| طُغـيان هارون |

الفصل الثامن

#طغيان_هارون
#بقلم_الراوية
#الفصل_الثامن

صلوا على النبي ❤️

تعليق+تصويت و متابعة الحـساب للاستمرار 🙊💋

.

خاتون

سـاعات افكر، الإنسان لأي مـرحلة ممكن يـوصل من التخبطات و التفكـير المفرط
لـدرجة ينفصل بيها عن الواقـع، يغوص بتفكيره و متـاهات ما إلها نهاية

چـنت متمدده على الچرباية، ايدي جوه خدي و اني اباوع للفـراغ، افكـر و اغوص بأفكـاري و خوفي
من مشي بطـريق احس نهايته ما ترضينـي، افكـر بالي راح يصير بحياتي بعد ارتباطي بـأياد..يا تـرى والدي احسن الاختيار لو فشـل

غمضت عيوني بس قبلـها طبعت بوسه على اصبعي السبابة و الوسطى و اني امسحهن على صورة والدتـي الي بصف چربايتـي

بديت اغفـو، بس إعصار هائچ خلانـي انهض بفزع
فقط صوت الرصـاص چانت تستقبله طبلات اذانـي، الزجاج تطشـر و وگع على الچرباية
حسيـت بحرارة على خدي تحت عيني و مثل الخدر ينهش بيها ، گمت اردد بأسم قصي و ابـوية
خفـت كلش، مچان بالي شي غير اطلع من الغرفة بأسرع ما يمكن

اسمع ابوية يصيح بأسمـي، صادفته بالمـمر و هو يخليني تحت ايـديه
سحبنـي بنهاية الممر بعيد عن اي شبـاك
چنت اسمع صوت دقات قلبـه كأنه بسباق، گام يصـيح لقصـي و هـو يگول اله

- قـصي انتَ و رؤيا فوتوا لجوه الدرج

- ما يسمعوك بابا

بعدني عنه و باوع لوجهي و هو يگول بفزع

- جرح بوجهچ

- من الجام

حچـيتها و اني اغطي راسـي غريزياً، رغم ماكو اي شباك قريب علينا بس صوت الرصـاص چان مرعب بالنسبة الـي

فجأة هدأت الأصوات، و بس صوت قصي ينادينـا
نهضت وي والدي من گعدتنا،و اني رافضة اترك ايـده نزلنا للطابق الجوه بوجه شاحب
رؤيا واگفـه بالصالة وحدها، گبل اجت ناحيتي و حضـنتني و هي تگول

- خوما بيچ شي ؟

- لا و انتِ

- غرفتنا بعيده عن الشارع ما صابني شي

حچتها و ابتعدت عنها ، صوت زلم بالحديقة و هما يحچون بأصوات عاليه
اباوع لزجاج الصالة كله بالگـاع، حتى التحف الي قريبة من الشباك متهـشمة
چنت خايفة و اسمع دگات گلبي بالمكان كـله، اختنگـت فجأة و اني افتح حلگي اريد اتنفس، مگدرت ابقى واگفه كل جسمي بدا يرتجـف
عرفت انو نوبة الهلع صابتني گبـل سحبتـني على الدرج و گعدتني عليه ، بهاي الأثناء دخلنا نـسوان من جوارينـا و هنا يطمئنن علينا
مگدرت ارد على اي وحده تحچـي وياي، عقلي گبل بدا يرسـم افكار سوده
انو هاي الرصاصات الي كسرت الزجاج و التحف و شوهت جدران البيت من برا چانت تگدر تخترق راسي او صدري ،او يمكن احد من عائلتي