جَرح الهَوى

البارت الاول

يمَة أدعيلي وضعي اليوم مَو زين
أول مره هلكد گلبي يتعب ..
هاي المَره كلهن صَارن ويا
أستوعب
وأنكسر
وتفارك
وحَب !..
أنه بحَرب يمُه ومحَد وياي
يَـاا هَب ريح حَتى الريح مَا هب
لتكليلي سَولف و الله مَتروس ..
ندم ، والروح بيَها النار تلهَب
____________________

توجهت انظاري للمكان الصاير عباره عند سواد
كلها لابسه اسود وتعابير الحزن مرسومه على ملامحهم، غمضت عيوني وانا اسمع الصريخ العويل
يلطمن بكل حركة گلب ويبجن بخنكه وصوت..

فززني صوتها وهي تناديني
- بناين تعاي خل نخلص شغلنا

بناين..
- اجيت حبيبتي اجيت..

مرت ثلاث ايام وخلصت الفاتحه وكلمن راح البيته وغوش عليهم حزنهم..

رجعت للبيت هلكانه من التعب والركضه بالفاتحه

-اوفف يابه هلكت رجليه ما احس بيهن

توجهت انظار على تلفوني وتذكرته صار هواي ما مراسلته
تذكرت اخر شيء صارت بيناتنه مشكله ومحد حاچه الثاني..

اخذت تلفوني بكل لهفه واني اكول اكيد مراسلني ومشتاقلي بس..

خابت امالي من شفته ما داز شي ضجت ونقهرت
يمكن لحد هسه زعلان وشايل بخاطره

دزيتله مسج

- هلو حبيبي شلونك شخبارك

ما تأخر شويه ورد
- الحمدلله على الله

- شبيك يعني لحد هسه الموضوع أبالك وتفكر بي

- اترجأج اترجأج ما اريد احجي وياج عوفيني براحتي حتى صوتي بعد ما اسمعينه ومنحجي اي مكالمه وكلشي منحجي..
عوفيني براحتي ما اريد احجي وياج خلص عوفيني ارتاح هل فتره

- انتَ صدُك تحچي من كل عقلك

- اي من كل عقلي

كل هذا واني احرمصله
حبيبي شنو الي مضوجك فدوه اروحلك احچيلي اذا مسويه شيء زاعجك اني اسفه اكو شيء؟ احچيلي لا تضل ساكت اروحلك فدوه

- ما مضوجني شيء بس عوفيني اريد ارتاح منج..

اتصلت عليه انطاني رفض ودز رساله كاتب بيها

- بعد ما افتح خط عليج ما اريد بعد اسمع صوتج ولا اسمعين صوتي بعد خلص عوفيني

- هاي انتَ صدُك تحچي

ضل يصيح عليه وينتر بالكلام
- كافيييي خلص سكتيي بعد ما اريد احچي وياج عوفيني ارتاح عوفيني براحتي خلصصص

روحي توجعني من كلامه بچيت من شدة يأسي ومن فرط عجزي وخوفي وقلقي گلبي كام ينبض بشكل مو طبيعي والغصه بصدري..