-
مسحت دموعها لمياء ونطقت : حتى انا مو عارفه وش الي قاعد يصير
نهار : ابوي وشفيه ، ليه تصارخين عليه فجاءة؟
عزام : في شي يخبونه عنا ، وزواجي انا ولمياء مو عشان شراكتهم ابوي مهدد ابوك بشي
عقد حاجبينه نهار ونطق : طيب وشدخلكم انتوا عشان يزوجوكم؟
سكت عزام يعرف انه السبب بكل شي وعدل جلسته ولف لنجوى من نطقت : سعود مستحيل يقلب بدون سبب
لمياء : قلت انه نهيان هذا هدده ، بس بايش مدري
نهار : يمكن فينا
لمياء : وبيعاملنا بهالطريقة؟
عزام : ابوي يبغا يأذيني انا واستخدم ابوكم حجّه
ناظرت فيه نجوى ونطقت باستغراب : طيب وشدخل زواجك بلمياء انه يضرك فيه ، عقلي تشوش حرفيا!
رفع كتوفه بعدم معرفه ونطق نهار : طلقها طيب
هزت راسها بالنفي ونطقت : ماراح اتطلق لين ما اعرف السبب
نجوى : لمياء! مو منجدك تأذين نفسك زياده!
لمياء : محد يقدر يأذيني
نهار : بيحاولون يأذونك
ناظر فيهم عزام ونطق : وليه يأذونها اصلا! ماسوت شي
نهار : بيحاولون يأذونها لانك معاها طبعا
تنهد عزام ووقف يطلع من البيت وناظرته لمياء ووقفت تنطق : بنحاول نعرف
نجوى : تكفين لمياء انتبهي لنفسك
هزت راسها بالايجاب ومشت تطلع تركب بجانبه ونطقت : ليه طلعت؟
عزام : مالي خلق هواش
سكتت تناظر للطريق ونطق : تجهزي بالليل
ناظرت فيه وعقدت حاجبينها ونطقت : ليه؟
ابتسم يناظر فيها وينطق : مغامره
لمياء : وين؟
عزام : بنروح لشركة ابوي يندور ثغره او اي شي
لمياء : وكيف بندخلها؟
عزام : خلي كل شي علي ، اذا ماتبين ..
قاطعته لمياء ونطقت : لا لا ابغا
هز راسه بالايجاب ووقف عند البيت ونطقت : لو ابوك موجود؟ مالي خلق اقابله
عزام : سيارته مو هنا يعني مو موجود ، بس هناي يمكن موجوده
مشت تنزل ونزل خلفها ودخلت للبيت وناظرت لهناي الي وقفت وتوجهت لها تناظر بعيونها ونطقت لعزام : هذي وش جابها هنا؟ فوق الكلام الي قالته لابوك تجيبها؟
عزام : انتوا الي زوجتوني لها ، بتقابلونها اربع وعشرين ساعه تحملوا
ناظرت فيه هناي ونطقت بحده : مو انا الي زوجتك ، ابوك الي زوجك
عزام : انتي وهو واحد
هناي : طلقها اجل
ضحكة لمياء بسخريه ونطقت : وش تحسبيني بوافق؟ بقعد على قلبك حتى لو عزام مو طايقني ، وانتي اقعدي ياعجوز قريح مغير تلفين وتدورين ورا نهيان
ضحك عزام بصدمه يناظر فيه ونطقت هناي بعصبية : هي انتي ثمني لكلامك واعرفي مع مين تتكلمين
لمياء : مين انتي؟
هناي : صاحبه البيت الي انتي قاعده فيه
عزام : وبتطردينها؟
ناظرت فيه هناي ونطقت : وانت مابتطرد البنت الي تقول عن امك عجوز قريح؟
لمياء : ليه مو هذي الحقيقه؟
سكتت هناي بنرفزه تناظر فيها وابتسمت لمياء تطلع تتجاهلها ، مسكت هناي عزام من كتفه ونطقت : غلط ابوك وزوجك ي عزام طلقها وفكنا منها ومن شرها
عزام : ماراح اطلقها لين اعرف السبب وليه زوجتوني لها
هناي : الشر..
