أحببتك فى البعد
-أنا أسف بس أنا مش قادر أكمل يالينا.
- إنت بتقول ايه وازاي تفكر في كده أصلا يافريد.
صاح بقوة: بفكر في إيه يعنى ؟ إيه الغلط اللى قلته ؟ عاجبك حياتنا دى ؛ لا انتِ مبسوطة ولا أنا كمان ،يبقى ليه نكمل.
جلست على المقعد بقوة وقالت: بس ده صعب ،د طلاق مش حاجة سهلة .يمكن انت مبتفكرش كده لأنك راجل ،لكن أنا ست ومتجوزين يادوب بقالنا سنتين .
جلس بجوارها وأمسك يدها وهو ينظر لعيناها بحب وقال: وقبل السنتين دول كنا إيه يالينا ؟! أقولك أنا ،كنا ولاد العم اللى وهبوهم لبعض من صغرهم فبقى أمر واقع .لا انتِ عشت حياتك ولا أنا عشت حياتي .
إغرورقت عيناها بالدموع وقالت بصوت خافت:
إنت محبتنيش صح . أجابها بإبتسامة مريرة : ولا إنتِ حبتينى كزوج وحبيب. أومأ برأسه عندما رأى نظراتها التائهة وقال:
أيوه أنا بحبك جدااا بس كأختى اللى متربي معاها طول عمري وانتِ كمان نفس الحكاية ودليل كده ان مشاعرنا باردة ،مفيش لهفة العشاق ولا فرحة الحبيب بلقى حبيبه . أكمل بخجل : حتى فى لحظاتنا الخاصة يالينا بيبقى أكنه آداءواجب وبس .مبحسكيش ملهوفة عليّ ولا أنا بحس بالمتعة اللى بسمع عنها لأننا ببساطة مفيش بينا الحب ده . أه بنحب بعض بس كإخوات عايشين طول عمرهم مع بعض كل الفرق ان بدل ما كل واحد بينام لوحده بقى لينا سرير مشترك.
وقف وقال بحزن: مش دى الحياة اللى أنا عايزها ولا دى الحياة اللى عايزك تعيشيها . يالينا أنا حاولت وانت كمان حاولت ومحدش فينا قدر. يمكن لو كنا اختارنا بعض بإرادتنا كنا حاولنا ،بس لأن الحياة دى مفروضة علينا فاحنا عايشين وخلاص.
إقترب منها مرة أخرى وقال: أنا عارف انه صعب بس الأصعب إننا نعيش زى الأموات كده ولما تفضل علاقتنا كإخوات وولاد عم أحسن مانخسر بعض حتى كزوجين .وبما إنى الراجل فلازم أنا اللى آخد القرار وأواجهه .
نظرت إليه وأنا ابكي فكلامه رغم قسوته الا أنه صحيح تماما حتى أنني شعرت براحة كبيرة عندما قاله . ولكن كيف سواجه الجميع وكأنه قرأ افكاري فقال: بصي يالينا ،أنا عندي عرض شغل بره فأنا هقبله وهقولهم أنى هسافر ومش هقدر أربطك معايا لأنك رافضة السفر ومش عايزة تبعدى عنهم وساعتها هطلقك وكده كل الحق هيجي عليّ أنا مش عليكي تمام .
أومأت بالموافقة دون كلام . سحبني لأحضانه وقبل رأسي ويدي وهو يقول : انت تستاهلى حد يحب لينا عشان خاطر لينا لأنها تتحب،وصدقينى يمكن اجبارنا على حياتنا هو اللى مخلاش فيه فرصة للحب ده، لأن ربنا خلقنا حريين ومن حقنا نختار فلما حد يضغط علينا ساعتها بنكره نفسها ونكره الشئ اللى انجبرنا عليه حتى لو كله مميزات.
