خـلُفَ آلُآبْۆآبْ آلُمغلُقہ

خلف الابواب المغلقه 7

#خلف_الابواب_المغلقه7
بقلمي  : مشاعر مبعثره

اقعدو مع بعض اتناقشو في الموضوع واعرفو احتياجاتكم انتو م اتزوجتو عشان الاولاد بس حتى انتو الاتنين محتاجين بعض ما بقدر اقول لك اكتر من كدا.
تاني ما فتحت معانا السيره وخلتنا على راحتنا قضت فترة حلوة شديد معانا ، ومهيلم اتعلم المشي على يدها ، وكان متعلق بها شديد  ، مرات بنوم معاها  ، والله لمن جات ماشه كلنا بكينا بدموعنا ، انا حضنتها ذي التقول امي باست راسي وانا في حضنا وابتسمت لي  .
ما تنسي الكلام القلتو لك ، انتو الاتنين شباب ومتزوجين على سنة الله ورسوله ، اي حاجه تحصل بينكم حلال وما تحاسبي نفسك عليها ، الكبت دا بولد الجفاء والبعاد ، حاولو اقعدو واتكلمو.
  : بس انا وضحت لك السبب.
  : والقال لك منو هو ما عاوز؟ امكن هو زاتو بفكر بنفس طريقتك !! دي نصيحه مني اقعدو واتفاهمو .
ما وقفت عشان تسمع ردي واكتفت بانو تفتح عيونا لبعض لانها ما بتقدر تقولا بصراحه مشت وخلت لينا البيت مسيخ كل شويه نفقدا .
انا راسي بقى دائما مشغول وما قادره اوقف تفكير ، لو هو بالجد عمل كدا عشان خايف من ردة فعلي او منتظر مبادرة مني!! اعمل شنو في الحاله دي؟  افضل متهربه كدا؟؟
جاء عيد ميلاد هاني  ، وهو ما قصر عاد جاب لينا التورطه والزينه والهدايا اي زول اشترى له هديه ب اسمو حتى مهيلم😅
احتفلنا اليوم داك اصواتنا عاليه عاد والالعاب الناريه دي بالاشكال عزمنا سميره جارتنا برضو .
كان يوم مرهق ، والاولاد مشو نامو بدري من فرط التعب . فضلت انا بس مع النضافه .
ابو البنات بعد نام صحى تاني بحركتي وانا بنضف وارفع في الحاجات  .
قال لي  : خليه لبكرا الكلام دا والبنات بساعدوك.
: لالا ما بقدر انوم مرتاحه كدا  ، بكرا حاتظهر شغله جديده احسن اخلص اسي.
قعد ينضف معاي لمن خلصنا.
قمت ماشه وقلت له تصبح على خير قال لي  : استني!
وقفت ، جاني شايل صندوق بتاع هدايا!! ملفوف بطريقه حلوة مداه لي  ، وانا مستغربه ، مسكتو فتحتو لقيت فيه تلفون جديد كمان🤩
قلت له  : ليه التعب دا انا عندي تلفون.
: داك صغير وما بدخلك النت وعشان تطمني على اهلك كمان صورة وصوت.
سكت مسافه وقلت له  : شكرا لك بالجد وربنا يقدرني على جزاك.
: تاني رجعنا لشكرا والكلام العبيط دا  ، انا زوجك افهمي يعني اي حاجه اعملا عشانك تعتبر واجب ، تاني م اسمعك تقولي شكرا دي ولا ح ازعل منك.
: لالا ، ما تزعل خلاص.
: يلا على النوم تصبحي على خير.
: وانت من أهلو.
مشيت في ليلي داك شحنتو ودخلت فيه شريحتي ونزلت كل التطبيقات الشبكه كانت فل ولقيت سميره كمان ضفتها ، التلفون دا فرق لي شديد وبقيت اعرف الاخبار زاتو.
طبعا الناس السكنو في البيت الكنت مؤجراه ما عندهم علاقه بأي زول  ، ولا بنشوفهم زاتو الا بالصدف  ، عندهم ولد شاب كدا انا شفتو يوم طردونا داك  ، يلا دا الوحيد البشوفو داخل مارق الصباح والعصر ما بعرفو شغال شنو.
مره طلعت بليل اقفل الباب ، ابو البنات كان في الشغل شفت مرا كبيره كدا داخله ومعاها طفل في يدها سلمت عليها ما ردت لي لمن استغربت ، بعد يومين برضو مع اذان الصبح شفت واحده طالعه.
حكيت لسميرة جارتي قالت لي : انا زاتي شايفه الحاصل ، الناس ديل شكلهم عددهم كبير وبستقبلو اهلهم البجو نازحين برضو، قلت لها  : بس ما قاعده اسمع لهم  صوت وجوطه بالعكس هادئين شديد.
: احتمال ما عاوزين سيد البيت يعرف ويطردهم ولا يزيد الايجار اصلو شراني.
: بس ديل قرايبو.
: قرايب شنو يا اختي انتي صدقتي؟ دي كذبه اخترعا عشان يطلعك بس، ولا اهلو ولا بعرفهم وانا متأكدة بكون مؤجر لهم بسعر خرافي.
: الله يجازيه ياخ الناس بقت بتستقل الازمات ، اسي تلقيهم عايشين في ضيق وكرب.
: الله يفرج عليهم
بليل حكيت لنزار وقلت له  : انا بفكر نديهم باقي الاكل البفضل عندنا عددهم كبير واكيد محتاجين.
ابتسم وقال لي  : اعملي البتشوفيه مناسب.
تاني ما كتر معاي، وانا فعلا شلت عيش وباقي ملاح رفعتو لهم جاتني بنت فتاة ولمن مديتهم لها وقالت لي  : ديل لشنو؟
قلت لها : دا اكل فضل مننا وخايفاه يبوظ.
قالت لي : شكرا  ، وشالتو ومشت.
ما شفت بالفرحه في وشا ، ولا حتى حسيتا انبسطت يعني ما عارفه جاني احساس انو هي ما مهتمه.
واتفجأت الصباح بكيس العيش مرمي في  الشارع  مع الوسخ وكمان الملاح!!!
طبعا هم برمو الفضلات السائله بتاعتهم في الشارع ساي.
انا زعلت زعل وحكيت لسميره قالت لي  : انتي اصلا ما عندك موضوع بس ، مالك ومالهم  .
: والله حبيت اساعد بس  ، م اتوقعت يعملو كدا يعني بقولو لي نحن ما محتاجين!!! طيب ما كانو ياخدوه مني اصلا.