قاطعها عزام ينطق : اقرفتوني ترا كل ماقلت شي قلتوا الشراكة ، الشراكة هذي فضحكم سعود وقال انها من زمان يلا الحين دوروا غيرها
ناظرت فيه بصدمة ومشى عزام يطلع ويدخل للغرفه ، ناظر فيها تلم شعرها ومشى يجلس على الكنب ونطقت لمياء : للحين مو مستوعبه شي ، وش السالفه؟
ضحك عزام يناظر فيها وينطق : والله محد عارف السالفه غير هالشيبان ، الي اعرفه الحين ان ابوي مهدد ابوك بشي وعشان كذا ابوك وافق انه يزوجك لي واحنا بنحاول نعرف
لمياء : حشى مسلسل مو حياة
مشت تجلس بجانبه وتنطق : طيب الحين وش بنسوي؟ تبعت واحنا مابدينا
عزام : بنحاول نعرف لما ندخل شركة ابوي الشي الي هدد فيه سعود
لمياء : طيب لما نعرف؟ وش بيصير؟
عزام : بنحطه قدام وجهه وابوك لو فيه عقل زياده يرفع عليه قضية تهديد
تنهدت تمسك راسها بتعب من الاحداث الي جت فوق بعض وناظر فيها عزام يسكت
-
فهد باستغراب : مدري وينهم مختفين ادق عليهم ولا يردون
غرام : نحنا جايين هنا عشان نفتك من وجع الراس عندهم وش تبي فيهم خلهم
ناظرت لجوالها من دق ونطق فهد : مين؟
غرام : لا تتحمس صديقتي
تنهد يجلس بتوتر وجلست بجانبه وترد ونطقت : نوني وحشتيني!
ناظر فيها فهد وابتسمت نورا تنطق : اكثر يحياتي انتي ، سمعت من البنات انك سافرتي غريبه
ابتسمت غرام ونطقت : اي سافرت مع فهد ، قلنا نغير جو قبل الزواج
نورا بتسليك : اها استمتعوا اجل ، ماطول عليك دامك معاه اتصلت عشان اطمن
غرام : تمام حياتي يلا باي
قفلت الجوال ونطق فهد : وش تبي ذي؟
غرام : تتطمن علي شفيك انت!
هز راسه بالايجاب واخذ جواله يوقف ونطقت : وين رايح؟
فهد : بطلع اشم هوا
مشى يطلع وفتح جواله يناظر رسايلها ودق عليها وردت على طول تنطق : يعني لازم ادق عليها عشان تعرف اني ابيك ترد؟
تنهد فهد ونطق : وشتبين نورا؟
نورا : فهد اشتقت لك افهم ، كل ماقول لك خلنا نتقابل تقول مشغول ومشغول بايش معاها
فهد : طيب زوجتي هي وش اسوي؟
نورا : طلقها فهد
فهد : اي طيب وش عذري؟
ابتسمت نورا ونطقت : انا اجيب لك عذر ، بس انت خلها تحمل
تنهد فهد ونطق : اي زين الله يعين من افكارك
نورا : افا ماتثق فيني؟ بخليك تعيش حياتك الحلوه معاي بعيد عنها
ابتسم فهد ونطق : قولي شعندك
نورا : خلها مفاجاءة ، بتلاقي العذر على طول
فهد : زين الله يستر
نورا : على فكره ماقلت لصحباتي على علاقتنا بس يعرفون اني احبك وطايحه على وجهي عندك
فهد : والمطلوب؟
نورا : يعني بس اقولك
ناظر لغرام الي جايه ونطق : غرام جايه ، مع السلامه
قفل الخط وحط جواله بجيبه وتقدمت غرام بابتسامه : خلنا نروح البحر نشوف الغروب ، مرا مشتهيه
ناظر فيها فهد ونطق : خليها وقت ثاني ، مالي خلق الحين
هزت راسها بالايجاب وجلس فهد وناظرت فيه ونطقت : فيك شي انت مو على بعضك؟
