خـلُفَ آلُآبْۆآبْ آلُمغلُقہ

خلف الابواب المغلقه 4

اسي ي بابا لو جبت لينا مرا تغسل لينا ملابسنا م احسن من استاذه ما بنفهم منها شي؟؟💔
: لا يا بنتي اوعا تقولي كلام ذي دا، ربنا وصى بالجار، وانتي عارفه جارتنا مستحيل تقبل بالمساعده الماليه فدي واحده من الطرق وانا والله يا بنتي ما بقدر انوم بليل، ولا اكل حاجه وعارف انو جيراني جعانين وما قادرين ينومو من الحر والالم والجوع.
انا انصدمت طبعا بالسمعتو دا ووقفت في مكاني بس مهيلم قعد يطلع صوت طوالي رجعت فتحت الباب وقفلتو عشان يقولو يداب جايه هم سكتو اول ما سمعو صوت الباب، اتصرفت معاهم عادي ودرست البنات،  كل م اسألهم فهمتو؟ يقولو لي فاهمين وانا عارفه انهم ما فهمو شي.
اليوم كان جمعه وهو ما عندو شغل الصباح قيل في البيت، وانا طبخت لهم، لمن جيت ماشه ناداني عشان يديني قروش الحصه، طبعا بحاسبني بالاسبوع.
قلت له  : رجع قروشك يا جاري، انا م اتعودت اخد قروش ما بستحقا.
قلع عيونو  وقال لي : دا كلام شنو، كيف ما بتستحقيها؟
قلت له : انا قبيل سمعت كلامك مع لين، م اتجسست ولا اتنصت عليكم، بس اصواتكم كانت مسموعه وانا غلطي انو ما دقيت الباب.
طبعا هو انحرج شديد لمن غلبو الكلام قلت له : انت ما قصرت معانا، بس انا مستحيل اقبل ب انك تصرف علينا او تخادعني كدا؟ عارفه نفسي فاشله في اي شي.
: لا انتي م فاشله، بناتي هم الاتعودو على طريقة شرحي، وانو يتلقو المعلومه مني انا بالذات، حتى في المدرسه بجوني اعيد لهم الدروس، يعني ما نقص منك انتي والله.
  : طيب مدام كدا انا مافي فايده من شغلي، اخدع منو يعني.
  : سمر..........
  : انت مافي داعي تشفق علي ابو ليان، وما زعلانه منك بكفي الكلام السمعتو والمشاعر الوصلتني، انت انسان عظيم وانا ما بقدر على جزاك بس لا ما بقبل صدقه.
: طيب ح تعملي شنو؟ انا مستحيل اخليك تجوعي انتي واولادك.
ابتسمت وقلت له  : اعمل ذي ما قالت لين.
  : ما فاهمك.
  : انا بنفع اغسل ملابسكم اكتر من استاذه.
  : لالا لاطبعا غسيل شنو، انتي بتاخدي بكلام  طفله ذي دي.
  : بس هي معاها حق وانا ما عندي مشكله، الشغل ما عيب، لو سمحت!! لو عاوز تقدم لي المساعدة خليني اعمل الشي دا.
: لا ما بقبل يا جارتي، انتي خريجة جامعه وكنتي موظفه كيف تشتغلي في البيوت.
: الكلام دا ما صح يطلع من واحد زيك ، او بتقولو لي كمواساة ، هو الرسول صلى الله عليه وسلم.
  : عليه الصلاة والسلام.
  : كان شغال في الرعي ، انا شنو يعني؟ انا قبلت الصدقه ما اقبل الشغل الحلال؟؟
سكت قلت له  : لو عاوز تساعدني، اسمح لي بالشي دا، او خليني في حالي.
  : طيب يا جارتي انا معاك في كل خطوة وربنا يجزيك كل خير.
ابتسمت ومشيت.
من يوما بقيت اشتغل في بيتهم غسيل ومكوة ونضافه ولو انهم بساعدوني ، الحاجه دي كانت صعبه علي ما بس جسديا. لمن اتزكر اني كنت بقعد في المكتب ، وبتجي الفراشه تكنس تحت رجولي وتقدم لي الاكل والمويه ، بحس بحسرة وندم على حالي ، بس في نفس اللحظة بكون حاسه بالشرف ، وانو انا باكل من عرق جبيني ومكانة الفراشه ديك بتكبر في نظري اكتر واكتر .
