" ابقي اعملي إللى انتي عاوزاه فى بيت جوزك "
كلمه سمعتها طول عمري وانا فى بيت اهلي، كل ما اطلب طلب يتأجل لما اتجوز ،
- عاوزه أقص شعري واغير لونه؟
- لما تتجوزي ابقي قصيه فى بيت جوزك
- عاوزه اسافر مع اصحابي الاقصر وأسوان
- اما تتجوزي سافري مع جوزك
- عاوزه اغير فى ستايل لبسي ؟
- لما تتجوزي ابقي غيري ان شالله تمشي من غير
هدوم
- عاوزه اجرب الينسز والبريسينج
- لجوزك .. ابقي اعملي كده لجوزك
وحاجات كتير كنت اطلبها كانت بتتأجل لبعد الجواز
مع الوقت حسيت ان الجواز دا زى مغارة " على بابا " هلقي الكنز إللى هيغيرلي حياتي مبقتش اطلب وبقيت أحلم واستني اليوم إللى هتجوز فيه إللى معاه مفتاح مغارة " على بابا " ..
فى الجامعه كان معايا فى دفعتي ولد اسمه " كريم " كانت بيحاول يقرب مني وانا بصده إستغربت من إصراره :
- عاوز ايه يا كريم ؟
- انا بحبك يا امل ..
- وبعدين بعد الحب ايه هتقضيه مع بعض يومين فى الجامعه وبس
- انا قررت اتقدملك بعد الإمتحانات
كانت آخر سنه فى الجامعه وللحظه فكرت ( هل ممكن يكون دا إللى معاه مفتاح المغاره ) انا لقيت نفسي مبفكرش انا حبيته ولا لا اكتر من هل دا هيحققلي احلامي المؤجله انا مكنتش بحب ارتبط لانه مينفعش ارتبط بغير إللى هيخطبني دايما كنت بسمعها مينفعش تعرفي حد غير جوزك مين جوزي دا واعرفه منين كان رد جدتي ( النصيب هيصيبك ) ..
كتبتله رقم بابا ومشيت ..
بعد إمتحاناتي بيومين اتصل وحدد ميعاد وقابل بابا ومشي ، لقيت ملامحهم مش سعيده وبابا بصلي وقالي :
- ايه رايك يا امل ؟
تدخلت ماما بسرعه : رأيها ايه دا لسه متخرج وقدامه جيش وهيدور ع شغل وبيقول هيشوف شقه ع قده لسه جه بس علشان يخطب من غير ما يكون جاهز ..
- يعني ايه مش فاهم؟
- طبعا مش موافقين ولا انتي موافقه يا امل
- انا مش عارفه عن اذنكم ..
دخلت الاوضه ومش عارفه اقول ايه كان " كريم " بعتلي رساله وبيقولي انه بيحبني مهما حصل مفيش بنت ع وجه الأرض قلبها مبيتحركش لما حد يقولها انه معجب وبيحبها حتي لو هى مش بتحبه إحساس انها مرغوبه وبيفكر فيها بيحسسها إحساس حلو ..
دخلت ماما الاوضه وسيبت الموبايل :
- اموله حبيبة ماما بتكلمي حد
- لا كنت بقلب كده
- دخلتي أوضتك من غير ما تقوليلي رايك ؟
- ماهو ..
قاطعتني : انت شايفه ان كريم هيحققلك إللى نفسك فيه، هيقدر يعيشك حياه إللى بتحلمي بيها ..
- مش عارفه ..
- هو ايه إللى مش عارفه يا امل دا لسه فى الاول وقدامه سنين علشان يقول هبدء اهو ..
- يعني ايه ؟
- إنتي بتحبيه ؟
سكت لحظه : عادي ..
- أن شاء الله ربنا يرزقك بحد يعيشك حياه كويسه إللى انتي بتحلمي بيها
خرجت ماما وفكرت هو هيحققلي احلامي ازاى
انا بحب احلامي اكتر
اترفض كريم وبعد كريم اتقدم كذا عريس وكنت مش عارفه اقرر انا اعرف منين انه هيحققلي كل إللى نفسي فيه لكن كنت متاكده ان اهلي هما إللى يعرفوا ودا كان مطمني
جارتي " ندي " كانت صاحبتي الوحيده فى العماره إللى عمرنا قد بعض والوحيده إللى أهلي كانوا بيوافقوا اروح ليها وهي تجيلي كان ليها أخ اسمه " رضا " وكان بيسافر كتير طبيعه شغله كان كلامي خفيف مع " رضا " وفى مره اتفاجئت ب ماما دخلت اوضتي وشها كان مبتسم:
- اموله حبيبه ماما..