ناظر فيها فهد ونطق : تدرين وش ودي فيه الحين؟
ابتسمت غرام تجلس بجانبه وتنطق : وش؟
فهد : ودي فيك ، وبقربك ، ودي تكونين كلك لي
سكتت من عرفت مقصده ونطق : انا ماتخيل القرب عند غيرك ، تخيلتك كل الدروب والاحلام والخيال والواقع واللقى
غرام : بس مو وقته فهد
فهد : لا تكدرين خاطري على ماهو متكدر
ناظرت فيه وابتسمت بخفه تهز راسها بالايجاب
-
ثبت الكاب على راسه وناظر فيها تلبس شوزها الاسود ، ناظروا ببعض والسواد الي يطغى عليهم وابتسمت لمياء تنطق : من جد مسلسل
ناظر فيها عزام ونطق : الله يستر بس
مشى يطلع وطلعت وراه ونزلوا بسرعه يركبون السياره ، حرك عزام يتوجه لشركة نهيان ووقف من وصلوا قريب منها ، عدلت كابها لمياء وحطت فوقه كاب الجاكيت ونزلت توقف جنبه ونطق عزام : لازم الحين ندور مدخل
ناظرت فيه لمياء ونطقت : السطح؟
عزام : صعب عليك تطلعينه
ضحكة لمياء بسخريه ونطقت : افا عليك مابعد عرفتني
ابتسم عزام يناظر فيها وينطق : اجل توكلنا على الله
مشوا بسرعه يتوجهون لخلف الشركة وناظروا للسلم الطويل الي يوديهم للسطح ، قفز عزام يتمسك بالحديد ومد يده لها وناظرت فيه وهز راسه بالايجاب يطمنها ، مسكت يده وبدأو يطلعون بحذر ووصلوا بعد اكثر من نص ساعه ، وصل عزام بالاول وتنهد بتعب ينسدح ورفع نظره من سمعها تناديه ، وقف يتوجه لمكان السلم ومسكها بيدها يطلعها ، انسدحوا بجنب بعض بتعب ونطق عزام : قومي يلا
لمياء : تكفى تعبت ، ولا جبنا حتى مويا
عزام : يمكن نلاقي جوه ، قومي على حيلك
استندت على الارض ووقفت ومشوا يتوجهون للباب وفتحه عزام وناظروا للدرج الطويل وتنهدت لمياء بتعب ، ضحك عزام يناظر فيها ونطقت : مافي شي يضحك ، امش
ضحك يهز راسه لها وتقدموا للدرج ينزلون ، فتحوا اول باب طلع بوجههم ووسعت عيونها بصدمة من كبر المكان ونطقت : واو!
اشر عزام على مكتب ابوه ونطق : هذاك هو
لمياء : وش هو؟
عزام : يعني وش؟ مكتب ابوي
لمياء : اها اجل امش يلا
تقدموا له ومسك المقبض عزام ولف بسرعه من سمع صوت خطوات جايه لهم ونطقت لمياء بصوت خافت : وش نسوي!
حط عزام يده على فمه بمعنى السكوت ولفوا بسرعه من نطق احد الحراس بصدمه : من انتوا! وش تسوون هنا
ناظروا بعض بخوف وتقدم الحارس بسرعه وناظر للمياء وعرف انها بنت وتقدم يمسك عزام من ياقته يلكمه بوجهه ، شهقت لمياء من طاح عزام ومسك الحارس جواله وناظره عزام ووقف يمسك يده يمنعه ، مسك الحارس وثبته على الجدار ونطق بحده : ان علمت بشي ذبحتك هنا!
لف الحارس عزام يثبته على الجدار ونطق : بتجي الشرطة الحين وبتشوف!
رجع الحارس يمسك جواله واخذ لمياء اقرب قزازه وضربته على راسه وطاح مغشي عليه ، ناظر فيها عزام وضحك بصدمه ونطق : وش سويتي انتي!
