جحيم الفارس -قيد التعديل-

تعديل.

السلام عليكم ورحمة الله وبركاته

*لو أول مرة تقرأ الرواية وعدّيت على دا فحابّة أنبّهك إنه جاري تعديلها للأسباب المُوضّحة*

نظرًا لإني اتأخرت بما فيه الكفاية على الخطوة دي، وبما إن أغلب اللي يعرفني من بعد الرواية دي عارف إني مش راضية عن حاجات كتيرة فيها وإني كنت مُنتظرة أقرب فرصة عشان أعدّل فيها حاجات كتيرة بس كنت سايباها عشان هي كانت من أول الروايات اللي كتبتها وكدا -وبعضكم هنا كان كلّمني عنها وكنت قولتله الكلام دا قبل كدا-، فالحمد لله هبدأ آخد خطوة تعديل الرواية.

الرواية بالنسبالي كانت مُحاولة كويسة جدًا للمرحلة اللي كتبتها فيها خصوصًا وإنها كانت قبل سنين طويلة ومن قبل ما أتعمّق بأي شكل من الأشكال في الكتابة، ومكنش سبقها غير روايتين بس -حذفتهم من هنا لإنهم برضة هيحتاجوا تعديلات كتيرة مش هقدر أعدلها دلوقتي خالص-، لكن بالنسبالي دلوقتي فأنا رافضة فيها حاجات كتيرة جدًا منها ما هو مُتعلّق ببعض الشخصيات أو المشاهد أو حتى الأفكار اللي فيها.

وبصراحة أنا مش فاكرة منها كل حاجة، بس لإن البعض من حبايبي نبّهوني، وخوفًا من احتوائها بالفعل على أي مشهد -حتى لو كان بسيط- قد يُصيبني بذنبٍ دون علمي فهندوس في الخطوة دي بكل عزمنا لعلّي أصل إلى نتيجة مُريحة بالنسبالي في النهاية.

أنا مش هغيّر القصة كاملةً؛ لإني زي ما قولت دي كانت من أول الحاجات اللي كتبتها وبالنسبالي مع إن قصتها شِبه "مهروسة" إلا إني بحبها وبحب كل مُحاولاتي فيها رغم العبثية اللي مالياها؛ لذلك هعيد تصحيحها وتعديل شوية حاجات فيها.

مش عارفة بصراحة التعديلات دي هتاخدنا لفين بالظبط، خاصةً وأنا ناوية أحذف وأستبدل بعض المشاهد منها لإني معتش حساها، لكن أتمنى إنها تنال إعجابكم في النهاية.

وأخيرًا، اعذروني لو كنت طوّلت عليكم، لكن حسيت إني عايزة أُعلمكم بالخطوة دي قبل ما آخدها، والسلام عليكم. 💗