အပိုင်း ၃-၁
ခါဆယ်ရ့်အသံတွင်စွက်နေသည့် ပေါ်တင်စွပ်စွဲချက်ကို ရှင်းရှင်းလင်းလင်းကြားလိုက်ရပြီး မာရီအန်းအတွက်တော့ ယင်းမှာ ပြဿနာဟု နိမိတ်ပြနေသည့်နှယ်ပင်။ မာရီအန်း၏ မျက်လုံးများ အလန့်တကြား ပြူးကျယ်သွားခဲ့ပြီး သူ့အမှားသူ ပြန်နုတ်ယူဖို့ မျှော်လင့်ချက်ဖြင့် ခေါင်းတွင်တွင်ခါလိုက်သည်။
"အရှင်မင်းကြီး အဲ့ဒီလိုမဟုတ်ပါဘူး..."
မာရီအန်း စကားစလိုက်သော်လည်း တစ်ဖန်ထပ်ပြီး ဖြတ်ပြောခံလိုက်ရသည်။
"ဒါဆို ဘာများလဲ။ ရှင်းပြစမ်းပါဦး။"
ခါဆယ်ရ်က ဘာသိဘာသာ မေးလိုက်သည်။
မာရီအန်းတစ်ယောက် တရိုတသေ ခေါင်းညိတ်လိုက်ပြီး အနူးအညွတ် ဦးညွှတ်ထားရင်း လျှောက်တင်စရာရှိသည်ကို ဆက်လက်လျှောက်တင်ခဲ့၏။
"အရှင်မင်းကြီး စိုးရွံ့မိပေမဲ့ အရှင်မိဖုရားက တော်တော်လေး...ဟို...တရားမဲ့နေပါတယ်။"
မျက်လုံးများတွင် စိုးရိမ်မှု အတိုင်းသားပေါ်လွင်နေလျက် မာရီအန်း လျှောက်တင်လိုက်သည်။ နန်းတော်ထဲမှ လူများအတွက် အပူ၊ သူ့အသက်အတွက် အပူ၊ စသည်ဖြင့် စာရင်းက ဆက်သွားတော့၏။
ခါဆယ်ရ်က ခပ်တိုးတိုး ခနဲ့ရယ်ရယ်လိုက်သည်။
"သူ့ကို 'တရားမဲ့' တဲ့အတိုင်း လွှတ်ထားလိုက်မယ်ဆိုရင် အကြိမ်တိုင်း သူသတ်တဲ့ လူအရေအတွက်က နှစ်ဆဖြစ်သွားမလားပဲ။"
သူမရှိချိန်တွင် မိဖုရားက မည်သည့်အရာများကို ဆောင်ရွက်နိုင်စွမ်းရှိကြောင်း ကောင်းကောင်းသိထားသည့် ခါဆယ်ရ်က သူ့ဟာသူ စိတ်တိုစွာ ရေရွတ်လိုက်သည်။
မိဖုရား၏ ကိုယ်ထိလက်ရောက် အပြစ်ပေးမှုများကြောင့် သေဆုံးခဲ့ရသည့် အစေခံစုစုပေါင်းမှာ စိုးရိမ်စရာအရေအတွက် ဖြစ်လာခဲ့လေပြီ။ ကျူးလွန်သည့် ပြစ်မှုတိုင်းအတွက် အပြစ်ပေးရသည့် အကြောင်းရင်းရှိသည်မှာ အမှန်ပင်ဖြစ်သော်လည်း ခါဆယ်ရ်၏ အမြင်တွင်မူ ထိုမျှသေးသိမ်သော ကိစ္စရပ်များအတွက် မည်သူမျှ သေဒဏ်ကျခံရန် မထိုက်တန်ပေ။
YOU ARE READING
နောက်ဆုံးခရီး နိဋ္ဌိတံသော်
Romance🚨🚨🚨 သတိပေးချက် - ဒီဝတ္ထုမှာ အရွယ်မရောက်သေးသူတွေ ဖတ်ရှုဖို့မသင့်တော်တဲ့ အကြောင်းအရာတွေ ပါဝင်မှာဖြစ်ပါတယ်။ [ကိုယ်တိုင်ရေးမဟုတ်။ အပျော်တမ်း ဘာသာပြန်ဆိုရုံသာ။ မူရင်းဖန်တီးသူအား အပြည့်အဝ ခရက်ဒစ် ပေးပါသည်။]