رفعت نظرها له ورفعت كتوفها بعدم معرفه ونطق عزام : وش بنسوي له؟
لمياء : خله ماعليك ، امش ندخل بسرعه قبل يجي احد ثاني
مشت للباب لكن كان مقفل وتنهد عزام ينطق : وش كنا متوقعين يعني؟
تجاهلته لمياء واخذته اقرب ورقه وطبعتها لمربع صغير ، دفت الباب برجلها ومررت الورقه وانفتح الباب وابتسمت بانتصار ، ناظرت لعزام الي واقف ويناظرها بذهول ونطقت : وشفيك فغرت؟ يلا
ضحك بصدمه منها ، كل شوي تصدمه بشي اكثر من الثاني ، دخل للغرفه وفتح النور وتقدم لمكتب ابوه يفتح الادراج ويفتش فيها واحد واحد ولمياء تفتش بالدواليب ، ناظرت لمياء للظرف الكبير واخذته وجلست على الارض تكب الورق الي فيه وعقدت حاجبينها من شافت اكثر من صوره ، رفعت نظرها لعزام وناظر فيها عزام ونطق : وشفيك؟
لمياء : تعال شوف وش حصلت
قفل الدرج ومشى لها وعقد حاجبينه ونطق : وش هذي؟
لمياء : اعمى؟ ماتشوف؟
تنهد عزام يجلس بجانبها ويناظر بالصور ، كانت صورهم وهم صغار قبل اكثر من عشرين سنه ، لف للمياء يناظرها من نطقت بضحكة : عرفتك من صغرك ، هذا انت صح؟
ضحك يهز راسه وينطق : وقتها بعد الصوره طاحت الكيكه فوق راسي وقعدت اتروش اسبوع كامل
لمياء : لهالدرجة تتقرف من كيك؟ انا كنت اسبح بالتراب
عزام : والحين وش؟
لمياء : الحين واضح الفرق ، انت الي تسبح بالتراب وانا الي تروش اسبوع كامل
ضحك بعلو صوته ونطقت بابتسامه : خفض صوتك لا يطلع لنا جني ثاني
ابتسم يهز راسه بالايجاب ورجع نظره للصور وعقد حاجبينه من شاف صورة نهيان مع بنت غريبه ، اخذها بيده وناظرت فيه لمياء ولفت تناظر الصوره بذهول ، لفها عزام يشوف اسم نهيان وبجانبه اسم شيخه وتحتهم بخط كبير كلمة حب ، ناظرت فيه لمياء ونطقت : عزام يمكن امك!
هز راسه بالنفي ونطق : مستحيل ، مستحيل
لمياء : مافي شي مستحيل ، شوف كيف نظارته لها ونظراتها له
سكت عزام يبلع ريقه بخوف وينفي كل الافكار الي براسه ، لف يناظر الصور ويقلب بينها يشوف اكثر من صوره معاها ، ناظر للظرف الصغير وفتحه يشوف صوره ومعاها رساله ، اخذتها منه لمياء ونطقت : ماله داعي توجع نفسك
ناظر فيها عزام ونطق بصوت مهزوز : تكفين بس ابي اعرف عنها لو معلومه
بلعت غصتها لمياء ونطقت : خلاص عرفت ، اسمها شيخه
عزام : انتي توجعيني اكثر كذا تكفين
تنفست بصعوبه تناظر فيه ومدت الرساله له واخذها عزام يفتحها ، ناظر للخط الي مو مفهوم وعقد حاجبينه ونطقت لمياء باستغراب : لايكون سحر؟
حاول عزام يقرى بس ماعرف غير ثلاث كلمات ' نهايتي ، موتي ، ولدي ' تنهد يمسك راسه بتعب ونزلت دموعه وناظرت فيه لمياء وبكت تصد عنه ، وقف عزام يفتح كل الدواليب ويفتش فيها ووقفت لمياء ونطقت بصوت باكي : عزام لا تسوي كذا بنفسك
هز راسه بالنفي يكمل ونطقت لمياء : عزام تكفى
ناظر فيها و اشر على صدره يضربه : هذا يوجعني يوجعني ، كيف بعيش طول عمري وانا ماعرف امي ولا قد عشت معاها ولا شميت حتى ريحتها!
مسحت دموعها لمياء ونطقت : طيب انت الحين الي المفروض تسويه ..
