نهار تاني كانو ناضو لبسو حوايجهم ومشاو مع فريد لكوميسارية حتى جابو لها لاكارط ورجعهم من جديد حتى لدار .. طلعو فدروج تالبيت هدى وجلسو مجمعين
هدى : ( بدلات حوايجها بابيجامة مقطنة وسخونة ) نجيب لفطور لبيت نفطرو ؟ مي جات عندها لبنت لي كدير لها ترويض ومشات ورجعات تاني نعسات عطيتها دوليبران دارها راسها
بسمة : ( ناضت وفيديها لاكارط مزيرة عليها ) انا نوض نعاونك
هدى : ( تاجهات جيهة لباب ) لالا غا گلسي هنا جايا
خرجات وخلاتها مسرحة فوق ناموسية وكتشوف فلاكارط بابتسامة واسعة
بسمة : ( زيرات عليها بيديها وتنهدات ) وأخيرا غانتهنا منك لاكارط او تقادات خاص غير توصلو دعوة طلاق وديك ساع محكمة بيناتنا
بعد دقائق دخلات هدى جارة طبلة وحطاتها فوسط لبيت وجابت كراسة كبار وبعدها حطات لفطور
هدى : ( ضحكات من قلبها على حالها ) حطي لاكارط تنفس شوية راك غاتهرسيها ههه
بسمة : ( دغيا طلقاتها من يديها تخلعات لا تهرس بصح ) لا صافي اختي هاهيا حطيتها تهرس نعواج ليك هنا !
هدى : ( كحزات لها كاس عصير دليمون ) شربي هدا يرجع فيك لون راه وليتي صفرة .. وراه مباردش محطيتوش فثلاجة
بداو كيفطرو وفنفس لوقت مجمعين وكيضحكو حتى سمعات هدى تلفونها كيصوني .. ناضت حتى جابتو ورجعات بلاصتها
هدى : ( يلاه كانت غاتجاوب وتقطع الخط وفنفس لوقت وصلها ميساج فواتساب وقراتو ) هدى راه راجل ديك لبنت وصلاتو دعوة ديال طلاق هاد صباح
بسمة : ( هزات فيها عينيها متفاجئة ) دغيا ؟
هدى : ( هزات فيها عينيها بفرحة ) مبروك ازين مابقا قد مافات هاهو وصلاتو والجلسة لولة ديالك معاه فالمحكمة قريبة أنا غانسول فريد إمتا وإن شاء الله تفكي منو دغيا بلا مشاكل
بسمة : ( حطات يديها على قلبها كدعي وتعاود وتحمد ربي وتشكرو ) حمد الله حمد الله والله مامتيقة غانتفك منو دغيا ( سكتات لثواني كتفكر ) خايفة غير يتعكس فالمحكمة ولا يسيق لخبار انني جالسة معاكم ويحيح عليكم حدا دار
هدى : ( ضحكات من قلبها وشدات كاس دلقهوة بالحليب سخون كترشف منو ) لا بغا يموت غايديرها إلا مقتلو صلاح عصا وعلقو قدام باب دارو أجي عكري ليا ههههه
بسمة : ( عقدات حجبانها ) أويلي نجبد ليكم صداع بسبابي يدابز خوك معاه
هدى : ( بتاسمات على هضرتها عارفة خوها ميحطش گاع فيه يديه يصايفت ليه غير لي قتلو عصا ) فطري فطري خلينا من سيرتو غا....
باقي حتى ماكملات هضرتها تسمع صوت لباب دبرا كيتضرب بجهد
هدى : ( خرجات عينيها من هاد صوت معرفاتش شكون غايكون داير هاد لحالة ولباب عندهم عمر وصل ليه شي حد ولا دق فيه محاساك هاد دقان فحال دلبوليس ! ) اويلي شهادشي