اتزكرت حركاتي العملتا زمان وندمت عليها بعد حسيت بنفس الاحساس الانا حسستو ل ليان وابوها وقتها، صحي الدنيا دواره.
ابو البنات لمن جاء راجع من المستشفى  ، شاف الاكل في الشارع انزعج شديد  ، لاحظت له من دخل متضايق  ، بعد اديتو المويه جيت قعدت جنبو وقلت له  : مالك
قال لي  : والله الناس السكنو جنبنا ديل ما عندهم احترام للنعمه ابدا!! ياخ اتخيلي رامين كيس عيش في نص الشارع ومكشوح فيه ملاح!! اسي لو ادوه لزول محتاج مالو يعني؟  دي زاتا من اسباب زوال النعمه والغضب الرباني على البشر. غايتو الحرب دي كشفت مواجع  وبلاوي كتيره في المجتمع  دا.
قلت له  : دا الاكل الرفعتو لهم انا امس.
ابتسم بسخريه وقال لي  : اصلو م استغربت التصرف دا منهم، انا بكرا بتكلم معاهم بخصوص الوسخ البرموه في الشارع دا  . لانو بضر بصحتنا كلنا  ، والا لامي الذباب والحشرات.
قلت له  : انا زاتي بمشي اشوف ست البيت دي واتكلم معاها  ، لو ما عاوزه حاجه من الناس ما تشيل من البدايه.
قال لي  : لالا ما تعملي كدا ولا تديهم اي اهتمام ، بصراحه يا سمر انا قبلك حاولت اساعدهم بطريقه غير مباشره يعني بخت لهم شوال دقيق ولا كيس خدار  ، بلقاهم  خلوه في مكانو  للكلاب  ، الاكتشفتو انو الناس ديل فعلا ما محتاجين  ، ولدهم بفك دولار في السوق ، وبشوفو في البنك بصرف مبالغ ضخمه عديل شكلو برسلو له.
قلت له  : كرعلي ما يكون دعامي؟ 😱😱😱
قعد يضحك وقال لي : لالا م اظن ، بالك مشى بعيد.
: طيب ليه ما حكيت لي من البدايه؟ خليتني اتعرضت للأحراج ساي.
: اسف والله  ، ما بحب اكون سبب في منع المساعده من زول وقلت اخليك تجربي امكن يقبلو منك .
: والله دي قصه عجيبه ، عشان كدا قدرو يأجرو من الراجل الطماع دا.
مهيلم كان ببكي جات ليان جابتو لي قلت لها : كان تخليه انا اصلا جاياه.
ابوها قال لها انتي لسه ما اتعودتي تسكتيه يعني؟؟ 
: بسكتو بس لمن يصحى من النوم ما بتفاهم تاني.
قام هو شالو وبقى ماشي جاي به قال ل ليان : امشي نومي انتي.
مشت ، وانا قمت اخدو منو رفض.
قلت له  : ح بتعبك ساي ، جيبو لي انومو وانت زاتك نوم بتكون تعبان من الشغل .
: الزمن بدري اقعدي هدا سكت زاتو.
وفعلا هو سكت وقعد يلعب كمان  ، يقيف على حيلو في السرير ويمشي وهو بتمايل لمن  يقرب يقع.
نحن بس في وضع الاستعداد  ، مره امسكو انا ومره ابو ليان لمن تعب ونام.
: واخيرا ، والله انا تعبت اكتر منو.
: بس ما تقولي لي عاوزه تنومي؟
هزيت راسي قال لي  : الزمن بدري وبكرا الجمعه مافي شغل من الصباح تعالي خلينا نحضر فيلم 📽
: بس الاولاد بكونو نامو.
سكت مسافه وقال لي : يعني الا يكونو معانا الاولاد؟ خلينا نحضر حاجه نحن الاتنين برانا .
صلح مهيلم في السرير غطاه وقال لي  : يلا تعالي نطلع براحه ما نصحيه.
: كدا كدا ح يصحى لمن اجي اوديه ينوم.
رفع حاجبو وقال لي  : امكن انا عاوز استضيفكم في غرفتي الليله.
لمن قال كدا انا حيلي برد وما عارفت ارد له بشنو طلع قدامي وقال لي   : يلا تعالي.
مشى شغل التلفزيون بصوت واطي وقعد في الكنبه ، قعدت جنبو ومحافظه على مسافه بيننا.
كان فيلم اكشن وهو مندمج معاه شديد وشغالين نعلق وفي نفس الوقت نتونس ، لحدي ما قلب عاطفي والبطل اعترف بحبو للبطله ، انا خفت يجيبو مشهد ما تمام قمت رقدت على يد الكرسي ، وغمضت عيوني  لمن قربت اغفى ، وهو متابع لمن الفيلم انتهى ، بقيت سامعاه بصحي فيني.
: يا سمر يا سمر
.
ما رديت له مع اني صاحيه فجاءة حسيت به بقى قريب مني شديد ، ما حصل اي تلامس بس حاسه به وحتى شامه عطرو وسامعه صوت نفسو ، ما بعرف هو لأي مدى كان قريب  ، فضل فتره طويله في الحاله دي بعداك شالني ، وانا لسه مغمضه عيوني ومدعيه النوم وقف مسافه في نص الصاله وانا خوفي ياخدني على غرفتو ذي ما قال حابي يستضيفنا  ، وفي نفس اللحظه ما قادرة اقوم واعلق بعد ادعيت النوم  ، كنت سامعه صوت ضربات قلبو ما منتظمه ، ومرات يديه بترجف
في النهايه وداني غرفة البنات سريري مفرش جاهز  ، ختاني ومشى جاب لي مهيلم رقدو جنبي باس جبينو وطلع.
بعداك انا فتحت عيوني  ، تاني ما نمت للصباح افكر واطرح على نفسي اسئلة صعبه.
الراجل دا فهمو شنو؟ وعلاقتنا حاتصل لوين بعد التطور دا؟
لو الحرب انتهت اعمل شنو؟ اتطلق وارجع لحياتي القديمه ولا افضل على  زمتو؟ 
طيب لو قررت امشي ، هو حايكون شعورو شنو؟ والبنات بعد شافو فيني امهم.
اول مره ادرك انو العلاقه  النحن فيها دي مبهمه شديد  ، وما معروف نهايتا شنو ، حكاية انو نقعد كدا ذي الاغراب شايفاها حاجه مؤقته وما ح تستمر  بس حاتنتهي بشنو؟

