه فد يوم بضلاله ...

ثاني يوم كعدنا الصبح وره ماكملنه ريوك
كلت لريري تاخذني اسبح براحتي هالمره

و ضلت وياي لحد ما وصلت الحمام لان مشيتي بعدهه ممتوازنه الرجل ثكيله احس راح انجفي على وجهي ساعه الساعه

كعدت على السكملي وضليت مخلي رجلي على طبله وريري تساعدني انزع ملابسي

ضلت وياي تغسل جسمي بدون متوصل مي لرجلي .. هي بهيج وكت متحجي شي وياي
ولا يطلعلهه صوت .. حتى اذا اكللهه على شي تسوي بس متحجي

عاد كملت غسل جسمي وجابت الخاولي
كلتلهه ..
- اوكفي بس انطيني سراحيه مي خلي اعلي جسمي

انطتني السراحيه وضلت تباوعلي وانه اعلي جسمي وهي ساكته .. كملت واخذتهه مني
وكلتلي ..

- شنو هذا السويته !

- عليت جسمي شنو شي غريب !

- اي ماعرفه ليش يعني تسوي هيج !!

- لازم من نغسل نعلي الجسم يعني مثل واحد يطهر جسمه بذكر الله

-هاااا ضروري يعني !

- اي ضروري كلش
انتي مامسويتهه ابد

- لاا ماعرفهه هاي اول مره ادري بيهه

- ممعقول !! زين يعني انتي ماتعرفين غسل الجنابه ! غسل الحيض ! كلهن هم بيهن هيج
مغاسلتهن ابد !!!


ضلت ساكته ولبستني الفانيله والتشيرت
وانه احاجيهه وهي ساكته .. لبست البجامه
وساعدتني حتى اطلع .. ولحد ماخذتني لفراشي هي ساكته ...

ضليت انشف شعري وافكر معقول هاي متعرفهن !!! مغاسله هيج ومتطهره ولا مره بعمرهه !!!!

اجتني مره ثانيه مبدله ملابسهه وجايبتلي عصير برتقال .. شربته وهي كاعده تطلعلي الدوا ..

كلتلهه..
- مجاوبتيني بعدج
ليش تتهربين !
- شجاوبك يعني ! اكولك اي واجذب ! لو اكولك لا وافشل نفسي ! 
شتريد ياهي منهن تسمع !! هاا كول

- شبيج ريري انه سئلتج عادي
ماريد انتقص من قدرج ولا افشلج

- لعد اسكت كافي
- لاا هاي مينسكت عليهه
ريري انتي مو صغيره حتى تعوفين هيج شغلات هاي طهاره جسم لازم كل انسان يعرفهه

كل الديانات عدهه طرقهه للطهاره انتي شنو دينج الاصلي من ابوج انولدتي بي شنو
فهميني حتى اعرفج عليهه ليش تضلين هيج جاهله باااهم امر لازم تعرفيه

- معليييك باهلي كم مره اكولك عوفهم

- هسه انه اريد اسم دينج ماريد اعرف اهلج شبيج رور طولي خلكج وياي شجاج

- ديلااا اووكي
- احجيلي شنو دينج بالجنسيه شنو
- مادري ديني هوسه
هسه انته فهمني هاي بدينكم شنو يعني شلون يسووهه انته شجنت تحجي ماركزت وياك

- هاي طهاره الجسم تصير كلما واحد يغسل جسمه بالصابون ويكمل ياخذ الماي ويغسل من راسه الى نهايه ايده اليمنه ويكول
سبحان الله تلث مرات والله اكبر تلث مرات
ويكول سبحان الله والحمدلله ولا اله الا الله والله اكبر ..

وترجعين تكملين جهه جسمج اليمنه كلهه ونفس الشي اليسره
وتكولين  اللهم طهرني من الذنب او الجنب او الحيض حسب غسلج انتي شنو وكل وحده هم بيهه تفاصيل بس هاي هيج بشكل عام يعني
تذكرين الله على الماي الي تشطفين بي جسمج

- هااا اوووكي
- بس جاوبيني الله عليج مو تخجلين مني بس كليلي هالشغله خلي افتهم انتي ابد ماغاسله غسول هيج بذكر شي على جسمج لا بجنابه ولا حيض ولا اي شي !!

- ماعرف هاي مال غسل الجنابه ومدري شنواعرف اغسل واجلف زين واطلع المع بس هالسوالف ماعرفهن

- ريررري وينج عن نفسج متكليييلي

- ديلااااا هسه عود اسويهه
- روحي سويهه هسه شعندج يلاا روحي

- بدلت بعد
- ميخالف نفسهن البسيهن بس روحي جربيهه
يلاا صدكي تحسين نفسج اخف واريح
- هااا .؟؟
- والله روحي وجربي يلا خسارنه خساره هسه روحي 
- اوووكي
راحت وانه مادري شعوري متضارب
يعني كلشي هي تسوي لنفسهه من عنايه ونظافه بس هنااا لاا وهي اهم شي

شلون هسه انه شعتبرهه !! والله دخت !

انتظرتهه لحد مااجتني مبدله مره ثانيه غير شكل وكبل كلتلي ..

- تره نسيت بس دبرتهه منا ومنا
عادي مو ؟ المهم النيه

- ههههه عادي تتعودين كل مره وتحفظيهه بعد
- اكتبهن الي بالملاحظات حتى اركز واحفظهن
يلاا راح ابدا ويه امك عدهه لسته شغل الي

راحت بعد ماشفتهه الا وكت الغدا وهم مخبوصه هي وامي ماكعدن اكلن ..
واخوتي طابين طالعين يجيبون غراض
ولد عمي كلهم التمو وضلو يرتبون الكعده
وانه لحد المغرب يلا طلعت وضليت كاعد على الرصيف مدد رجلي على الطبله واباوعلهم .. واخابر بريري اشوفهه شجاي تسوي واحجيلهه هذا شنو وشيقصد وهذا منو من ولدنه وهي بغرفه سيف ضاله تباوعلنه

ابن عمي غدير علك الجو مثل كل مره
وابد ميخاف رغم هو كل شويه لو تعطل سماعته لو يطك البلوجكتر لو منين مايمشي يعثر بس هو متعود وكل شي جايب احتياط

كل شويه كاطع القصيده ورايح يصلح فد شغله ويرجع يعيد اقوى من الاولى

ابويه بداهه بمديح نثري للامام ومن بعدهه صارت الساحه لغدير ...

من كطعو الكيك اجوي اخوتي وكفو يمي وصرنا ناكل من نفس الماعون مال كيك
والي بقوه الي لفيته بكلينس وكلت انطيه لريري اوكلهه منه وافرحهه ..

من رجعوني جوه وضلو همه ينظفون بره
صرت اسمع بس صوت الصياح جوه ..

ضليت اصيح لسيف وهو طب يركض وجابلي ريري ...
اجتني مجلبه بايد سيف وكعدت يمي وتجر نفس .. كلتله..
- شبييج رور شحجينا ياعيني شفهمتج البارحه
- حيدااار طلع كداااامي طلع بس
هذا سيف سيف

. يتبع