عندي سؤال هل الحب ممكن يقتل طيب فيه سبب في الدنيا يخلي شخص يعيش ويستمتع بأذيه غيره... الإجابة ايوه وده نوع من المرض النفسي.. الحب ممكن يتحول لمرض قاتل... لان النفس اماره بالسوء
.......
الساعه ١١ بليل كنت راجع البيت تعبان ومرهق بعد يوم طويل من الشغل... دخلت الشقه ونديت علي مراتي ملك.. انتي فين يا ملك.. دخلت الاوضه مش موجوده... لكن لقيت الحمام منور قربت وفتحت الباب الحمام فاضي لا لا في حاجه فيه دم علي الارض... قربت من البانيو وفتحت الستارة وكانت الصدمه
.....
#لعنة_الموت
انا اسمي زياد طالب في كليه الاثار انا في سنه تانيه عايش مع ابويا وامي... احنا من المنصورة... حلم حياتي اكون عالم آثار كبير حاجه انا بسعي ليها من زمان.... هدخل في الموضوع علي طول من غير اطاله... كنت متفق مع صحابي بعد الامتحانات اننا نطلع رحله وكنت واخد وعد من اهلي اني لو جبت مجموع هيوافقوا..... لكن للاسف انا فاشل جبت مجموع صغير وعشان كده اهلي رفضوا اني اروح مع صحابي.. اتخانقت معاهم وخرجت للشارع وانا مخنوق ومدايق جدا... ورحت علي الارض بتاعتنا الي كان فيها كوخ صغير كل ما بتخنق بروح اقعد فيه..... روحت علي هناك الوقت كان ٦المغرب... قعدت وفضلت اتكلم مع نفسي واقول امتي اخلص تعليم انا زهقت.... حسيت اني مش لوحدي في المكان في حد معايا..... اتلفت حواليا مش شايف حد.. الدنيا ضلمه.. شغلت كشاف تليفوني.... وشوفت كان واحد قاعد في ركن دقنه طويله جدا وشعره كثيف.... قولتله انت مين وبتعمل اي هنا... قلي مهتم تعرف.... قولتله اه طبعا انت قاعد في ارضنا لازم اعرف انت مين.... قلي طيب اي رأيك احكيلك حكايه منها تعرف انا مين ومنها تفك الخنقه الي انت فيها.... قولتله احكي اهو نتسلي.... قلي الي هحكيه اغرب حكايه ممكن تسمعها.انا شخص محكوم عليه بالاعدام هتعرف ليه في اخر الحكايه بس بيني وبينك انا الاعدام قليل عليا...خليني احكيلك ... انا اسمي احمد ابو المجد كنت بدرس في كليه الحقوق.. تقدر تقول انا من الناس الي زي ما بيقولوا كده اتولدوا وفي بوقهم معلقه دهب... عيلتي غنيه جدا... وانا كل اهتمامي كان بالشكل والمظهر والبرستيج.. مفيش واحده في الكليه مكنتش معجبه بيا... لكن انا كنت بحب واحده تاني خالص كنت بحب امل.. من اول يوم شوفتها فيه وانا حبيتها مش زي اي بنت... كانت واضح انها بنت ناس.. حاولت اتعرف عليها لكنها رفضت... والي شافته قدامها من البنات الي اول ما بوصل الكليه بتجري عليا عشان تكلمني... اتاكدت اني بتاع بنات ويمكن ده السبب انها رفضت تتعرف عليا.... حبيتها عملت كل حاجه تتخيلها عشان بس تتقبل الكلام معايا لكني فشلت في ده....