#ذنوب_على_قيد_الغفران
#البارت_الثاني_والخمسون
ايمان : كعدت الصبح الساعه بالعشره الحمدلله مر رمضان على خير ربي يجعل ايام العيد كلها خير وفرح وراحه بال الهي بحق حبيبك محمد تحفظلي جهالي وتطول عمري حتى اشوفهم همه وجهالهم سالمين ومرتاحين اللهم امين ... اباوع مثل كل سنه يطب الثلاثي عليه اول الناس بالعيد ابتسمت فاتحه اديه اجو حضنوني ورجعوني وياهم من جنت شباب واكفهم بحضني كل عيد
اروى : كل عام وانتي بالف خير يا اجمل واحلى ام بهالدنيا
علي : ايامج سعيده يانظر عيني الله يحفظج ويخليج خيمه على راسنه
ورده : وخرووو دنطوني مجال ... احم ايامج سعيده ايمان حبيبه قلبي كل عام وانتي بالف خير اتمنى من الله ان يحفظكي ويجعلكي سند وذخر لهذه العائله الجميله المتروسه مشاكل وتعيشين وتشوفين احفادج الي راح يشيطنوج ويخلوج تشلعين شعرج ان شاءالله
ايمان : هههه وانتو بالف خير يا بعد كلبي وفرحتي بهالدنيا ربي يحفظكم ويخليكم اليه وميحرمني منكم
: اللهم امين
اروى : علي حبيبي
ورده : واني هم حبيبي
علي : انجبن غير العشره ما انطي والله لو شما تسون
اروى : حباب علي لتصير بخيل شدعوه عليك هي حمره
علي : يله مو خساره بيجن هاجن هاي كلمن الها حمره وهاي اول مره اسويها
ورده : منك من الشيطان اخذتها اقصد شكرا شكرا
علي : ما اكول يا ابن كلب امه داعيه عليه راح ياخذج
ورده : انت كلت ابن كلب بعد ليش تحجي
ايمان : ههه ولج ورده ام لسانين شلون بيج
ورده : فديت لساني ياما ادب هواي عالم ومشاهم على الصراط المستقيم شتكولون باوعت لعلي واروى
اروى : خزرتها
علي : هاا يله ولن يمه بروح ابوج وين الكليجه
ايمان : دخيلكم لتورطوني ويه انغام روحلها هي تنطيك
علي : يمه حبابه البارحه ضحكتو علينه رحنه زينه ورجعنه لكيناجن نايمات ومنذر راح لغرفته وبعد ماشفته
ايمان : اجيت اجاوبه ودخل منذر صبح علينه واجه باس راسي بعد كلبي شلون وليد ورده متجنب الكل وماله كل علاقه بأحد حتى صوته متسمعه
منذر : صباح الخير ... بست راسها ايامج سعيده خاله
ايمان : وايامك بعد كلبي
منذر : بوست خواتي ... حبيباتي ايامجن سعيده يانور البيت وانت ابو حسين كل عام وانت بخير
علي : وانت بخير ابو سالم الغالي
