السلام عليكم ورحمه الله وبركاته قبل ما نبدأ الروايه نصلي علي النبي عليه افضل الصلاه والسلام
نبدأ بسم الله الرحمن الرحيم
____
ندى بنت جميله جدا وفرفوشه عندها 22سنه محجبه شعرها اسود داكن ناعم وعينها بني غامق في كليه صيدله
_____
محمد والد ندي عنده 47سنه شغال محاسب في شركه معمار
______
رحاب والدة ندي عندها 45سنه
______
عمار اخو ندى عنده 17سنه شعره بني عينه سوده
_________
لين اخت ندي الصغيرة عندها 12سنه شبه ندى جدا
_____
جاسر الالفي عنده 27سنه دخل في حالة اكتأب بعد ما باباه مامته ماتو من سنتين عايش لوحده ملوش حد غير صحبه رامي شغال في شركه والده عينه عسلي وشعره اسود
__________________
في فيلا جاسر الالفي
جاسر وهو بيكلم صحبه رامي في تليفون: الو يا رامي متنساش اجتماع بكره وياريت متتأخرش زي كل مره .
جاسر خلص مكلمته مع رامي وبعدين راح مكانه المفضل وهو(مكتبه الكتب والروايات اللي في بيته)
قرأ روايه حزينه كعادته الفتره الاخيره وبعدين نام
_____________
تاني يوم الصبح
عند ندي صحيت بدري وادت فرضها وصبحت علي اهلها وفطرت ورنت علي صحبتها
رديت صحبتها الاولي سلمي: انتي فين يا حماره كل دا تأخير.
ندي: خلاص نازله اهه راحت عليا نومه، امال فين ساره وهنا؟
سلمي:قعدين بيطفحوا اهم
ندي: ليه هما مفطروش؟
سلمي:لا فطرو وبيفطروا تاني اهه بس انتي اكيد عارفه طفاستهم
ندي:طب المحاضره هتبدا امتي
سلمي: كمان عشر دقايق اخلصي ياختي
ندي: خلاص داخله عليكم اهه
سلمي: تمام
بعد خمس دقايق من مكالمه ندي وسلمي
ندي:جيت اهه
سلمي: اخلصي وهاتي الحمارتين اللي وراكي دول
ندي: تمام
عند ندي وسلمي وهنا وساره بعد ما عدا ساعه ونص من المحاضره
سلمي: رفعت عفرتو دا هيخلص امتي
هنا: والله مااعرف
ساره: انا زهقت وقرفت من ام المحاضره دي اللي مش فاهمين منها حاجه دي
ندي: اسكتو بقي بدل ما نلقيه في وشنا
ندي يعني مكملتش كلمها لقيته في وشها
الدكتور: يلا يا سلمي خدي اصحابك واطلعي برااااا
سلمي:طلعين اهه متزعقش بس
بعد ما طلعوا
ندي: عجبكم كدا ادينا انطردنا قدام المدرج كله وبقي شكلنا عره
هنا: فكك انا صلا مكنتش فاهمه منه حاجه.
سلمي: ولا انا والله
ساره: انا مغلطش لما سميته رفعت عفرتو.
ساره خلصت كلمها لقيت الدكتور ورها وهو بيزعق
تعالوالي علي مكتب . راحوا مكتب الدكتور وخدو التهزيقه التمام .
بعد ما طلعوا من عند الدكتور.
سلمي: دكتور رخم قفلني.
هنا: امي لو عرفت مش بعيد تتبري مني.
سارة:يا ستي فكك انا جعانه يلا ناكل.
ندي: هو دا كل اللي هممكم مش ههممكم ان احنا اتهزقنا وبعدين جعانه ايه يا ساره هو مش انتي لسه طافحه من شويه اقتل نفسي وريحكم مني وريح نفسي منكم.
سلمي: في ايه يا ندي هي اول مره نتهزق ولا مره نتهزق.
ندي: تصدقي صح انتي عندك حق يلا.
(ملاحظة: ندي هبله وعبيطه بس بتحاول تعمل نفسها عاقله)
هنا و ساره في صوت واحد:هو دا الكلام.
وبعدين روحت كل واحده فيهم على بيتها.
___________
استوووووب
ساره وهنا وسلمي أصحاب ندي من الطفوله كلهم محجابات معدا هنا ليها ماضي هنعرفه بعدين.
______________
في شركه جاسر
خلص الاجتماع وبعدين راح علي مكتبه وخلص شغله وبعدين خرج مع رامي.
رامي: جاسر تيجي نخرج الشله متجمعه.
جاسر: لا اخرج انت مليش مزاج.