صد عنها عزام ونطق : الي المفروض اسويه اروح اقتله
سكتت لمياء بقله حيله ونطقت بعد مده : المفروض تروح تصارحه
عزام : وش بيسوي هو؟ بينفي حتى لو الادله قدام عينه
تنهد بضيق وجلس على الارض من فتش كل الادراج ونطق بسخريه : جينا ننتصر وخسرنا
رفعت نظرها له ومشت تجلس بجانبه ونطقت : على الاقل لا تعذب نفسك
عزام : من يوم عرفت نفسي وانا اتعذب ، ماعشت ولا يوم هني
لمياء : بتعيش لو عرفت الحقيقه
عزام : حتى الحقيقه مرّه
لمياء : سهله ، نحط عليها سكر
مسح دموعه وناظر فيها ينطق : تستعبطين انتي؟
ضحكت تهز راسها بالنفي ونطقت : لا ، نعيش الحياه حتى لو الحقيقه مرّه
عزام : نعيش؟ ليه تجمعينا مع بعض
سكتت لمياء تناظر فيه ونطق عزام : بنتطلق بالاساس ، بتعيشين حياتك وبعيش حياتي
صدت عنه تناظر الفراغ تستوعب انها تعلقت فيه حتى بهذي المده القصيره ، ناظر فيها عزام ونطق : ماتبين تعيشين حياتك؟
ضحكة لمياء بسخريه ونطقت : بعد الي عرفته؟ وعشته؟ وضعف شخصية ابوي؟ ماراح اعيش
عزام : ماتقولين نحط عليها سكر؟ حطي وجربي
لمياء : حياتي سكر قبل ادخل هالمتاهات ، وقبل ادور رضا ابوي وفرحته وانجازه ، بس لاني غبيه واسوي اي شي مايرضيني بس يرضي ابوي طبعا ماراح تصير سكر
عزام : ماراح يصير صعب انك ترجعينها زي ماكانت
لمياء : بس مستحيل انسى حتى لو عجزت
ضحك عزام يصد عنها وابتسمت لمياء تناظر فيه : وشفيك فجاءة
ناظر فيها عزام ونطق : تذكرت يوم انك تقولين لهناي عجوز قريح ، والله مانتي بهينه
لمياء : اهخ بس قاهرتني ، ماخذه وضعية الام الحنونه وهي كل انواع العقارب واضح عليها
عزام : عاد من يوم عرفتها ماسوت لي سوء ، بس مو طايقها
لمياء : حتى انا ، ومستحيل اطيقها
وقف عزام ونطق : تأخرنا على فكره
مد يده لها يقومها ونطقت : والحين شلون نخرج ، لا تقول من السلم
عزام : فكرتك تحملي
تنهدت بتعب ومشوا يخرجون من المكتب وناظروا للحارس الي باقي طايح ونطقت لمياء : هذا وش نسوي فيه الحين
عزام : مابه خلاف ، حتى دم مانزل منه كلها دوخه ويقوم
لمياء : اخاف يقول لهم عنا
عزام : مايعرفنا ماعليك
لمياء : ولا يعرفك؟
هز راسه بالنفي وزفرت براحه ونطق : ماودك نمشي؟ الفجر جا
ضحكت تهز راسها ومشوا يطلعون ويصعدون الدرج وفتحوا السطح ، ناظروا للسماء الزرقاء وقت الفجر وابتسمت لمياء تنطق : خلنا نقعد هنا تكفى
ضحك عزام يناظر فيها ونطق : يابنت الحلال امشي
انسدحت لمياء ونطقت : يلا عزام تكفى ، نشوف الشروق
تنهد ومشى ينسدح جنبها وابتسم تأشر ونطقت بحماس : شف شف الشمس ، يونس والله
ابتسم يلف عليها يشوف حماسها ونطق باستغراب : انتي ماقد شفتي شروق؟
هزت راسها بالنفي ونطقت : حلم طفولتي
ناظرت فيه ونطقت : والحين حققته
ناظر بعيونها وطال النظر بينهم ، يحب هاللحظات بينهم وطول النظر ، ادرك الحين طاح وطاح طيحه شينه باقل وقت حتى وهو ما تعايش معاها ، بس لطافتها وقوتها وشجاعتها كلها تغلبت عليه وعلى كبريائه ، رجعت تنسدح تقطع النظرات بينهم ونطقت : وش تشتغل انت؟
ضحك من عرف انها تتهرب ونطق : مدير اعمال
ابتسمت لمياء تلف عليه ونطقت : مثلي! بس اشتغل بشركة خاصه
لف عليها ونطق : وش هالشركة؟
لمياء : سر!