لحد ما في مره مسكتها من دراعها هزئتني قدام الجامعه كلها..... عرفت ان البنت دي مينفعش اتسلي بيها... وقررت اخيرا اني اخد خطوه ايجابيه في حياتي.... فكرت كتير لحد ما جيه اليوم الي رحت الجامعه وقبلتها.... وقولتلها انا عاوز اتقدملك... قلتلي ومين قلك اني موافقه عليك..... امشي من قدامي وبلاش تقل من كرامتك اكتر من كده... كلامها كان عامل زي النار الي بتحرق في قلبي..... في اليوم ده رجعت البيت وانا مش مصدق ان في بنت بتكرهني عندي غرور بطريقة مستفزه.... غبت عن الكليه اسبوع... لكن لما رجعت اتفاجأت ان امل اتخطبت كنت هتجنن ازاي تتخطب وتسبني... صحابي فضلوا يقولولي فوق من الي انت فيه ده.... رجعت البيت بقيت اكسر في كل حاجه وجالي انهيار عصبي... وانتقلت المستشفى.... خرجت منها بعد يومين مش عايز اكلم حد ولا اتعامل مع حد... بدأت اتجه للشرب.. بقيت اشرب كل الي بالك شربته بقيت مدمن.. مش بعمل حاجه غير اني بسهر واسكر طول الليل وانام طول النهار... لحد ما في يوم كنت مروح من سهره ماشي بطوح... لقيته في وشي بيسندني شيطان في صوره بشر... وبيقولي مالك فيك اي... بدأت اهلفط بالكلام منا سكران.... وصلني للبيت... وتاني يوم لقيته مستنيني تحت البيت وانا نازل وقلي انا ايوب انا الي وصلتك للبيت امبارح... شكرته وطلعتله فلوس... ابتسم وقلي انا مش عايز فلوس انا بس عاوز افهم ليه بتعمل كده في نفسك ومين امل دي... كنت عايز اقوله انت مالك.. لكن لقيت نفسي بحكيله
طبطب عليا وقلي والي يلاقي حل لمشكلتك دي تديله اي... قولتله مستعد اجبله الي يتمناه... قلي تعالي معايا ركبنا عربيتي ووصلنا لبيت صغير فتح الباب وقلي اتفضل... دخلت بيت كئيب الحيطان مرسوم عليها رموز واشكال غريبه.. دخلت اوضه عنده وقلي اقعد... انا هخلي امل تحبك وتسيب خطيبها... قولتله وده في مقابل اي... ضحك وقلي انا مش عايز منك حاجه بس عاوزك تعرف مين الي وقف جمبك وطلع من جيبه سلسله وقلي دي متتقلعش من رقبتك وتجبلي صوره للبنت دي.. السلسله كانت عبارة عن نجمه شكلها غريب.. وقلي ده سحر المحبه انا هخليها تحبك متخفش.... اتصلت بواحده من الكليه قولتلها تتصرفي وتجبيلي صوره لامل.. معرفش ازاي المهم انا عايز صوره.... بعد نص ساعه اتصلت بيا ورحت قبلتها وجبتلي صوره وقلتلي دي صوره الخطوبه انا سارقتها منها انت ناوي علي اي.... مش شغلك... رجعت لايوب تاني وقولتله الصوره اهي.... قلي تمام تقدر تمشي... رجعت البيت وفي دماغي مليون سؤال.. عاوز انام دخلت اوضتي ونمت.... حلمت اني واقف علي قمه جبل عالي وواقف قدامي واحد ده ايوب لكن كان شكله غير كان اسود وعلي وشه غضب ربنا وقلي انت اخترت طريقنا ومفيش رجوع.... ومدلي ايده مديت ايدي وسلمت عليه حسيت بألم في ايدي.. صرخت وقومت وكانت الصدمه لاني لقيت في وشي....
