မနက်စာစားရင်းနဲ့ ညက ဆောင်ဟွန်းရဲ့အတွင်းရေးမှူးဖြစ်သူဂျေးကို စုံစမ်းခိုင်းထားခဲ့တဲ့ ရှင်းဂျိတ်ခ်အကြောင်းကို သူ ဖတ်ကြည့်နေသည်။
သိပ်ထူးထူးခြားခြားတော့မရှိပါဘူး ဝါသနာပါရာကိုလုပ်နေတဲ့ သာမာန်ကောင်လေးတစ်ယောက်ပါပဲ။ သြစတေးလျမှာအလယ်တန်းအထိတက်ခဲ့ပြီး နောက်မှာ ကိုရီးယားကိုပြန်ပြောင်းလာပြီး ဒီမှာပဲကျောင်းပြီးခဲ့တယ်။ အကိုတစ်ယောက်ရှိပြီး အဖေဖြစ်သူက စုံထောက်ဘဝကနေအနားယူကာ အပြင်သင်တန်းတစ်ခုဖွင့်ပြီး ဆရာအဖြစ်လုပ်ကိုင်နေတယ်။ စီးပွားရေးလည်းပြေလည်ပုံရပြီး မိသားစုတွေချစ်ချစ်ခင်ခင်ရှိကြပုံရပါတယ်။
တစ်ခုပဲ အဲ့ကောင်လေးအကြိုက်ဆုံးအစားအစာက pepperoni pizzaဖြစ်နေတာပဲ၊ ဆောင်ဟွန်း လုံးဝစားလို့မရတဲ့ဟာကိုမှ သူကအကြိုက်ဆုံးဖြစ်နေတာ။
" ညှိလို့မရမဲ့တစ်ချက်တော့ပေါ်လာပြီ "
ကော်ဖီတစ်ငုံကိုသောက်ပြီးနောက်မှာ ရယ်ပြုံးရင်း ပါးစပ်မှ လွှတ်ခနဲထွက်သွားမိရတယ်။ ဆောင်ဟွန်းနဲ့ ရွယ်တူဖြစ်ပြီး အိမ်မှာခွေးလေးတစ်ကောင်မွေးထားသေးသည်။
"ခွေးများမွေးနေသေးတယ် သူကိုယ်တိုင်ကိုက ခွေးပေါက်နဲ့တူနေတာကိုများ "
စတွေ့ထဲက ဂျိတ်ခ်ကို ဆောင်ဟွန်းရဲ့စိတ်ထဲမှာ ရန်လိုတတ်တဲ့ခွေးပေါက်လေးတစ်ကောင်နဲ့တူတယ်လို့ မှတ်ချက်ချမိခဲ့သေးတာလေ။
စုံစမ်းရသမျှထဲမှာ ဂျိတ်ခ်အခုတစ်ယောက်တည်းနေနေတဲ့ အိမ်လိပ်စာလည်းပါပြီး၊ ဖုန်းနံပါတ်တောင်ပါသေးသည်မလို့ ဒီလောက်ဆို သူသိချင်တဲ့အချက်တွေလုံလောက်သင့်သလောက်လုံလောက်ပါပြီ။
စီးပွားရေးလုပ်ငန်းတွေကို ဆောင်ဟွန်းကိုလွှဲပေးကာ အမတ်လောင်းဖြစ်ဖို့ကြိုးစားနေတဲ့ ဆောင်ဟွန်းရဲ့အဖေဖြစ်သူ ပတ်လူကြီးမင်းနဲ့ ဆောင်ဟွန်းရဲ့ ဆက်ဆံရေးက အဆင်ပြေလှတယ်လို့တော့မဆိုသာ။
သွေးသားရင်းချာဆိုလို့ သားအဖနှစ်ယောက်ထဲသာရှိပေမဲ့လည်း တစ်ဦးတည်းသောသား သို့မဟုတ် သူ့စီမှာဆောင်ဟွန်းတစ်ယောက်တည်းသာရှိပါသည်ဆိုသော အတ္တကိုစွဲကိုင်ထားတဲ့ ဖေဖေက ဆောင်ဟွန်းငယ်စဥ်ကတည်းက မလုပ်ချင်သောကိစ္စများဖြစ်သည့်တိုင် ဖေဖေ့ရဲ့အမိန့်အာဏာတွေကိုမလွန်ဆန်နိုင်ပဲ ဖေဖေ့ရဲ့အလိုကျအကုန်လိုက်လုပ်ပေးရပြီး အရုပ်တစ်ရုပ်လိုမျိုးကြီးပြင်းလာခဲ့ရသည်။