ابتسم عزام يهز واسه ونطق : ليه مانصير شركاء؟
كشرت لمياء تصد عنه ونطقت : اسكت كرهت هالكلمه
ضحك عزام وابتسمت لمياء بخفه ونطقت : يلا خلاص امش ، زودناها شوي
وقف عزام ونطق : حلو انك عرفتي
ساعدها بالوقوف ونفضت ورها ونطقت بابتسامه : والله كانت رحله ممتعه
عزام : نعيدها بالمرات الجايه ان شاء الله
لمياء : لا عاد!
عزام : باقي ورانا مشوار
تنهد تمشي لمكان السلم ورجعت لورا ونطقت : عزام!
مشى يتوجه لها ونطق : وشفيك؟
ناظرت فيه ونطقت : اخاف اقولك وتضحك علي
عزام : لا لا معليك وش جاك
لمياء : عندي فوبيا من المرتفعات
كتم ضحكة عزام وضربته بكتفه ونطقت : اضحك اضحك مايخالف
مسح وجهه عزام ونطق : لا افا مو انا الي اضحك عليك
لمياء : طيب وش الحل؟
عزام : حاولي يعني ما تناظرين تحت
سكتت لمياء بخوف ونطق عزام : اجل كيف صعدتي؟
لمياء : ماكنت اناظر
عزام : طيب الحين بعد لا تناظرين؟
لمياء بانفعال : شلون ما اناظر طيب لو طحت؟
ضحك عزام يناظر فيها ونطقت : خلاص طيب بحاول ، انت امش قبلي عشان لو طحت تطيح معي
هز راسه بالايجاب ونطق : ابشري
رفعت نظرها له ونطقت : يلا!
تقدم يتمسك بالحدايد ويلف جسمه وينزل درجتين من السلم ، رجفت كفوفها لمياء ونطق عزام بصوت عالي : يلا ، لا تخافين
غمضت عيونها وسوت نفس حركته وثبتت يدينها على الحدايد بقوه ، مشى عزام ينزل وكانت تنزل وراه ووقفت فجاءة ونطق عزام باستغراب : وشفيك؟
سكتت من حست برجفة يدينها تزيد ونطق عزام : لمياء!
غمضت عيونها بقوه ونطقت : عزام مو قادره تكفى
تنهد عزام من صعوبة الوضع ونطقت : امسك رجولي
استند باحد يدينه على رجولها وبدا ينزل بسرعه وهي تنزل معاه ، نط بسرعه من باقي الا درجتين ونطت لمياء بعده ، تنفست بسرعه وبتوتر ونطقت : ليه ماخفت قد كذا بالطلوع!
عزام : حلو ماطحتي علي بس ، كان راحت كل احلامنا الي بالسكر
ضحكة لمياء من صراحته ونطق بتعب : يلا يلا امشي ، ابغا النوم بس
تأفأفت لمياء ونطقت : والله حتى انا ، بس مالي خلق لو صحيت اقابل وجه النحس
ضحك يناظر فيها ونطقت : يعني لا تتحسس بس هذي الحقيقه ، الي بدون سكر
ابتسمت بتعب ونطقت : ماودك نمشي؟
عزام : يلا لا تنفسين علينا الحين
مشى يتوجه للسياره وكشرت تمشي وراه
-
طلعت من الحمام بعد ما اخذت دش وناظرت فيه على الجوال وتنهدت تنطق : فهد ترا من اول ماجينا هنا وانت ماغير على الجوال ، خلاص اذا طفشت خلنا نرجع
رفع نظره لها ونطق : وشفيك؟
سكتت تناظر فيه وهزت راسها بالنفي ونطقت : ولا شي ، جوعان؟
فهد : لا توي ماكل
هزت راسها له واخذ فهد جواله يرجع عليه ، زفرت بقل حيله ومشت للمطبخ تسوي لها اكل ، عقدت حاجبينها من سمعته يتكلم بصوت خافت وتقدمت قريب تسمع ، سمعت اخر كلامه من نطق بـ ' وانا بعد ، مع السلامه '
ارتخت ملامحها تنفي كل الافكار الي جتها و رجعت تكمل اكلها من سمعت صوت خطواتها ، مسحت دموعها بسرعه من نزلت وناظرت فيه وابتسمت بخفه ونطق فهد : وش بتسوين؟
رفعت كتوفها بعدم معرفه ولفت عليه تنطق : سمعتك تكلم ، مين؟
فهد : كنت اكلم عزام
ضحكة بسخريه ونطقت : اي وش يقول؟
فهد : على ماتركناهم
غرام : غريبه! هذا وانا كلمت نجمه تقول قابّه بين نهيان ولمياء