لقيت ايوب قاعد في وشي انت اخترت طريقك خلاص يا احمد.... غمضت عينيا وفتحتها تاني ملقتش حد.... اعوذ بالله من الشيطان الرجيم... قومت دخلت اخدت دش ولبست ونزلت الجامعه... مكنش في بالي حاجه خالص... لما وصلت الكليه... لقيت واحده صحبتي اسمها سمر جايه تقولي عندي ليك خبر بمليون جنيه..قولتلها خبر اي... قلتلي امل فسخت خطوبتها.. قولتلها امتي.. قلتلي امبارح.... وهي فين دلوقتي... قلتلي قاعده في المدرج جوه.... كنت عاوز اشوفها واضح ان كلام ايوب هيطلع صح.... رحت المدرج لقيتها قاعده مش باين عليها زعل... قربت منها وانا بقولها ربنا هيعوضك ان شاءلله متزعليش... بصتلي وابتسمت وقلتلي انا مش زعلانه..... انت ازيك واي اخبارك.... كنت متنح قصادها مش عارف اتكلم... هي دي امل بجد.... رديت عليها انا انا كويس الحمدلله.... وفضلت اتكلم معاها اتكلمنا كتير الحقيقه وهزرنا... مشيت وانا مش مصدق ان ده حصل... رجعت البيت لقيت ايوب مستنيني في مدخل العماره.... قولتله انا مش عارف اشكرك ازاي انا بجد عاجز عن شكرك..ضحك وقلي متشكرنيش انا تحت امرك في اي وقت ولو احتجت اي حاجه انت عارف المكان.... انت مشيت في طريقنا خلاص... دي نفس الجمله الي سمعتها في الحلم.... قولتله انتوا مين.. قلي هتعرف بعدين.... وسابني ومشي لحيرتي.... طلعت البيت وانا فرحان جدا.. كل يوم كنت انزل الكليه واقابل امل ونقعد نتكلم بالساعات... صحابي كانوا مستغربين من الي بيحصل معقول دي امل الي مكنتش بتطيقني.... لحد لما جتلي صحبتي الي جبتلي صوره امل كان اسمها اماني وقلتلي انت عملت اي بالصورة الي جبتهالك هو ده ليه علاقه بالي بيحصل دلوقتي.... قولتلها هو اي الي بيحصل... قلتلي انت فاهم قصدي كويس علاقتك الي اتحسنت بأمل بعد ما اخدت الصوره مني...قولتلها واي علاقه ده بالصوره.. قلتلي مش عارفه بس انا مش مرتاحه للموضوع ده...مر شهرين علي علاقتي بأمل لحد ما قررت اني اتقدم لامل وقولتلها.. فرحت جدا وحددتلي ميعاد مع اهلها ورحت اتقدمتلها واتوافق عليا واتخطبنا واتفقت مع اهلها اننا نتجوز الشهر الجاي... اهلها استغربوا استعجالي... لكن انا كنت شايف امل بالنسبالي حلم.. حلم جميل وعاوز اوصله..... وافقوا..... جهزت نفسي للجواز وجهزت شقه في حي من احياء القاهره.... وبدأت اتلقي التهاني من صحابي..لحد ما في يوم طلب مني واحد من صحابي اسمه عمر قلي تعالي اسهر معانا سهره كده... بصراحه قولت اروح اهي مره من نفسي... روحت وسهرنا في ملهي ليلي وشربت وسكرت...... رجعت البيت مش شايف قدامي ونمت... صحيت الصبح وقومت ودخلت الحمام ووقفت قدام المرايا واكتشفت المصيبه... السلسلة مش موجودة.. السلسلة الي ادهاني ايوب مش موجودة... راحت فين... خرجت بسرعة من الحمام واتصلت بعمر.. وسألته عنها... قلي سلسلة اي بس يا صحبي انت لسه نايم ولا اي... قولتله انا مش بهزر... قلي وانا معرفش انت بتتكلم عن اي.... نزلت من البيت وانا هتجنن ورحت الكليه لقيت امل