عند عز *
خرج بعصبية من جدته واعمامه شاف ملاك وامها راكبين مع السواق تقدم لعندهم وهو يدق الشباك وفتحت ام ملاك ناظر ملاك : وين رايحه ؟
ام ملاك : عز لا تطول السالفة وتخلينا نوصلها للمحاكم طلق بنتي والله يسير لك امرك
عز : هي زوجتي مالكم اي دخل بيننا وتبيني اطلقها عشان خالد ؟ باخذ حقها منه
ام ملاك : السالفه ما وقفت على خالد المشاكل بتكبر لو بقت معك بنتي الافضل لها تبتعد عن المشاكل وتبعد عنكم
ورفعت الشباك ضرب الشباك مرة ثانية وعصب من مشى السواق من قدامه
ركب سيارته وهو يرمي شماغه ومسك راسه بكل قهر
انتبه لنجلاء والبنات الي فتحوا الباب وركبوا بجنبه
مرام : خليتها تروح كذا ؟؟
اسماء : اقسم بالله محد صاحي ذي تبي تتطلق من هنا وذا تاركها من هنا
عز : هي طلبت الطلاق ؟
نجلاء : ايه سألناها وقالت انكم عند اتفاقكم وبتطلقها بعد شهر
عز : يعني تبيها من الله
مرام : عز يويلك تطلقها خير ما امداكم تتزوجون
تنهد عز وهو وهو يفتح الشباك : وليه راكبين انتم ؟
نجلاء : بنروح معك للبر
عز : ومين قال بروح ؟
اسماء : اجل وين بتروح ؟
عز : بروح اتفاهم مع الشيخه
نجلاء : اجل خذنا معك
شغل عز السيارة وحرك
اسماء: اقسم بالله جدتي ذي مب صاحيه
وانتبهت لنظرات نجلاء وعز وبخرشه: امزح
مرام : وهي صادقه شاللي تطردك من البيت عشان خالد
عز وهو يتنهد بضيق: ياليتها وقفت على البيت
اسماء : وشفيه بعد ؟؟
عز : طلبتني اطلق ملاك
مرام : لا عااد هنا طولتها
ولصقت باختها من ناظرها عز بحدة :بعدين انت مريض بعد كلامها تدافع عنها ؟ مع احترامي لك يا نجلاء بس صدق محد له دخل بعز وزوجته وملاك بعد مجنونه سمعت كلام امها وطلبت الطلاق
