اسكريبت جديد
بابا بابا هو احنا بكرا هنبدأ نصوم صح؟
وليد : أيوة يا حبيب بابا هنصوم خلاص بكرا رمضان
ياسين : بابا هو احنا بنصوم ليه؟
وليد : بنصوم يا حبيبي طاعة لربنا سبحانه وتعالى لما أمرنا بالصيام في قوله تعالى في سورة البقرة الآية (185) بسم الله الرحمن الرحيم
[شهر رمضان الذي أنزل فيه القرآن هدى للناس وبينات من الهدى والفرقان فمن شهد منكم الشهر فليصمه ……..] صدق الله العظيم
ياسين : طب ليه ربنا أمرنا بالصوم ؟
وليد : عشان حاجات كتير يعني مثلا احنا بنصوم عشان نقرب من ربنا سبحانه وتعالى بالصوم والطاعة والصلاة
وكمان نشعر بالفقراء والمساكين نحس نفس إحساسهم بالجوع والعطش ونعرف هما بيحتاجوا عشان نعرف نساعدهم صح
وكمان متنساش ان ربنا سبحانه يعلمنا الصبر نفضل من أول الفجر لحد المغرب
وكمان بيعلمنا الشعور بقيمة النعم التي نمتلكها و نحافظ عليها
ياسين : ينفع كلنا نصوم حتى الناس الوحشه ؟
وليد : طبعا يا حبيبي كلنا نصوم وبعدين مفيش حاجه اسمها ناس وحشة كلنا بنغلط يا حبيبي ورمضان بيكون فرصة لينا عشان نخلص من الأخطاء دي ونطلب من ربنا انه يسامحنا
ياسين : بس يا بابا أنا شوفت تيته السنة اللي فاتت بتاكل بالنهار بس مرضيتش أفتن عليها عشان حضرتك قولتلي قبل كدا ان الفتنة حرام وغلط مينفعش نعمل كدا
ابدا هي تيته كدا هتدخل النار انا مش عاوزها ندخل النار أنا بحبها أوي يا بابا
وليد : يا حبيبي أنا مبسوط منك إنك مفتنتش عشان الفتنة حرام واطمن يا سيدي تيته مش هتدخل ان شاء الله عشان اكلت في نهار رمضان
ياسين : بجد يا بابا طب ازاي
وليد : عشان ربنا سبحانه وتعالى هو اللي امر تيته واللي زيها انهم يفطروا عادي ودي اسمها رخصة من ربنا سبحانه وتعالى لانها مريضه وربنا سبحانه وتعالى منح المريض واللي ميقدرش يصوم انه يفطر ويطلع إفطاره دا للفقراء والمساكين ولو هو يقدر يصوم بس تعب شوية زي ماما كدا لما تعبت قبل كده واخدت دواء ترجع تصوم تاني بعد رمضان لما تبقى كويسة
ياسين : الله بجد يا بابا ربنا دا جميل أوي
وليد : طبعا يا حبيبي ربنا سبحانه وتعالى رحيم وغفور …………..ها يا سيدي عاوز تعرف ايه تاني ؟
ياسين : أنا ه صوم السنة دي معاكم أنا مش صغير أنا كبرت خلاص انا بقى عندي 7 سنين بحالهم
وليد : طب يلا يا بطل نتسحر عشان نعرف نصوم كويس
ياسين : حاضر يا بابا يلا
كل عام أنتم بخير
#هاجرسالم
#ضحيه_الكتمان
#أنين_الصمت
