مزمل يتفجأ بالمشهد النادر .. اتخيل الزول ده جاي من على الكوبري .. يعني متجه جنوب .. ماعارف وقف لشنو . احتمال داير ياكل حاجة .. بعد نزل وشاف المنظر واتخلع . والهجمة عملت ليهو مخولة في راسو .. طوالي ركب عربيتو راجع واتخارج .. واصل طريقو ماشي على سوبا .. ضرب لي مدثر .. يامدثر انت وين .؟ قال ليهو انا في الوكالة مع محمود .. قال ليهو يعني الليلة ماشغال؟ ..
طيب داير اسألك .. رفيدة خطيبتك المرتقبة وين؟ .. موجودة في الوكالة؟ .. قال ليهو ابدأ قالو مشت ناس خالتها ..
قال ليهو يازول خالتها وين؟ .. الزولة دي بتلعب يا مدثر .. الزولة دي انا هسي شفتها في شارع عبيد ختم . في محل اسمو القرموشي وفي واحد ماسكها من يدها ..
مدثر قال ليهو واحد منو؟ وانت عملت شنو؟ ليه مامشيت شفتو ده منو .احتمال زول بضايق فيها ..
قال ليهو والله يامدثر ماشكلو بضايق فيها .. اي نعم هي زعلانة شكلها لكن الظاهر بتعارفو .. المهم يامعلم انت لازم تشوف الحنك ده شنو..
ماتكون البت دي بتلعب علي حبلين .لانو البنات في الزمن بقن اسكت ساي ..
مدثر قال ليهو ماتشيل هم .. هي اساسا" اليومين متغيرة .. اظنها شافت ليها شوفة .. لكن انا ما ماشي من هنا الاتجي .. واخد منها الخبر النجيض .. وابقى على بينة يا ابيض يا اسود .. لانها خاتاني في الانتظار ..
طيب خلي مدثر منتظر البت ..
نمشي المستشفى .. ونشوف معاناة المرضى العلنية .. ومعاناة الدكتورة غادة السرية ..
طبعا زي ماحكيت ليكم قبل كدا .. غادة عملت علاقة طيبة مع نوسة السوسة .. وشكلها عندها هدف كبير من العلاقة دي .. شوفو الهدف شنو........
قالت لي نوسة .. عارفة يانوسة .. تتذكري يوم مدثر قال للدكاترة انا عندي علاقة جادة مع غادة؟
قالت ليها ايوة قال .. قالت ليها والله الزول ده كذاب .. وانا قدر ما اتقربت منو .. هو ماشي نافر مني .. والله تعبت وراهو وجريت لامن نفسي انقطع ..
قالت ليها ليه طيب ؟؟ بس مالو يعني؟؟ انتي اي راجل بتمناك والله ياغادة ..
قالت ليها الزول ده مشكلتو حاجة واحدة .. مشكلته محمد يوسف .. قال لي ده صاحبي الوحيد .. مقاطعني بي سببك ..
وقال لي انا يا غادة لو عملت معاك ارتباط .. مافي زول تاني بيثق في الخوة .. والناس مابحترموني ..لاني بكون خنت صاحبي .. انا مابقدر اواصل معاك .. وهسي مقاطعني نهائي والله يانوسة .. والسبب الوحيد محمد يوسف ..
طبعا" لاحظوو ..نوسة بقت متعلقة بي محمد .. غايتو ماشين سوه مامعروف بيناتهم في شنو .؟ .. لكن شكلها نوسة عايزاهو ..
وبقت تفكر . انو مادام مدثر رفض غادة .. احتمال غادة ترجع تاني تقلع منها محمد يوسف ههههههه ..
وخافت شديد من الحتة دي .. وبقت تفكر .. وقلقت وتفرك في يديها زي الزول المنتظر ليهو معاينة ..
من ساعتها ديك مشت تفتش لي محمد يوسف .. لمت فيهو وقالت ليهو انا دايراك في موضوع ضروري ..
قالت ليهو طبعا يا محمد .. نحن مدثر ده كنا ظالمنو شديد.. طبعا غادة قبل كدا فهمتني .. من خلال كلامها .. انها حتخليك عشان مدثر .. لكن هسي عارف غادة قالت لي شنويامحمد ؟ ؟؟
قال ليها اها قالت ليك شنو؟
قالتليهو .. غادة قالت لي والله يانوسة .مدثر ماكان بنظر لي الا زي اختو وبس .. وطيلة فترتي ماحصل قال لي كلمة فيها اشارة لي ارتباط ..