رامي: هتفضل كدا لحد امتي لو كانوا اهلك عايشين مكنوش هيبقوا راضين عن حالتك دي.
جاسر:هما لو كانوا عايشين ما كنتش هي دي حالتي هما ماتو وخدو كل حاجه حلوه في حياتي.
رامي: انت هتعترض علي قضاء ربنا يا صحبي.
جاسر: انا مش بعترض بس هي دي الحقيقه.
وبعدين جاسر ساب رامي ومشي وكالعاده جاسر روح وراح مكتبته اللي بتونسه في وحدته.
جاسر وهو بيكلم نفسه: هتفضل كدا لحد امتي يا جاسر تروح شغلك الصبح وبعدين تروح تقرأ رواياتك الحزينه وتسمع اغنيتك المفضله وتنام ممكن دا يتغير في يوم من الايام.
عند رامي وبقيت اصحبهم
علي:مرضيش يجي برضه.
رامي: للاسف اه.
ادم:هو هيفضل كدا لحد امتي.
رامي: نفسي يرجع زي الاول.
علي: ياريت يا صحبي.
_____________
تعريف الشله: رامي صاحب جاسر من الطفوله وادم وعلي اتعرفوا عليهم في الجامعة.
______________
بليل في بيت ندى.
ندي قاعده بتعيط جامد وعمار حزين اوي وماسك نفسه بالعافيه بيطبطب على ندي بعد ما اتفرجوا علي الحلقه الاخيره في الجزء الرابع من انمي Demon slayer .
مامتهم دخلت عليهم علشان كانت عايزه تقول حاجه لندي.
الام: يلهوي في ايه مين مات بتعيطي ليه يا بنتي ومالك يا عمار في ايه زعلان كدا ليه واختك بتعيط ليه كدا.
ندي من وسط دموعها: شخصية حلوه اوي مهمه اوي في الانمي اللي بحبه ماتت يا ماما.
الام بعد ما استعوبت اللي ندي قالته طلعت تجري ورا ندي وعمار بشبشب وهي بتقول: اه يا كلاب وانا اللي فاكره ان حصلكم حاجه.
عمار: في ايه يا ماما متعصبه ليه بتقولك شخصيه حلوه اوي و مهمه اوي ماتت.
الام : دا انا اللي هموتكم يا كلاب.
ندي: ايه يا ماما الواحد ميعرفش يعيط في بيته.
الام: عيطي يا حبيبتي بس علي حاجه تستحق العياط مش الهبل دا.
عمار: خلاص يا ماما سبينا بقي كفايه كدا.
الام لندي: روحي اغسلي المواعين يا بت.
ندي: مش فاضيه هذاكر.
الام: ذاكري يا ختي يكش تنفعي.
ندي: هنفع ان شاء الله.
الام: مش باين.
(ملاحظة:ندي وعمار قريبين من بعض جدا)
ندي في اوضتها وهي بتكلم اصحبها مكالمه جماعيه.
هنا:يا بنات متنسوش معرض الكتاب بكره عايزين نروح.
ساره: اكيد دا في روايات جامده اوي هتنزل بكره للكتاب اللي بحبهم.
سلمي:وانا كمان اه صحيح يا ندي الجزء الجديد من روايتك المفضله هتنزل بكره وكمان هيبقي في منجا للانميات اللي بتحبيها ملكيش حجه متجيش زي كل سنه.
ندي: خلاص جايه طالما الحوار فيه منجا.
هنا: عيله مصلحجيه اوي.
ساره: ها هنروح امتي؟
ندي: علي سته كدا.
البنات: تمام.
_________
عند جاسر وهو بيكلم رامي.
رامي: جاسر معرض الكتاب بكره وانا مش فاضي هروح عند خالتي امي حالفه عليا اني لازم اروح والاجزاء بتاعه الروايات اللي بتحبها هتنزل بكره لاول مره ولو مرحتش بكره احتمال ما تلقيهمش بعد كدا ولو مش عايز تروح لوحدك خد ادم معاك هو فاضي علشان علي وراه شغل.
جاسر وهو متردد: اممم ماشي هشوف كدا.
رامي:تمام.
جاسر وهو بيفكر: متروح يا جاسر ايه اللي هيحصل يعني حياتك مش هتتغير ويلا اهو تغير روتين حياتك دا شويه خلاص بعد الشغل هكلم ادم يجي معايا علشان مبقاش لوحدي.
(ملاحظة:رامي هو اللي كان بيجيب الروايات لجاسر)
______
تفتكروا حياه جاسر هتتغير ولا هتفضل زي ما هي كل دا هنعرفه الأجزاء الجايه والسلام عليكم ورحمه الله وبركاته ❤️
الكاتبه نوران ياسر❤️❤️
