9:30ص
رجع من المستشفى مع ابوه
في السيارة..بعد ما فك الجبيره عن ساقه
مع ان الدكتور طلب منه يتركها اسبوع زياده بس رفض
الاسبوع هذا كان هادي جداً
اقدر اضيفه لـ قاموس ايامي الهاديه اللي تنعد•
من العصر اطلع مع احمد و ما ارجع الا 11 من الليل
ما حاولت احتك بـ احد من العائلة
ماعدا النشبه ليث اللي مقابلني في الغرفة
رفع ساقه اللي فك عنها الجبيره على رجله الثانيه
يتفقد الجرح العميق فيها بشكل دائري على الرجل
واثر الخياطه واضح فيه ومشوهه بشكل كبير
عبدالرحمن انتبه له وناظر جرح رجله/ماعليك مع الوقت بيخف الاثر ونسوي لها عملية تجميل
لأن وقت الحادث رجلك كانت شبه مقطوعه مايمسكها الا العظم
بجاد نزل رجله بخفه/بنيّه اسوي عملية تجميل؟ الرجال ماتعيبه الندبه
عبدالرحمن ابتسم ووقف السيارة بسبب الاشارة
الحمراء والتفت عليه/من قال لك ان العمليات للـبنات العمليه
هذي عمليه علاجيه تجميليه ترجع رجلك للشكل الطبيعي
بجاد بدون اهتمام/يارجال وش ترقع وش تخلي لاجات العافيه فهذا
اهم شي عشان افتك من منّت اهلك
عبدالرحمن عبث بشعره بحنيه/وش منّت اهلك؟ علامك ياابوك كذبت الكذبه وصدقتها
تراهم اخوانك وامك لا تنسى
بجاد التفت له وفتح فمه بيتكلم بس تردد وصد عنه
عبدالرحمن فهم ان في خاطره شي/قول اللي في خاطرك علامك سكتت
بجاد بحواجب معقوده/لي اسبوع ساد فمي ومنطم مالي خلق للمشاكل
والاخذ والعطى لأني عجزان فيها
عبدالرحمن /افااا وش العلم من اللي مزعلك
يجاد/ انـت
عبدالرحمن عبس بملامحه/انااا
بجاد/ايه انت مهيّت بناتك اللي مايتسترون
وتطلع وهي كاشفه وجهااا كأنّ ماوراها رجال
عبدالرحمن/تقصد حجابهم؟بالعكس اشوف انهم متحشمات
مدام لبس الوحده ظافي وساترها وهي حافظتن عمرها فـ ماعليها خوف
بجاد بقهر/اقول لك كاشفين وجيهم تقول لي ظافي؟
عبدالرحمن بنقاش/انا معك ان الوحده لازم تستر وجها
وسترها لوجها عباده لله ما ابي اغصبهم عليه عشان ما تصير عاده
وتتغطى توي ومن وراي تكشف هذي عروب عندك تغطي وجها وامك تتلثم
ورشا وجيلان حجاب كل وحده وقناعتها وانا ابيهم من انفسهم يتغطون
بجاد يلوح بيده بجلفه/لو انك قد لخيت الوحده كف يصنج اذنها كان ما كشفت لا
قدامك ولا وراك
عبدالرحمن ابتسم بضحكه صغيره لذكرى شخص مر طيفه في باله وكان توه يلاحظ ان بجاد نسخه مصغره منه…
وتحوير للموضوع/دمك حار وطبوعك حاده انا من قالو لي انك ساكن بالشمال قلت بس بيجيني ولد صدره شمالي و وسيع خاطر
بجاد تفطن لتغييره للنقاش بمدحه للشمال وذم لـ حدة طبوعه بطريقه مبطنه/وانتو تخلون
للواحد صدر شمالي…
عبدالرحمن ابتسم وحرك السيارة
من افتحت الاشارة
وصلو للبيت ونزلو
تبع ابوه باستغراب من
مشيه باتجاه الباب الداخلي للبيت
بـ العادة نطلع وندخل من باب قسم الرجال
بس دخلنا من الباب الرئيسي للبيت
تقدمت بخطواتي و وقفت جنبه/وين داخل زوجتك بتفصل عليك
عبدالرحمن وقف والتفت له بضحك/ههههههههه زوجتي من؟امك ياولد
لا عاد اسمعك تقول زوجتك قول امي
بجاد/اللي هي معلينا وش تبي داخل من هنا
عبدالرحمن لف يده على كتف بجاد/ماتبي تفطر؟
بجاد /إلا
عبدالرحمن لف يده على كتوف بجاد مشى معه لداخل البيت
وهو مبتسم من عدم نفور بجاد هذي مره منه..
بجاد و عيونه تتجول بتفحص للمكان
من وصل ما قد استكشف البيت او دخل هذا الجزء منه
دخلنا لصاله مفتوحه و واسعه
سحب له مركى من فوق الكنب ونزلها على الارض
وجلس تحت وكوعه ريحها على ظهر المركى
وظهره للمدخل
عبدالرحمن دف الطاوله اللي تتوسط الصاله
وجلس على الارض
دخلت بعدها عروب وبيدها السفره/سلام عليكم
عبدالرحمن وبجاد /وعليكم السلام
عروب وهي تنزل السفره وابتسمت ل بجاد بفرح/الحمدالله على سلامتك
بجاد حك راسه ونظراته مشتته/الله يسلمك
عروب تقرب منه وعينها على رجله باهتمام/تقدر الحين تمشي عليها زين
بجاد/يعني
التفتو لـ رشا اللي دخلت بيدها صحن الفطور ونزلته وهي تهمس بالسلام
ثم جلست جنب ابوها وحضنت ذراعه/وي فديت اللي منورنا اليوم مقتحم الحصون
عبدالرحمن يرجع طرف شماغه وراء كتفه ويده الثانيه خلف كتف رشا وشدها له/نقتحمها ونقتحم ابوها..
اءءءه مسك راسه بالم بسبب الضربه اللي جته من
الخلف ..التفت وراه لليث /هاا اشوفك فيك الجبيره
بجاد ويده على راسه/بفك يدك عشان تعرف كيف تمدها
ليث ضق عيونه بستهزاء مشى بيجلس لكن يد بجاد اللي رفعها بسرعه
خاطفه وتعلقه بيد ليث وشبك اصابعه بأصابع ليث
وهو يلويها ويرجعها ورى
وليث التفت له بانتباه وبتحدي وهو يقوم يلوي اصابعه ويحاول يلوي اصابع بجاد
اللي رفع زاوية حاجبه اليسار بتحدي من مقاومه ليث القويه
فجاءه صارخو الاثنين مع بعض
وكل واحد مسك راسه بعد ما ضرب عبدالرحمن روسهم ببعض
ليث بحطمه ويده على راسه بالم/اه يـبه؟