قاعده وسرحانه... روحت بقولها صباح الخير... لقيتها بتقولي افندم عاوز اي... عاوز اي ازاي... انت جاي تتكلم معايا ليه اصلا امشي بدل ما خطيبي يشوفك معايا ويعمل مشكله... ضحكت وانا بقولها خطيبك منا خطيبك امل بطلي استهبال... لقيتها بتقولي خطيبي اي انت مجنون انا خطيبي اسمه حسن... لقيت الناس كلها واقفه تتفرج والي يضحك... قولتلها كفايه فضايح تعالي نتكلم بره الكليه... قلتلي لا لا انت مجنون اخرج معاك بصفتك اي... انا كنت هتجنن وفي نفس الوقت ربطت الكلام ده بضياع السلسلة... سبتها ومشيت ركبت عربيتي ووصلت لبيت ايوب.. فضلت اخبط لحد ما فتحلي وقلي.. انا كنت عارف انك هتاجي ضيعت السلسلة ومعاها ضاع حلمك... قولتله يعني اي واي علاقه السلسلة... قلي السلسلة فيها العهد الي بينك وبينهم يا احمد.. هما مين.. ضحك وقلي قولتلك هتعرف بعدين... طيب انا عايز حل للمشكله دي.. قلي لا مش سهل المره دي خصوصا ان امل فاقت من الي كانت فيه وهترجع لخطيبها... انت عرفت الكلام ده منين.. ضحك وقلي بكره تشوف انا هحاول اساعدك بس انت لازم توافق عدي عليا بكره بليل... رجعت الكليه تاني لقيت امل بتترجي في حسن انه يسامحها وانها مكنتش في وعيها... مكنتش عارف اعمل اي جيت اروح اتخانق معاها.. لقيت صوت في وداني بيقولي اصبر متبقاش غبي... سبتهم ورجعت البيت كنت حاسس بصداع... ونمت صحيت بليل علي رنه تليفوني كانت اماني صحبتي.. رديت نعم.. انت عملت اي في البنت ياخي حرام عليك.. ده ابوها جبلها شيخ والشيخ قال انها كان معمولها سحر واكيد ده بسبب الصوره الي انت اخدتها مني انا مش هسكت وهفضحك... ضحكت وقولتلها وهتعملي اي هتقولي انك سرقتي الصوره... قفلت السكه في وشي.... تاني يوم عرفت ان امل رجعت لحسن يعني اي كل الي عملته راح علي الفاضي.... رحت لايوب بليل علي حسب الاتفاق وقولتله بقولك اي انت تتصرف امل دي بتعتي محدش هيعرف ياخدها مني.... قلي اهدي هتعمل الي هقولك عليه... بالحرف الواحد.. قلي طيب اقعد انا حاولت اعمل سحر المحبه تاني لكن والدها حصنها لكن دلوقتي مفيش حل غير اني ابعد الشخص الي شغالها مفيش حل غير انك تخلص من حسن... اخلص منه يعني ايه اقتله... قلي هنقتله بس بطريق غير مباشر... ولقيت معاه صوره الخطوبه مسك مقص وقص صوره حسن منها... وقلي اجرح صباعك جرحته اخد دم وفضل يتمتم بكلام مش مفهوم وكتب حروف مقلوبه من الدم علي الصوره.... وقال يا من تسمعون فتطيعون بحق العهد الذي بيني وبينكم بحق شمهروش وبحق زوبعة لوبعه والعفاريت الاربعه تسلطوا علي صاحب هذا الجسد دمارا ترابا... وفضل يكرر وبعدها اداني الصورة وقلي الصورة دي تدفن في قبر او قدام قبر وانت الي هتدفنها... قولتله بس انا... قلي انا قولتلك تنفذ من غير اعتراض.... اخدت الصوره وركبت عربيتي مش عارف اعمل ايه بعد نص ساعه وصلت لمقابر علي طريق مصر اسكندريه الصحراوي.... نزلت وانا خايف وبتلفت حواليا حاسس باصوات همس جايه من كل مكان... لقيت التربي في