بقيت دائما في حالة شرود وتوتر مرات بنسى الاكل اخليه يحرق عديل وانا في قدامو لمن الاولاد لاحظو لي.
وسميره زاتا حست وبتسألني ليه  ما قاعده اتحنن واتجيه وكدا افتكرت انو في مشكله بيننا طوالي  حكيت لها الحاصل كلو قعدت تضحك
قالت لي  : معقول ياخ الا نسيبتك تحسسك؟
  : انتي فهمتي شنو من كلامي؟
  : الفهمتو انو انتي ما عندك موضوع ، وقليلة حيله ، ياخ افرضي ما عاوز عديل انتي تخليه كدا؟؟
  : كدا كيف؟ 🤨
  : يا سمر يا هبله الراجل دا لسه شاب ، واكيد عندو رغبات حتى لو م اظهرا قدامك هي موجوده ، يعني يرضيك انو يعاين برا؟؟ 
: بس الراجل دا عايش قريب الخمسه سنوات وحيد وما حصل فكر حتى يتزوج خلي يغلط .
: انتي ما كنتي موجوده زمان ، بس حاليا انتي قدامو وحلالو وما قادر يطولك ، امكن يكون في حاجات متمنيها معاك لمن ما يلقاها يفتشا برا.
   ختيت يدي في صدري وقلت لها  : برا كيف؟😱
قالت لي  : ي اختي الرجال ديل وااااحد ما تقولي لي بضمنو وما بعملا والله شيوخ عملوها اياك ثم اياك تضمني راجل .

يتبع