#الحقيقة المرة هي أن ترى الحقيقة لكن لا تصدقها #
انا كل ماهو ممنوع مرغوب تبنات شخصيتي على هذي القاعدة كلما تقولوا سرين اتفكروها مكنتش هذاك الجمال الفاتن اما كنت هذاك الحضور الطاغي، وعلى عكس بنات بزاف كنت نمثل النقيض المحرم مرانيش نزوخ بروحي ولكن كان يخليني نحس بسعادة كبيرة، رايحين تقولوا كيفاش ولكن السعادة عمرك متلقاها من طبق من ذهب انت لي تصنعها والعكس صحيح، رايحا نوصفلكم روحي انا جاية شابة وجذابة أما مش لدرجة شابة بزااااف لي كي يشوفوها يغمى عليهم (وبيناتنا جماعة انا نكره النوع تع الكورنيك لي تكون فيه البطلة هي أجمل مخلوق ومتكاملة من كلش ونفس الشي للبطل نحس بالتفاهة كي نقراها)، متوسطة الطول ماني جاية سمينة ولا رقيقة طاي مرسومة شعري كحل وطويل وعينيا كبار ومشفرين ومكحلين وبيضا عندي شويا نمش وخدودي وفمي احمر من عند ربي ووجهي جاي مدور
مسرارة انا هكذا نشوف روحي بالنسبة لشخصيتي رايحا نخليكم تعرفوا عليها في الكورنيك نقرا في المدرسة العليا للإدارة عمري 19 سنة كلشي بذا من هاذيك لحضة:
كنت راڨدة في رحمة ربي حتى حسيت بالقوات المسلحة قدامي وڨاعدا توجه في سلاحها علي أوووووب آآآآآآ
_ ياربي كاش دعوة شر خرجتلي فيك، نوضك كي الناس ماتنوضيش نوضييي يا الهم راكي روطار
_يما اني نوضت متعيطيش برك،
_كيفاااش، هذا كل من هذاك الثيليفون نهار كامل ونتي عڨابوا
_يما وش دخل الثيليفون دوركا كل مشكل دخليه هو في النص وزيد العجب مايعجبك
علابالك أحلامي بسيطة ولي هي مدخليش وليدي برك في النص
_نوضي رايحا تهبلني، خوك قالك نص ساعة تكوني قدامي
_
اووه مانيش باغيا نروح للكور مراكييش تشوفي فيا عيانة.
_نص ساعة نلقاك قدامي
نضت على سعدي المسود، مانيش حايبا نڨابل وجه الشر تع البروف ولكل ساعات تحكمني حالتي منحبش نڨابل واحد 😅😅نضت غسلت وجهي وسناني لبست سروال نواغ وتريكو تع صوف نواغ وفاست نواغ وبوتس نواغ (ضربت كلشي نواغ) وشعري طلقتوا وحطيتلو باغث ذهبي حطيت غلوز وماسكرا ومشطت حواجبي وخرجت منحبش نكتر (كوني على طبيعتك سيدتي تكوني اجمل✨)
_مولاتي كون زدتي قعدتي خير، هذا خويا الكبير واسمو ياسر أكثر واحد نحبوا حنين ومدللني علخر اما عصبي ما يضويش عمروا29 سنة وشباب البنات الكل طايحين فيه جاي خمري وعينيه ڨري وشعرو جاي كيرلي ويخدم مهندس معماري
ضحكتلوا ضحكة صفرا ديجا مورالي تحت الصفر
_هيا افطري رابيد، ديجا راني روطار بسبتك اني لتحت نسناك في الطونوبيل
جيت نحكي هبط خويا الوسطاني وسمو يانيس زل اما انا وهو كي القط والفار جامي تفاهمنا ولكان صرات اعرفوا فلسطين تحرت عمرو 22 يقرى ميكانيك
_وش هاذا لبسة
_وشبيها
_اسكتي خير منخبطك نكسرك
_يمااا
_أنعم وليدي (كون جيت انا تقولي وش تسحقي)
_يما وقتاه هاذي دير الحجاب
_يا ولدي بووه راهي مستورة
_يما اقعدي فكيلها العين، نسمع بيك درتي حاجة نكسرك بغلة (مفهمتش لي يسمع يقول راهي مصاحبا وتلبس الميني والمكياج يروح يرنك طول الوقت و هو عڨابي)