انا اتعلقت شديد بالبنات ديل ، وبقيت احسهم بناتي ، وحتى هم اتعلقو بينا وبقينا ذي الاسره الواحده ، الغريبه انو الجيران الزمان ما كان عندهم زمن يسمعو صوت اولادي وهم ببكو من الجوع او حتى يعرفو نحن منو والحاصل بينا شنو  ، بقى عندهم زمن يتكلمو فينا ويحسبو عدد مرات زياراتنا لبعض وامكن بطعنو في شرفي وانا ما عارفه .
القروش بتاعة الغسيل دي ما كانت قدر حقت الحصه وانا ما راضيه اشيل من ابو ليان اكتر من حقي ، لحدي ما جاء اول الشهر ، وانا ما عندي ، كل يوم الراجل سيد البيت يجي ينبذ ويهدد وقال لي انا محتاج البيت دا ، وانا ما حكيت لجاري لحدي ما يوم جاني سيد البيت وطردني بدون رحمه وبليل كمان ، ما عرفت اعمل شنو ، طلعني الشارع عديل ب أولادي وبجدع في عفشي ، قال انا اتجاوزت الفتره المتفقين عليها وهو عاوز يسكن قريبو في البيت دا .
وفعلا جو بدفارهم وشايلين العفش ، لمن قلت له يخليني ابيت  بس اليوم وبكرا اتصرف قال لي وهم يبيتو وين؟ دي جيتهم من الخرطوم .
ابو ليان ما كان قاعد، وشكلو بايت في المستشفى انا مشيت دقيت بابهم، جات لين فتحت لي قلت لها  : عليك الله تعالو شيلو حاجاتكم العندي ، الناس ديل رمو كل العفش في الشارع ودخلو البيت.
قالت لي : وانتو تمشو وين طيب بليل دا؟
قلت لها  : الله كريم .
هي طوالي مشت اتصلت ب ابوها ، جاء بسرعه ولمن شاف الحال دا اتشاكل مع سيد البيت وكان عاوز يضربو عديل الا حجزناهم، والجيران ديل يتفرجو قلت له يا ابو ليان الراجل ما غلط من بدري نبهني وانا اتجاوزت الفتره.
: بس ما من حقو يطردك كدا، القانون في صفك،
: دا في حال طلعني بدون انزار بس هو امهلني الوقت الكافي ونبهني على حكاية انو عاوز البيت.
: انا بدفع له.
طبعا هو رفض القروش وقال له بيننا اتفاق وانا ما عاوز اأجر تاني.
قلت له  : يا جاري خلاص خليهم هم زاتهم اسره وعندهم اطفال ويداب جايين من مناطق الصراع.
  : وانتي م عندك اطفال؟  يطردك بليل دا والله تبي.......
  : ما تحلف عليك الله انا زاتي مستحيل ارجع البيت دا بعد الفضيحه بمشي المدرسه اشوف لي مكان.
: مافي كلام ذي دا، نحن مشينا وين؟ تعالو ارقدو والصباح رباح.
لالا ماممكن انا.......
قاطعني : ما تقولي انا يلا ادخلي.
: انا مستحيل اقعد في بيتك انت راجل عايش براك وما عندك مرا.
صرخ فيني سمر انا زعلان منك بما فيه الكفايه ما تخليني اتصرف معاك تصرف غلط! يلا ادخلي بسرعه.
قعدت اعاين فيه، تاني نهرني
: ادخلي جوا يلا.😡
وقفت ارفع الحاجات مسكهم من يدي وقال لي ما عندك شغله بحاجة ما تجننيني في راسي دا يلا قدامي.
دخلت ب اولادي، وهو دخل العفش والحاجات المشتته في الشارع.
لقاني قاعده برا قلت له  : انا والله ما بقدر انوم في بيتك وانت؟؟
: مالي ماشي انوم معاك يعني؟ انا بنوم هنا في الحوش وانتي ادخلي مع البنات دي قصه يعني؟
: انا بالجد اسفه، والله العظيم ما قادره اعاين لك😣 سببت لك مشاكل كتيره من اتعرفنا.
: انتي كان المفروض تحكي لي، ليه تسكتي على موضوع ذي دا وتخليه يصل لهنا؟
: يعني عاوزني اطلب منك.