عقد حاجبينه فهد ونطق : منجدك؟
غرام : غريبه عزام ماقالك؟
ناظر فيها فهد باستغراب ونطق : لا ما قالي ، يمكن مايبي نجي الحين واحنا تونا مسافرين
غرام : اي اكيد يبيك تستمتع
فهد : فيك شي مو طبيعي انتي اليوم ، بس وش مدري
سكتت غرام تتجاهله واخذت اكلها تطلع للصاله
-
لبست عبايتها ولف عليه من صحى ونطق بنص عين : على وين؟
لمياء : بروح عند امي ، وبشوف ابوي
عزام : بعد الي قاله لك؟
لمياء : مايهم ، ماقله عن قصد
عقد حاجبينه عزام ووقف يناظرها : ماقاله عن قصد؟!
لمياء : اي مو ابوك الي هدده؟
ضحك عزام بذهول من تغيرها المفاجئ لما جاب طاري ابوها ، مشت لمياء تطلع ونزلت لتحت تشوف نجمه ونهيان وهناي وطلعت تتجاهلهم ، ناظر نهيان لهناي ونطق : هذي ماوده عزام يطلقها؟ صارت مشكلة فوق روسنا
هناي : بيقول انتوا الي زوجتوني لها مالي دخل
نهيان : مادام حنا الي زوجناه حنا الي بنطلقه
وقفت نجمه بانزعاج من الموضوع ومشت تطلع لغرفتها ، ناظروا لعزام من نزل ويطلع يتجاهلهم ونطق نهيان بسخريه : والله بنكبر وبنشيب ومحد حولنا
هناي : مافي الا الذيب فهد
نهيان : مايصير ذيب وفهد انتي بعد
ضحكة هناي من تركيزه وكملت تاكل
-
دخلت للبيت وشافته جالس وسكتت تناظر فيه ، لفت عليها نجوى ونطقت بابتسامه : لمياء! تعالي ي امي تعالي
بلعت ريقها تتقدم لهم وجلست بجانبه ونطقت : ممكن تقولي الحين؟
تجاهلها سعود وحبست دموعها لمياء ونطقت : اخر عمرك واحد يهددك بعيالك؟
نجوى : سعود افصح تكلم ترا هم عيالك ، نهار من امس مارجع من البيت تعرف انه يتحسس بهالمواضيع
وقف يتجاهلهم ويمشي وناظرت فيه لمياء يتوجه لمكتبه ، مسكت راسها بالم وتعب
ناظرت لنجوى ونطقت : ماتكلم معاك؟
هزت راسها بالنفي واخذت شنطتها ومشت تطلع تركب سيارتها ماتدري وين تروح ، كل الاماكن تطلب منها الوقوف والشجاعه بس هي نفذ حيلها ، تعبت تظهر القوه وهي جوتها الم وتعب وفقدان شغف ، تعبت نفسيا من تغير ابوها وزواجها الي كله فوق بعض ، وقفت عند البحر ونزلت تلبس نظارتها تحجب الشمس على عيونها ، جلست على الرمل وماقدرت تمسك دموعها وبكت بصوت عالي ، شهقت تمسك صدرها من حست بضيق تنفس ، تحس باختناق وضيقه وكدر خاطر ، تمسكت بالرمل من حست انها دايخه من التعب والبكاء وعدم اكلها تجمعت عليها ، تنفست بقوه وغمضت عيونها واخذت جوالها ترسل له بسرعه ، الشخص الوحيد الي فكرت فيه الحين وقت تعبها وضيقتها هو ، تعلقت فيه بشكل غريب بالنسبه لها لانها مستحيل تتعلق باي شي يضرها ، ناظرت بعد مده من وقف سيارته بجانب سيارتها ونزل بسرعه يتوجه لها ، مسحت دموعها بيدها بسرعه وتقدم لها ينطق : وشفيك؟
رفعت نظرها له وماقدرت تمسك دموعها وجلس عزام بجانبها وتقدم يمسك يدها ونطق : لمياء
وخرت يدها عنه ونطقت : شلون بيرضى علي شلون ، انا صارخت عليه صارخت عزام ولا بيسامحني
سكت عزام يناظر فيها ونطقت تكمل : تدري متى يرضى علي؟ لا اجيب الشي الي اهدده نهيان فيه
ناظرت فيه ونطقت : بس كيف كيف
عزام : انتي مو مضطره تعيشين نفسك كله هذا
لمياء : اعيّش؟ خلاص هذي صارت عيشتي وحياتي
مسحت دموعها ووقفت ونطقت : ادري تعبتك وجبتك هنا ماكان له داعي تـ ..