*بيانسور هذي الهدرة كامل في قلبي *
_نوضي مازلتي تاكلي ياربي على الطفلة المعوجة هاذي شوفتي كيفاه حتى خوك عاد يزعق
_انيي نايصة الماكلة كي عباد ربي مكليتهاش
_روحي كي تزوجي منعرف كيفاش ديري ووووووو نهاري باين حابس في هبطة
_انيي روحت، قفلت الباب علابالي كون نكمل تجبدلي الدوسي لكحل كامل
ركبت قيت خويا وجهو مقلب نخاف نهدر حاجة يرجع غشو كامل فيا (نصيحة كي يعود واحد مقلق خليوه يتكالما وهدرو على خاطر في هذي الحالة ميدريش الشخص وشراه يهدر ويدير) وصلت وهبطت حتى نلقا احلام في وجهي هاذي الطفلة طايحا في خويا جايا من ستيل المعوق من البنات بهلولة ولبسة والمكياج وزينها عادي والذكور تع دزاير كامل يعرفوها وزيد فوق هذا كامل مذلولة ورخيسة وتع مظاهر وانا فايقتلها لي راهي تحكي معاي غير على صلاحها بصح لاعبتها نية في الهبال هكا منجرجها مهما "تكون انك تعكس واحد حاجة توجع القلب لابغا ينكرها "
_صباح الخير سوسو
_صباح النور، وشبيه خوك مريض
_لالا مقلق برك
_علاه
_سقسيه هههههه
_اوووف سوسو وشبيكي سامطة
_صح؟؟؟ معلباليش هههههه، اني رايحا للكور تعطلت
جات تحكي درتلها باي، هاذا مناقصني على الصباح التبهليل كون جا بنادم دخلت كي العادة ياإما تلقاهم يقطعو في الرايح والجاي ياإما تلقاهم يتبهلو بلا فايدة، بون انا من النوع لي حاكم قدري ومنحبش نداصر ماشيا بمبدأ خير الكلام ما قل و دل ومنحبش نقطع ونمنشر في الناس وهذا لي يخلاني من النوع الملفت للنظر لجماعة وجماعة المغيارين يسموني المعقدة، حتى اني نسمعهم يقطعو ويمعنو علي اما جامي يجو يواجهوني بالنسبة لذكورا واحد ما يقربلي على خاطر محترمة روحي وكاين لي يجو يدمونديوني اما منعطيهمش وجه وجامي صاحبت (يابنات نصيحة من القلب اخطيكم من العلاقات الغير شرعية تجيبلكم تكسار الراس لي يحبك من الباب الكبير مش بالخرطي تع نتعرفوا وصحبتي وصاحبك ✔️)
ودايما نغض البصر نتاعي وهذي فيها حكمة يعرفها غير لي جربها، مخطوبة لواحد اسمو علي جارنا ضحايكي وزاهي وولد فاميليا شباب فيه المواصفات لينحبهم وكي كنت صغيرة كان يلعب معاي ويشريلي سقايط حب طفولة كبير عليا ب4 سنين يجى هنا علاجال خوه (مع الأسف كنت نظن هكذا) مينذالك يحكي معاي في الجامعة وهدرتنا مع بعض باردة جدا وجامي خرجت معاه وحكيت معاه في الثيليفون ساعات منحسوش خطيبي وانا نموت كون نشوف وحدة تحكي معاه على عكسو هوا لي ميغيرش علي وحتى انو ميلهطش علي بصح كنت نتجاهل ونقول مش الرجال الكل مغيارين وهو حبني حلالو على هاذيك يتصرف معاي بالطريقة هاذي (هكذا كنت نبرر لروحي) جات صديقتي سناء تعرفنا على بعضانا في الثانوية وتكلي من الفاملية من بعيد هي متشبهليش في العقلية هاربة علي بزاف اما تعتبر صديقتي ونلقاها في وقت الشدة جايا شابة بزاف عينيها زورق وشعرها اصفر والملامح نتاعها كيما الروسيات اما هي ماشي انتيمتي تعرف بحكاية حبي لعلي حكيتلها وياليتني ماحكيتلها