حتى بعد اتفارقنا انا ومحمد يا نوسة .. مدثر رافض يربط معاي اي علاقة .. عشان مايفقد محمد يوسف .. وبشوف نفسه كانه خانه ..
محمد قال ليها يعني هسي غادة ومدثر مابينهم اي علاقة؟؟
قالت ليهو ابدا يامحمد .. والله رافضها رفض شديد .. وكلو عشانك انت .. والله حننوني شديد يامحمد .. عشان خاطري يامحمد .. امشي صالح مدثر.. واتكلم معاهو عادي .. وحاول فهمو انك انت اتخليت عنها ..وخليهو مايتحسس .. زي ما انا قلت لي غادة كدا قبل كدا .. ورجعهم لي بعض
محمد يوسف .. سرح مسافة كدا .. وقال ليها بس يانوسة.. انتي قبل كدا كنتي مصرة انو مدثر هو الخرب راس غادة .. عشان تخليني ..
قالت ليهو والله بس ده هو الكلام الفهمتو منها .. قال ليها يانوسة انتي متذكرة تفاصيل كلامك القلتيهو لي قبل كدا كله ؟
قالت ليهو ابدا والله .. ما متذكراهو ..
قاليها كلامك الاول بختلف عن كلامك ده. اختلاف المشرق للمغرب ..
خسارة انا البسمع كلام البنات .. وانا ح ارجع لي مدثر .. واتأسف ليهو .. وبشرح ليهو كل حاجة ماتشيلي هم ..
بس انا ماندمان على اني خربت علاقتي مع مدثر.. مدثر انسان جواهو طيب وممكن يرجع .. انا ندمان على كلامي القلتو للزملاء .. وعكست ليهم صورة مدثر بطريقة تخلي اي زول ينفر منه .. والله يانوسة انتي زولة سيئة والله .. وانا كنت مصدقك في اي كلمة قلتيها .. لاني كنت واثق فيك ثقة غريبة .. جميل جميل .. سبحان الله ..
انا والله كنت حاسي انو .. كلام مدثر القالو قدامنا كلنا داك .. كلام زعل . لانو ماشايف اي تلازم ولاتناغم بينو وبين غادة ..
لكن مشكلتي كنت مصدق كلامك انتي .. المهم قالو اللوم بجي بالغفلات ..
وفات مشى خلاها ..
طبعا في اليوم ده مدثر مافيش (اوف) .. والان هو منتظر رفيدة تجيهو في الوكالة ..
اول من جات رفيدة لقت مدثر قاعد الكلام ده زي الساعة واحدة وشوية ضهر ..
طبعا اتخلعت واتفاجأت بدون لوجود مدثر اي سبب .. وسلمت عليهو ..قالت الليلة ماعاكم الدكتور ..؟؟ ووااي انا من السخانة والزحمة والمواصلات ..
طبعا مدثر بعاين ليها بي طرف عينو .؟
ومحمود في دخل على المكتب جوة .. اها ياجماعة نحن في حاجة ما قلناها .. قبيل لمن مزمل اتصل على اخوهو الدكتور ووراهو ..
الدكتور ماكلم محمود بي فحوى الاتصال ..
اها يازول مدثر صلح قعدتو .. وعايز يتكلم معاها .. لكن ماعارف يبدأ ليها بشنو ولا شنو؟
يبدا ليها .. بي موضوعها الاول .. ويسألها بقت على ياتو راي . ولايسألها من المشوار البتقفل فيهو التلفون ده شنو؟
وجوة طبعا صوت المكيف مابخلي محمود يسمع الكلام البرة ..
قالت ليهو كيفك يا دكتور؟؟ .. وقامت من الكنبة مشت المبرد.. قطعت ليها كوزين موية لامن شالت نفسها .. ههه تعب شديد ..
وجات قعدت.. اها يامدثر امورك شنو ؟ ماحكيت لي .. والليلة زاير ولا غاير .؟
قال ليها رفيدة .. انتي لسه ما اديتيني خبرك .. بقيتي على شنو؟
قالت ليهو ياتو خبر يامدثر ؟ نحن مش انتهينا من الكلام ده ؟
قال ليها يعني تاني مافي اي امل في الموضوع ..
قالت ليهو والله الامل في الله موجود .. والعشم عمرو يوم ما انقطع من رحمة ربنا .. بس هسي انا زي ماكلمتك عندي مواضيع بصفي فيها ومامعروف اخلص متين ..