- ايوه ..
- ليكي عندي خبر احلي خبر ..
- خير ..
- رضا اتقدملك طلب ايدك ايه رايك ؟
اتفاجئت لاني كنت مستبعده انه يحصل ..
- ها ..
- ها ايه رايك ؟
- انتوا شايفين ايه ؟
- شايفين انه انسان كويس ومحترم وابن حلال ومش هنلاقي احسن منه ليكي
إبتسمت ابتسامه خجل : يبقي موافقه نحدد ميعاد الخطوبه
فرحت زى اى بنت بتفرح لما تتخطب وحسيت ان رضا هيحققلي كل احلامي المؤجله عملنا الخطوبه ورضا كان فى منتهي اللطف معايا ومطولتش ٥ شهور كنا بنجهز الشقه ونزلنا نختار الفرش انا كنت محدده عاوزه ايه ومجهزه روحنا محل واختارت :
ماما : ايه دا ودا ينفع فرش عروسه ؟
- ايوه يا ماما عاجبني
- بس مش عاجبني ابوكي يدفع فلوس فى حاجه عدله مش تافهه كده ..
- ماما دى شقتي
- ودا فلوس ابوكي؟ لما تتجوزي ابقي غيري الفرش براحتك
يعني نفس الجمله لما تتجوزي
رضا حجز اوضه النوم وكانت حلوه رغم ماما مكنتش عجباها هى وبابا لكن رضا حس انها عجباني اتمسك بيها ع رأي المثل بفلوسي اعمل إللى عاوزاه واتجوزنا عملت فرح بس من زى ما احلامي لاني متفقتش ع اى حاجه انا اتفجئت وشقه قريبه من اهلي نفس المساحه والفرش كان جميل هو اه مأخترتش بس اهلي إللى اختاروا مع أهل رضا وفرشوا الشقه ؛ مسافريناش شهر العسل علشان شغل " رضا " نزل بعد يومين جواز ..
- معلش يا حبيببتي والله انا هعوضك
- لا ولا يهمك ..
اخد اجازه من شغله وبعد ما اتغدينا:
- ليكي عندي مفاجاءه
- خير
- هنقضي اسبوع فى الاسكندريه تعويض عن شهر العسل
اتفاجئت : اسكندريه .. اسكندريه ايه ؟! انا كنت عاوزه اروح شرم او دهب فى شهر العسل ..
- اسكندريه ؟
- ايوه.. حجزت فى فندق ع البحر هيعجبك اوي
- بس .. انا مش عاوزه اروح اسكندريه ؟
- اومال ايه ؟
- يعني شرم .. دهب كده يعني ..
- أن شاء الله نبقي نروحهم خلينا فى اسكندريه دلوقتي..
- تمام ..
سافرنا اسكندريه ورضا كان سعيد جدا لكن انا مكنتش مبسوطه مش المكان دا الل حلمت اروحه مع جوزى حاولت ابين ان انا مبسوطه دا اسبوع هيمر بسرعه مش هعيش هنا ..
مر اسبوع ورجعنا بيتنا ،
- رضا ..
- ايوه ..
- عاوزه اقص شعري واغير اللون
بصلي ب استغراب : وهتقصيه لفين ؟
شاورت لودني : لودنك .. ؟
-- ايوه .. كان نفسي اوي اعمل كده وجت الفرصه
- يعني أهلك مكنوش راضيين
- لا بصراحه ..
- بس انتي بالشعر الطويل احلي
- انت شوفتني بشعري القصير علشان تحكم
- لا تخيلتك وبعدين وشك حلو عليه الشعر الطويل
- وأنا عاوزه اقصه
- طيب قصيه اطول شويا ع الاقل لكتفك علشان متزعليش انك قصيتي كل دا
- لا مش هزعل علشان انا عاوزه كده
كنت مصممه : براحتك
سابني وقام وكان باين انه زعلان لانه بيحب الشعر الطويل لكن مركزتش فى زعله وفرحت ان خلاص هقص شعري حاجه عاوزاها وهعملها تاني يوم روحت الكوافير وقصيت شعري بمنتهي الفرحه..
شكلي أتغير لكن عملت حاجه كنت بحلم بيها .. رجعت البيت كان رضا قاعد :
- ها ايه رايك ؟
بصلي ب إستغراب وكان واضح انه مش عجبه :
- عملتي إللى انتى عاوزاه
- آه ايه رايك ؟
- المهم انك مبسوطه .. انا نازل شويا
سابني ومشي وانا مسكت الموبيل اتصورت وبعتها ل أهلي وأصحابي كان فى عجبهم والاغلبيه زعل ع شعري الطويل زى رضا..