وشي بيقولي نعم اي الي جابك هنا.... انا انا جاي ازور.... ضحك وقلي تزور بقولك اي هات من الاخر... عاوز تدفن اي ولا عايز عضم ميتين ولا تراب..... انا عايز ادفن الصوره دي قدام قبر... بسيطه ٢٠٠ جنيه... قولتله اتفضل وفضلت احفر ودفنت الصوره... وركبت عربيتي ورجعت لايوب الي قلي روح بيتك بقا وارتاح... رجعت البيت مش مطمن نمت من التعب..... صحيت الصبح ونزلت الجامعه... فضلت مركز مع امل اليوم كله وهي بتكلم حسن... لحد ما لقيته خارج من الكلية وهي خارجه وراه واضح انه زعل منها في حاجه... لكن فجأه صوت صرخه خلعت قلبي طلعت اجري لقيت حسن واقع علي الارض وامل بتصرخ خبطته عربيه ومات فضلت تصرخ وتلطم.... وفقدت الوعي كلنا رحنا معاها المستشفى جالها صدمه عصبيه حاده... رحت لايوب الي قلي ها اي رأيك دلوقتي السكه بقيت فاضيه قدامك لكن وانا بكلمه رن تليفوني كانت اماني... الو ايوه يا اماني في اي... احمد امل انتحرت.... انتي بتقولي اي..... امل انتحرت قفلت معاها وانا بقول لايوب ده مكنش اتفاقنا يا ايوب.. امل انتحرت... قلي وانا ذنبي اي... ذنبك اي انت خلتني عملت حاجات كتيره غلط عشان اوصلها وفي الاخر تموت.... قلي وانا كنت هعملها اي همنعها ازاي... انا مش عايز اعرفك تاني يا ايوب مش عاوز اشوفك تاني... قلي افتكر انك انت الي اخترت ده.... حياتك هتتقلب جحيم ولو بعد حين يا احمد.... رجعت تاني عشت اسوء ايام حياتي البنت الي حبيتها ماتت بسببي........فاتت سنين كتيره واتخرجت واتجوزت ملك... ملك كانت مخطوبه غصب لابن عمها لحد ما اتقابلنا حبيتني ومش هقول حبيتها لكن في النهاية اتجوزنا كنت في الوقت ده وصلت وبقيت المستشار احمد ابو المجد.... لكن بدأت تحصل خلافات بيني وبين مراتي بسبب اني طلعت مبخلفش ومراتي عاوزه تسبني.... هددتها بالقتل لو فكرت ترفع قضيه بالخلع... عارف يبني في حكمه كده بتقول الجزاء من جنس العمل.... كنت دايما بسمع ابويا بيقول كده... الساعه ١١ بليل كنت راجع البيت تعبان ومرهق بعد يوم طويل من الشغل... دخلت الشقه ونديت علي مراتي ملك.. انتي فين يا ملك.. دخلت الاوضه مش موجوده... لكن لقيت الحمام منور قربت وفتحت الباب الحمام فاضي لا لا في حاجه فيه دم علي الارض... قربت من البانيو وفتحت الستارة وكانت الصدمه البانيو غرقان دم لكن مفيش حد... اتصلت بالشرطه الي جات واتحفظت عليا والدم طلع دم مراتي.... لكن مفيش جثه ولا سلاح جريمة... لكن اتوجه ليا تهمه القتل واتحكم عليا بالاعدام خصوصا لما لقيوا الجثه مدفونه علي طريق صحراوي هي وسلاح الجريمة الي كان عليه بصماتي انا مقتلتهاش وبقولك ابن عمها الي قتلها وقولت ده كتير لكن محدش صدقني.... قدرت اهرب بعد الحكم ومش مهم ازاي.... بس انا تعبت من الهروب والشرطه جايه تقبض عليا... عرف حكايتي للناس عشان الكل يعرف ان كل ساقي سيسقي بما سقي...... تمت
......
للكاتب: زياد ابراهيم
انشاء الله تعجبكم القصة
ومتنسوش تدعو لأخواتنا في فلسطين