قال ليها انتي هسي جاية من وين تعبانة كدا ؟ ووشك مختوف زي الكنتي شغالة اعمال شاقة ..
قالت ليهو جاية من ناس خالتي في جبرة . قال ليها خالتك في جبرة البوديك شارع عبيد ختم شنو؟ محلات القرموشي كمان ...
قالت ليهو شارع عبيد ختم؟ القرموشي ؟؟ القال ليك منو؟
قال ليها انتي الليلة ماحصل مشيتي لي شارع عبيد ختم ؟
قالت ليهو انت يامدثر بتراقبني ولاحاجة؟ .. والله دي حكاية غريبة ..
بعدين امشي جبرة او عبيد ختم ؟ او اي حتة انت موضوعك بالضبط شنو؟ ..
بعدين انت منو عشان تحقق معاي ؟
قال ليها لالا .. اهدي ياست البنات .. ماتزعلي روحك .. بس لانو في زول شافك في شارع عبيد ختم .. ومعاك زول .. ودي حاجة بتهمني .. لو الكلام ده صحيح .. يبقى انا لازم احترم نفسي وابعد من حياتك ..
قالت ليهو ايوة صحيح ..
قال ليها بس كان المفروض تحكي لي.. تقولي لي انا لقيت زول غيرك احسن منك .. مش تخليني عايش على امل ..
قالت ليهو الحقيقة يامدثر .. انت ما الزول البتخلو عنك لاي انسان تاني .. الزول ده زول كان في حياتي.. وما راضي يبعد مني .. وانا مشيت ليهو مخصوص الليلة .. عشان اقطع علاقتي بيهو عشانك انت ..
قال ليها طيب انا اصدقك كيف؟ .. الزول البكذب مرة واحدة ممكن يكذب مرتين وتلاتة وعشرة ..
قالت ليهو ليك الحق تصدق او تكذب .. بس انا قلت ليك كل العندي ..
بس ياجماعة .. خلاص اتلاشى جواهو اي تصديق للانسانة دي ..
وبقى يقول ليها خير خير .. يارفيدة ان شاء الله خير .. مافي عوجة ..
والحاجات جواهو بدت تتكسر واحدة واحدة ..
فجأة كدا في زول جاء ... منووووو؟؟
عقيل جا داخل الوكالة .. ومنزعج جدا .. لقاهم قاعدين بتكلمو مع بعض ..
السلام عليكم ..
رفيدة الله يخليك انا عايز اتكلم معاك ..
ومدثر نطط عيونو وبقى يعاين للزول ..
رفيدة قالت ليهو عقيل انت حصلتني لي غاية هنا ..؟
عقيل انا كلمتك الشي البيني وبينك انتهى .. الله يخليك تبعد من حياتي
وهو يقول ليها بس انتي اديني فرصة واحدة .. برجع والله بس فرصة واحدة ..
قالت ليهو ماحكاية فرصة .. ومافرصة انت زول كويس وماعندك اي عيب بس انا ماعايزاك .. انت ماعندك كرامة لروحك هو شنو هو ؟؟ بالجبرية الحكاية دي؟؟
قال ليها بس انتي اسمعيني لمدة خمس دقايق وتاني قرري ..
قالت ليهو معليش ياعقيل مابقدر ..
المهم عقيل شكلو زعل .. وبدا يتنهر .. قال ليها انا بتكلم معاك يابت .. بقول ليك خمس دقايق ..
طبعا مدثر خجل جدا من انو كان ما مصدق رفيدة .. قام اتدخل في الموضوع .. قال ليهو عقيل خليك عاقل شوية واهدأ .. رفيدة اقعدي معاهو الخمس دقايق شوفي كلامو .. ماخسرانة حاجة ..
عقيل اتلفت عليهو وقال ليها ده منو كمان ..؟ والبدخلو في الموضوع ده شنو ؟؟
الى اللقاء ..
أنت تقرأ
مزاد السعادة .. طارق اللبيب
Ficción Generalالواطه صباح قدام مستشفى بحري التعليمي . والناس داخلة ومارقة . وفي الشارع هناك يادوب ستات الشاي يرمن في اللقيمات . وناس الاكل غير الصحي بالقرب من المؤسسات الصحية .وناس ماشة وناس جاية ..بس لسه الوكت بدري . وجوة المستشفى بدن الفرّاشات في حركة الصباح بت...