_صباح الخير يا الزين
_صباح الخير حبي، ها اني نشوف علي هنا
_كي العادة جا علاجال خوه
_وبلاك جا مش يشوفك،
_لا لا منظنش
_نتي زادة سرين قاعدة كي الحجرة روحي عندو ديري خطوة راهو خطيبك مفهمتش علاه معقدة هكذا
_كيفاش حايبتني نبان رخيسة ومذلولة مش انا لي ندير هكذا
_اقعدي هكذا كي يروح من يدك قوليلي لغالب مش بيدي
_اووه قصي علينا لي عينو فيا يجي لعندي
جا لبروف سكتنا اكيد هي قلقت مني اما هذي هي الحقيقة ياناس بلاك انا نروح عندو ونقلو اني نحبك يا سبحان الله هذا اسمو رخص بعينو هذوك 2 سوايع عديتهم بريق الناشف
_تروحي معاي ولا نو
_لالا ياسر قالي جاي
_مروحة وحدك
_ايه رايحة مع هند
_ok باي
راحت وخلاتني نتخبط منعرف شكون عندو الحق، اووووه يوم كحل على راسي
خرجت حتى عيطلي خويا وقالي راهو ميقدرش يديني حتى شفت هند لي تقرا معاي أفضل حاجة نروح معاها
_هند راكي مروحة
_ايه مع أيمن (خطيبها ومفتح عليها )
_حسبتك مروحة مع سناء قاتلي راهي مروحة معاك
_لالا
_شفتيها وين راحت
_ايه شفتها رايحة جيهة.....
في بلاصة أخرى :
_علي هي تحبك ولكن عندها كرامة من المستحيل تجيك وتبادر هي الأولى
_كرهت من هاذ الدراما كاملة عييت
اووو وش داها لهاذيك لبلاصة زعما شكون معاها
_راكي متأكدة هند، سناء قاتلي اني مروحة
_يابنتي شفتها مع واحد طويل وعريض لابس تريكو احمر
_خلاص دووك نروح معاها خير منروح وحدي
_هيا تشاو
روحت وياريتني مروحت
_ راك رايح تهبلني لحكاية ساهلة ونتا معقدها اتزوجها ودي حقها تع لورت منبعد طلقها ورواح تقدملي إذا راك نسيت نفكرك بابا مستحيل يقبلك ونتا مستقبل باهي معندكش
_يا سناء ياحبي اني نعشق فيك ولكن هي زادا ولية رانا ندمرولها في مستقبلها
_ومستقبلنا حنا مخممتش فيه شوف إذا راك تحبني دير لي عليك علي
_خللاااص
_إذا راك حايبني في دارك في أسرع وقت ازرب في هذا الموضوع ومراناش نديرو في حاجة غالطة هذا حق بابا من الورث هوما ناس سراقين علي داونا حقنا
_عمري متبكيش وراسك نجيبلك حقك منهم
تعرف شعور الخيبة والألم والغباء وكلش هكذا حسيت كي سمعتهم صديقتي والعبد لي نحبوا يلعبوا علي في لعبة وسخة كيما هاذي دموعي تسيل سبالة اما مش انا لي نضعف الطيحة لي متقتلش تقويك مسحتهم منيح مرايحاش نخليهم يستشفاو فيا مستحيل انا نكون الضحية ابداااا
_سنااااء
✌️جماعة الخير ادعموني انا راني كاتبة مبتدأة إذا عندكم أفكار قولولي ولا تساؤلات في ليكومنثار ومتبخلوش علي بجام نوكل ربي على لي تشوف وتروح ❤️
معلومة :
الشخصية الضعيفة هي الوحيدة لي متبكيش انك متبكيش هذا يعتبر ضعف مش قوة
أنت تقرأ
A LAST DANCE🖤
Mystery / Thrillerأتعلمون سر النجاح أن تعتبر الحياة مدرسة والأشخاص مجرد اختبار والعقوبات مجرد رنة جرس تعقبها حصة أخرى والأمر بيدك إما أن تكون أو لا تكون