: ايوا تطلبي عنادك اسي نفعك بشنو وكبريائك يعني كدا احسن؟
قعدت ابكي وهو معصب شديد بس استغفر وقعد يمشي ويجي في النهايه قال لي : خلاص اسكتي ما تبكي ما حصل شي وانا بيتي مفتوح لك، ما تقولي عشان شي لو اي نازح جاني اسي دي انا بستقبلو في بيتي، يلا امشي ختي راسك في المخده ونومي.
مشيت لقيت ليان دخلت لي سرير في غرفتهم، قالت لي نومي هنا انتي ومهيلم، اما هاني وشادن واحد معاي وواحد مع لين.
لين قالت انا عاوزه شادن قبل كدا نمت معاها هاديه وما بترفس ذي هاني 😅😅.
قلت لهم  : هاني دا جيبو لي انا انتو بنات.
ليان قالت لي  : وهو قدر شنو يعني؟ عمر خمسه سنوات دا انا بنومو معاي.
: ليان  .
: ما تخافي يا خالتو بكرا بندخل تاني سرير اسي عشان الغرفه جايطه بس بعد نرتبا بتشيل اربعه سراير.
رقدنا وانا دمعتي في خدي، لين جات قعدت جنبي، انا انخلعت قالت لي انا لين.
قلت لها  : خايفه حبيبتي؟؟ تعالي نومي عند رجولي هنا.
: انا متمنيه نفضل كدا دايما، وانتو تعيشو معانا، مبسوطه شديد انو معانا زول في الغرفه، انتي عارفه اخر مره نمت مرتاحه متين؟
  : متين؟
  : يوم خليتي شادن بيتت عندنا انا برتاح بس يكون معاي زول في السرير، ان شاء الله طفل.
قمت حضنتها وبست راسا قلت لها اهلا بك في سريري.
: لالا انا ما بنوم معاكم، وما خايفه عشان معاي شادن، بس حبيت اقول لك كدا يا خالتو تصبحي على خير.
  : وانتي من اهلو حبيبتي.
اصبح الصباح قمت صليت، دخلت المطبخ عشان اعمل الشاي بس اتفجأت به جوا لمن انخلعت كان لابس تيشيرت وترينق عادي يعني ملابس بيت وانا اول مره اشوفو كدا، بقت لي حاجه غريبه وخجلت نزلت راسي🙈 وقلت له صباح الخير ي ابو ليان، ابتسم وقال لي صباح الخير ي ام هاني.
: دي جديده ولا شنو؟
  : والله انتي حاليا ما جارتي، وعشان على وزن ابو ليان 😏
  : صح.
كان بعمل في الشاي قلت له خليني اعملو.
: ياريت
بقى يوصف لي في الحاجات قلت له  : عندكم فرن؟
  : في تقريبا.
  : ههههه كيف تقريبا.
  : والله بتزكر اشتريتو قبل سنوات للمرحومه، ولاننا ما شغالين به حاجه ما بعرف اذا قاعد ولالا، خليني اشوف لك المخزن.
  : خلاص خلاص مافي داعي.
  : مافي داعي شنو مدام سألتي معناها عاوزه تعملي حاجه حلوة وانا نفسي دخلت فيها😁
  : هههه شفت الحليب والبيض والدقيق في الرفوف جاء على بالي اعمل لكم كيكه.
: يا سلام والله تكوني عملتي فايده بدل البسكويت وكيك الدكان الناشف دا، شوفي الناقص شنو اجيبو لك اسي دي.
قعدت اعاين
: اممممم فانيليا مافي وباكنج باودر.
: اسي اجيبهم لك من الدكان.
بعد مشى انا حاسبت نفسي البخليني اتصرف كدا شنو؟ فاكراه بيتي يعني؟
هو مشى بسرعه جاب لي الحاجات ومشى المخزن طلع لي الفرن ونضفو من الغبار.
عملت الكيكه، الاولاد صحو بريحتا وانبسطو شديد.
شربنا الشاي ونتونس ونضحك على حركات مهيلم وهو بحوم بين اخوانو ويلخبط ويكشح كباية دا ويقلع كيكة دا لمن انهرو ابو ليان يقول لي اوعك تسأليه خليه يعملو كل العاوزو.
