السيرة النبوية

ما قبل البداية

قبل البداية وبعد الصلاة علي النبي..
أنا بلخص السيرة يجماعة من (الرحيق المختوم)
وهو عبارة عن بحث للشيخ
صفي عبدالرحمن المباركفوري
(وده 512صفحة)
والبحث خد المركز الأول ف مسابقة في المؤتمر الإسلامي الاول الذي عقد في باكستان سنة1396ه

الكتاب قيم جداً  وفيه معلومات كتير هحاول الخصهم بطريقة كويسه
وهو باللغة العربية الفصحي طبعا
فحابب تشوف التلخيص  براحتك حابب تقرأ الكتاب نفسه فانت حر بردو
حابب تسمع بودكاست ومش عايز تقرأ ف
فيه السيرة النبوية لأحمد عامر جميلة جدا

•••••••••

بسم الله الرحمن الرحيم
صلي علي حضرة الرسول..

بصوا يجماعة قبل منتكلم ف السيرة لازم نعرف العالم كان متقسم ازاي، مين الي بيحكم وديانتهم، وطبيعة الشخص العربي،ووقعة الفيل

العالم وقتها كان عبارة عن
• الروم أو البيظانتية : الي هي أروبا حاليا وجزء كبير من أفريقيا منها(مصر وتونس وليبيا وكتير من الدول والشام كلها الي هي فلسطين والاردن وسوريا وكدا
والعاصمة بتاعتها كانت تركيا
وديانتهم كانت المسيحية المحرفة
والإمبراطور بتاعهم: هيركل
والروم معروفة بكمية الترف والبزخ الي كانو عايشين فيها
•علي يمينها بقي الفرس كانت أكبر كمساحة
ودي كانت العراق وانت طالع لفوق وكل الدول الآسيوية
ديناتها كانت المجوسية يعني بيعبدوا الطبيعة كالنار والماية والهواء وكدا
بس النار كان اهم حاجه فيهم
الإمبراطور عندهم كان كسرى
الفرس كان سايد عليها الظلم والقهر وفكرة إن الحكام آلهة

• الهند: ديانتهم كانت الوثنية الي هي أصنام وآلهة ومعابد وفكرة إنك لما بتموت بترجع بهيئة تانيه كشجرة قطة  والعبط ده
وكانو متقسمين. لطبقات
أهمهم البراهنة ودول كانو الكهنة ورجال الدين وبيتعاملو معاملة الآلهة، وطبقة للتجار والفلاحين
وفي طبقة الخدم ودول بيتعاملو كعبيد

•الصين ودي كانت منغلقة علي نفسها

•وأخيرا شبه الجزيرة العربية ودي اصلا كانت عبارة عن صحاري ورمال وظروف مناخيه صعبه عشان كدا كانت حصن منيع مبيسمحش للاجانب بإحتلالها وعشان كدا سكان الجزيرة منذ قديم الأزل أحرار ف شئونهم برغم مجاورتهم للفرس والروم

والعرب بقي كانو أقوام
وقسمها المؤرخون إلي ثلاثة أقسام

(١)العرب البائدة: هم العرب القدامي ك عاد وثمود وطسم وجديس وعملاق وغيرها
(٢)العرب العاربة: هم العرب المنحدرة من صلب يعرب بن يشجب وتسمى بالعرب القحطانية
(٣)العرب المستعربة: العرب المنحدرة من صلب إسماعيل وتسمي بالعرب العدنانية ودي الي منها سيدنا محمد (صلي الله عليه وسلم)

العرب بقي كان أصل ديانتهم دين إبراهيم بس اتحرف طبعا وبقو بيتعاملو مع الآلهة انها حاجه بتقربهم من ربنا لحد مبقو بيعبدوها  وأمثلة الأصنام كتير زي" اللات، العزى، مناة ودا وسواعا ويغوث ويعوق ونسرا لدرجة إن سيدنا محمد ﷺ لما فتح مكة لقى 360صنم!! وفضل يطعنها لحد متساقطت ثم أمر بإخراجها من المسجد وحرقوها

•••••••••

 
واقعة الفيل ع السريع كدا
كان فيه واحد اسمه أبرهة الصباح الحبشي ده كان النائب العام للنجاشي ف اليمن
لما لقي العرب يحجون الكعبة وانها بالنسبالهم حاجه عظيمة جدا
راح بنى كنيسة كبيرة بصنعاء عشان العرب يركزو مع الكنيسة ويتجاهلو الكعبة وكدا
ففي واحد من بني كنانة سمع الحوار ده راح للكنيسة ولطخها بالعذرة
لما أبرهة عرف اتغاظ قوي وراح مجمع جيش عبارة عن٦٠الف جندي انت متخيل!!
وراحوا للكعبة عشان يهدموها وأخد فيله بقي وكان عددهم ٩ وفي ناس تقول١٣ وهو رايح للكعبة الفيل بتاعه جه عن عند المزدلفة وقعد ومكنش راضي يتحرك
وكان بيتحرك ف اي اتجاه الا اتجاه الكعبة (سبحان الله)
وربنا وقتها أرسل طيرا أبابيل بترميهم بحجارة كدا قد حبة الحمص بس لما بتنزل علي اي حاجه تفتتها
وكل طائر كان معاه تلت حجارات
واحد ف منقاره واتنين في رجله
أبرهة ربنا وقتها أرسل عليه داء بسببه تساقطت انامله وبقي عامل زي الفراخ وبعد كدا انصدع قلبه عن صدره من ثم هلك (مات) وربنا نزل فيه سورة الفيل

بًسِمً آلَلَهّ آلَرحًمًنِ آلَرحًيَمً
(أَلَمْ تَرَ كَيْفَ فَعَلَ رَبُّكَ بِأَصْحَابِ الْفِيلِ-أَلَمْ يَجْعَلْ كَيْدَهُمْ فِي تَضْلِيلٍ- وَأَرْسَلَ عَلَيْهِمْ طَيْرًا أَبَابِيلَ  - تَرْمِيهِم بِحِجَارَةٍ مِّن سِجِّيلٍ-فَجَعَلَهُمْ كَعَصْفٍ مَّأْكُولٍ )

صّدٍقُ آلَلَهّ آلَعٌظُيَمً

•