Pinlano ko ang lahat
Ultimo sasabihin, aking isinulat
Nagsanay sa harap ng salamin
Di ko kasi alam kung paano sasabihin
Simula sa pag-apak ng paa
Hanggang sa bawat salita
Pinaganda at pinerpekto
Hinihiling na sayo'y malaki ang epekto
Pero mahal, huwag kang mangamba
Alisin mo ang iyong kaba
Di ko intensyon na ika'y mapahamak
Sa daang pareho nating tinatahak
Sa paglapat ng ating mga kamay
Diwa't kaluluwa'y nabuhay
Di mo alam kung gaano katagal naghintay
Ang pusong dati'y nalulumbay
Mahal, huwag magduda sa aking intensyon
Magmasid at pagkatiwalaan ang aking aksyon
Isang hamak na umiibig ng tunay
Ako na umaasang mundo'y magkakakulay