قاطعها عزام ونطق : ما من تعب لا تخافين ، بس صيري بخير انتي ولا تقعدين تلومين نفسك بكل شي
هزت راسها بالايجاب وابتسم عزام ينطق : ماتحبين تسبحين؟
ابتسمت بخفه ونطقت : والله مالي خلق
فصخ تيشيرته عزام ونطق : مافي شي اسمه مالي خلق ، يلا قومي
تنهدت تقوم بمساعدته وفصخت عبايتها تحطها بجانب تيشيرته ونطقت : الحين اسبح بـ هذي بالله؟
عزام : اي شفيها
لمياء : احس ماينفع
عزام : ما عليك يا بنت الحلال ، العمر مرا وحده عيشيه
هزت راسها بالايجاب ومشت بجانبه ونط عزام بسرعه للغميق ، صرخت من تنثرت عليها المويا ونطق عزام : تعالي ي خوافه هنا
لمياء : لا عزام تكفى ماعرف اسبح
اشر لها تجي ونطق : ماعليك اعلمك
هزت راسها بالنفي بخوف ونطق عزام بضحكة : الحين كل هالقوه قدام نهيان وبالاخير تخافين من مرتفعات وبحر
تكتفت لمياء ونطقت : ماقلت فوبيا قلت ماعرف
عزام : كلهم نفس الشي عندي
صدت عنه تلمس المويا بيدينها وشهقت من حست بيد تسحبها ، لفت تناظر فيه ونطقت : ياورع نزلني!
هز راسه بالنفي ونطق : مافيه ، محد قايل لك من البدايه تجين
لمياء بحده : عزام!
عزام : يا ابوي ترا ماتغرقين ، الماء مالح بتقعدين فوق
ناظرت فيه بخوف ونطق : افكك؟
هزت راسها بسرعه بالنفي وضحك عزام ونطق : وش اسوي فيك انتي
زفرت بخوف وتوتر ونطقت : خلاص تكفى رجعني المرا الجايه وعد اتعلم
عزام : مافيه خلاص جبتك
شدت على كتوفه بخوف وغمض عيونه بالم من انغرست اظافرها بيدينه ونطقت بضحكة : يعور صح؟
كشر عزام بالم ونطق : مشكله انتي والله ، لا تخليني الحين افكك وابلشك
مثلت البكاء لمياء ونطقت : عزام والله لابكي
تنهد يرجعها للعادي وزفرت براحه ونطقت : اشوفك مرا ثانيه تسويها
عزام : قلت المرا الجايه فوق راسك
لمياء : خلنا بالاول نفتك من هالشوشره والمشاكل والضغط ويصير خير
وقف عزام يصد عنها ويلبس تيشيرته وكشرت لمياء تنطق : وانا الحين شلون اتدفى ولا اتنفش؟
ضحك عزام من منظرها ونطق : تعالي عندي ثوب بسيارتي تنشفي فيه
-
انتهى
