سيرين

الجزء الاول

#سيرين
الحلقة الولة
#هبوش_الماسة
في حوش بسيط ملتمين على سفرة الغداء يهدرزو، الحاج محمد واولاده الثلاثة الكبير طارق والوسطي حسن والصغير ربيع
وجنبهم على السفرة التانية امهم جميلة وبنتها نادين وكنتها نجوى مرت طارق وكنتها رجوة مرت حسن
والتوأم سيرين وسيلين في المطبخ
وباقي العيلة في حياشهم حتتعرفو عليهم في باقي الحلقات
في مكان تاني، مكالمة هاتفية بين الحاجة هنية وبنتها نورة
نورة:: يمة اسمعيني كويس تو جاي عرس فريدة وهدي فرصتك ومعادش تتعاود
الحاجة هنية:: لكن فريدة مزال عليه هلبا عرسها وانا شن يصبرني لهداك الوقت
نورة:: لازم نصبرو باش نطبخوها على نار هادية ويصير الي نبوه
واستمرت المكالمة لحد ما نورة قنعت امها برايها
بالعودة لعيلة الحاج محمد
سيرين خشت لدارها ومقعمزة قدام المراية وتمشط في شعرها وتغني فجاة رن الهاتف جنبها ناضت وشافت الهاتف لقاته رقم غريب
ردت الو المتصل: مش حتعقلي لين تجي على راسك
وسكر
قعمزت سيرين وقعدت تفكر بخوف من هدا الي اتصل بها وليش قاللها هكي
عند الي اتصل بسرين وصاحبه
زياد: يا راجل ليش قلتلها هكي وليش اتصلت بكل
حاتم: ما تدخلش خليك في حالك الموضوع بيني وبينها
زياد: تي ما يجيش يا راجل الكلام هدا
حاتم: خلاص سكر الموضوع يجيك وقت وتفهم كل شي
وناض ركب في سيارته وطلع
في اليليل
في حوش اميرة
يرن هاتفها اميرة: الو
نادين: الو كيف حالك وحال الصغار وكيف حال راجلك
اميرة: حمد لله حالنا باهي كيف حالك انتي وكيف حال بوي وامي والكل
نادين: حمد لله كويسين
اسمعي بنقولك
اميرة: شنو فيه أن شاء الله خير
نادين: ما تنخلعيش خير خير يا حنة
هدا غير فكرت الجمعة الجاية نديرو لمة في حوش بوي
شنو رايك
اميرة: ايه والله جبتيها خلاص تو نكلم حتى سهيلة وسناء باش نتلاقو كلنا
نادين: تمام خلاص كلميهم وكل وحدة تدير حاجة ونلتمو
اميرة: تم اتفقنا امالة خلاص تصبحي على خير
نادين: وانتي من اهل الخير
سكرت نادين الهاتف وخشت لدار لقت سيرين متمددة على السرير وتشوف لي السقف
كلمتها ما ردتش عليها استغربت في حالها وخشت لمكانها و رقدت
وبعد مرور يومين وفي صباح يوم الجمعة
#يتبع