لغويات - نصائح شيري

ة / ه ؟!

الهاء والتاء

غلطة كبيرة اوي بشوفها كتير في الكتابة وبتتسبب في اني احيانا اقرأ غلط!
في بعض الكلمات مش في الكل بتغير الضمير والمعنى خالص!

طب ازاي نفرق بينهم ؟!

طرق التفريق بين التاء المربوطة والهاء المربوطة سهلة جداً ومش هتحير ومع الوقت كمان هنلقط على طول انهي فيهم صح!

- اول طريقة إضافة تنوين:-

ببساطة نضيف تنوين للكلمة، وهو هيوضح بسهولة الفرق بين التاء المربوطة والهاء المربوطة؛ لما نضيف التنوين هتتقلب التاء المربوطة لتاء عادية والهاء المربوطة هاء عادية!

مش فاهمين؟!

نقول أمثلة:

1) كلمة "مدرسة"
لو أضفنا ليها تنوين الفتح لما تيجي ننطقها هتنطق مدرستن
وتنوين الضم هتنطق: مدرستون
هنا ظهرت تاء، ودا معناه إن الحرف هنا تاء مربوطة مش هاء!!

2) كلمة "وجيه"
لو أضفنا ليها تنوين الفتح تنُطق وجيهن
ولو أضفنا ليها تنوين الضم تُنطق: وجيهون
فهي إذًا هاء مربوطة بالكلمة...
سهله صح؟
.

الطريقة التانية إضافة ياء الملكية:-

ببساطة نضيف حرف (ياء) لنهاية الكلمة، لو النهاية هاء هتفضل زي ما هي، ولو تاء هتفضل بردو زي ما هي!

أمثلة:

1) كلمة شجرة:
نضيف ياء ملكية تبقى شجرتي، إذًا نهايتها تاء مربوطة...

2) كلمة مُنبه:
نضيف ياء ملكية تبقى مُنبهي،
النهاية هاء، إذًا هي هاء مربوطة!!

سهل بردو صح؟

.

- تالت طريقة هي إضافة الكلمة إلى كلمة بعدها تبدأ بـ ال القمرية...

أولًا لازم نعرف معنى -ال- القمرية، وهي الكلمة اللي بتبدأ بـ ال التعريف وتُنطق فيها اللام كاملة زي كلمة القمر، الأرض، القوي، الماء...

ممكن نستخدم الكلمات دي مؤقتاً عشان بس نعرف النطق...

لما نضيف الكلمة بتاعتنا لكلمة تبدأ بـ ال القمرية هتلاقي الهاء تُنطق هاء، والتاء تُنطق تاء...

أمثلة:
لؤلؤة الأرض: تنُطق هنا تاء، إذًا هي تاء مربوطة مش هاء.

أخاه القوي: نُطقت هنا هاء، إذًا هي هاء مربوطة مش تاء.

ضميره الحي: ظهرت هاء في النطق، إذًا تُكتب هاء مربوطة.

بس كدا يارب يكون سهل!

متنسوش تاخدوا لفة في كتاب ادوات الكتابة وتعملولي فولو هنا و انستا وكمان بصوا بصة على رواياتي ❤️

بس كدا باي باي 😘