انا  حسيت بدفا شديد وسطهم، جو العائله وإحساس الانتماء دا خلاني اتزكر حياتي القديمه وافقدا، لما كنت مع زوجي واولادي.
رفعت راسي لقيو هو زاتو بعاين لي، ابتسمت.
ليان قالت له  : والله يا بابا انا الليله حاسه اننا اسره واحده ، اب وام واولاد شعور حلو ياخ.
هو بقى شغال احم احم ذي الانشرق، امكن خاف يجاوبا بطريقه تجرحني.
انا طوالي  قلت لها  : نحن اصلا بقينا عائله من يوم اتعرفنا على بعض!!
قمت بعداك على النضافه، هو جاني قال لي : عاوزك تعتبري البيت دا بيتك' واي حاجه ناقصه اتصلي بي.
قلت له   : نحن لازم نتكلم الوضع دا........ 
قاطعتي : اششششش لا ما وقتو انا ماشي الشغل اتأخرت، خليني بعد اجي ونحكي، المهم طلعه من البيت مافي! دي افهميها  ، ولو طلعتي ح اعرف والحقك لاخر الدنيا.
قال كدا ومشى انا مارست طبيعتي في البيت، اصلا فيه غرفتين، واحده له وواحده لبناتو وصاله ومطبخ وحمامات، يعني ما كبير شديد وما عزبني في النضافه.
كان في غسيل غسلتو وكويت، جات عربية النضافه شلت الشوال بتاع الوسخ وطلعت به، شايفه الناس تعاين لي ساااي، حتى بتاع العربيه نظراتو ما عجبتني شكلو بجي طوالي واستغرب وجودي، وسيد الدكان من بعيد يعاين لي، حسيت ب احراج وخجل شديد قمت لبست ولبست اولادي وقاعده منتظره ابو ليان، من جاء بنتو مشت ادتو مويه واظنها حكت له.
انا مشيت له قبل ما يناديني، دقيت له الباب قال اتفضل من دخلت سلمت عليه و قلت له  : انت ما قصرت مننا والله العظيم، وعملت كل البتقدر عليه، ما عاوزاك تحس بتأنيب الضمير تجاهنا.
: المقدمه الطويله دي ليه؟؟.
: انا عاوزه امشي ما بقدر ابيت عندك تاني.
  : في حاجه حصلت  او زول ضايقك؟
  : لا بس الوضع النحن فيه دا ما مناسب، والناس بتعاين لينا بطريقه غلط.
  : ووين كانو لمن انتي محتاجه لهم؟ ما قدرو يقدمو لك حتى الكلمه الطيبه، اسي جايين يتكلمو فيك؟ ما عندك حاجه لزول! خليهم يتكلمو ويفترو والراجل يواجهني انا.
: طيب وانا ما فكرت في احساسي؟ انا عشت فتره طويله وحيده مع اولادي، عشت بشرفي ما حصل زول اتكلم فيني ولا جرحني بحرف، لاني محترمه نفسي! وبعد نزحت وضقت الحاجه ما فضل لي غير شرفي دا اوسخو؟؟؟
عاوز يتكلم قلت له : عارفاك راجل شريف وغرضك المساعدة، بس في النهايه انت راجل وانا مرا، ما من محارمك، فما ممكن نعيش تحت سقف واحد، لانو حرام ودي ما حاجه بنغيرا بطيب اخلاقنا واحترامنا لبعض.
نزل راسو وقال  : لي كلامك صح  .
: معناها يا جاري ما تمنعني، انا بشكرك جزيل الشكر وبتمنى يدوم التواصل بيننا.
  : حاتمشي وين.
  : اي مكان ارض الله واسعه.
اتحركت من قدامو كم خطوة، لمن وصلت الباب جاني صوتو مبحوح
: سمر!!
اتلفت عليه وقلت له : ايوا
قال لي : نحن ممكن نعيش مع بعض.
دخلت حواجبي في بعض وقلت له  : كيف نعيش مع بعض ونحن مافي علاقه بيننا؟
قال لي : اعقد عليك وتبقي زوجتي!!! في الحاله دي نحن ممكن نعيش كلنا مع بعض من غير م زول يتدخل فينا.
قلعت عيوني وقلت له بخلعه  : عاوز تتزوجني؟؟!!!!!!!

#خلف_الابواب_المغلقه_4
بقلمي  : مشاعر_مبعثره