مرت أيام العزاء ثقيله على الجميع طلع آخر واحد من المعزيين يعلنون انتهاء العزاء محد كان له خلق لشي راح عبدالإله لشقته حصلها على سجدتها تقرا قران دخل عليها وهي مو منتبه له سجى يسمع صوتها اللي يشرح الصدر تقرا بخشوع وترتيل صوتها جميل بمعنى الكلمه طال النظر لها اول م شافها سكرت المصحف راح لها
شافته العنود وسكتت
عبدالإله : أكلتي ؟
العنود: ماني مشتهيه شي
عبدالإله : قومي تعالي ناكل امي جابت أكل
العنود : مابي أكل انت بالعافيه عليك
قام عبدالإله : اقول ماني مأكل لين تأكلين معي
زفرت العنود : تمام شوي وأجهزه
راحت تجهزه جاء معها للمطبخ ويبي يلطف الجو : كم عمرك تدرين اني م اعرفه
العنود وهي تجهز الأكل : ليه متزوج وحده ماتعرف عمرها
أنصدم عبدالإله من الرد : اءءء مدري م حصلت لي فرصه اسأل عن عمرك
العنود : ١٩
عبدالإله : العمر كله
العنود : وياك تعال آكل جهز الأكل
قعد معها بطاوله صار يأكل وهي تقلب الأكل ونطق : اكلي
العنود : مو مشتهيه
سكت عبدالإله بعد دقايق نطقت العنود : وين سمر
عبدالإله : عند تالا بغرفتها بتصير دايم عندها
العنود : تمام
بشقة نواف
دخل شقته شاف ساره تلعب مع سمر وجاء عندهم
نواف : سمر حبيبتي شوفي عمه ساره تبيك تحت
سمر: صدق؟
نواف : ايه يلا روحي لا تتأخرين عليها
وفعلاً راحت
ساره: نواف صدق عمتي نادتها؟
نواف وهو يسحب ساره ويحضنها : لا بس اشتقت لك
ساره تضرب راس نواف بخفه : ياقليل الأدب خليتها تروح
سكت نواف وسحب ساره معه لسرير وقعدها ورجع يحط رأسه بحضنها : ساره خليني شوي بنام من زمان مانمت نومه حلوه
ساره بدت تلعب بشعره لين نام أخذت جوالها تلعب فيه ونواف بحضنها
بشقة عبدالإله
عبدالإله : تبين نطلع نغير جو؟
العنود : لا
عبدالإله : ماش لا امشي يلا انتظرك تحت
العنود بإصرار : لا
عبدالإله : إلا يلا امشي
العنود بتأفف : قلت لا ياخي مالي نفس
قام عبدالإله ياخذ عبايتها : يلا يلا جبت لك عبايتك
ضحكت العنود يوم لاحظت انه يحاول يغيّر مودعا: طيب خلاص
ابتسم أخذ مفتاحه وفتح الباب : يلا انتظرك وتعالي من الحوش الخلفي
العنود : تمام
نزل وركب سيارته ينتظرها نزلت له وركبت معه
عبدالإله : بنروح البر الجو حلو ومنها تشمين هوا جديد
هزت رأسها العنود بالموافقه وعم الصمت بعد دقايق نطقت العنود : ليه تسوي كذا
عبدالإله باستغراب : كيف يعني
العنود : يعني تحاول تبعدني عن حزني ويوم احتاجك احصلك بجنبي
ابتسم عبدالإله يمسك يدها: لانه واجبي حتى لو اني حزين مقدر اسوي شي وأغيره كذا راضي بقدر ربي ولا أعارضه
حست العنود بيده وشدت عليها وابتسمت تحت النقاب وصل البر ونزل العزبه وجهز الشاهي والقهوه وشغل الحطب تحت أنظار العنود واللي بدت تفك معه شوي شوي وتتقبله أخذ فروته ولبسها والعنود قعدت قدام النار تدفي يدها لان الجو بدأ يبرد لاحظها عبدالإله ونطق : تعالي تدفي معي فتح فروته
العنود بتوتر : لا لا لا مو بردانه
عبدالإله : اقول تجين ولا اسحبك
العنود بارتباك : ها لا ماعليك مو بردانه صدقني
قام عبدالإله وسحبها ودخلها معه بالفروه تحت صدمت العنود فعلاً كانت بردانه وحست بدفى بحضنه بس سكتت انتبهت له وهو يلعب بشعرها ابتسمت بخفه أخذ يده الثانيه يلعب بيدها وهي ساكته بدت الدنيا تمطر العنود بعفويه : امطرتت
عبدالإله ببتسامه : ايه أمطرت
بدت العنود تناظر المطر لين ازداد وناظرت عبدالإله : ممكن شوي بقوم ابي العب بالمطر
ضحك عبدالإله : تلعبين ؟
حست بإحراج وسكتت ونطق عبدالأله: يلا قومي وانا بلعب معك بس اصبري بدخل الأغراض جوا السياره واجي
قامت العنود وهي فرحانه وفعلاً كانت تلعب وتمشي وتركض وتدور حول نفسها وهي مبسوطه وعبدالإله يناظرها من بعيد وهو مبسوط مايدري ليه مبسوط جاء وصار يلعب معها وشالها وصار يدور فيها وهي فرحانه وتضحك بأعلى صوتها نزلها ودخلها بفروته يحضنها تجمدت العنود من حركته بس ابتسمت ابتعد عبدالإله : نمشي
العنود : ايه
مشو ورجعو البيت
بشقة نواف
سمعت ساره صوت المطر وقومت نواف
ساره: نواف نواف قم تكفى شف مطر قم
نواف وهو يفتح نص عين: طيب شدخلني
تأففت ساره : يليل صدق كمل نوم بس كمل
وفعلاً كمل نوم وهي نزلت عند سمر وتالا ونوره يلعبون بالحوش
الجده وهي تشوفهم مبسوطين : يابناتي انتبهو لا يدخلكم برد
ساره وهي تضحك : لا تخافين ياجده
ابتسمت الجده وصارت تناظرهم وهي مبسوطه وتحمد ربها على وجودهم بحياتها
ببيت ابو جمانه
طلعت جمانه للحوش تلعب بالمطر وهي مبسوطه وتصور حست فيه احد يراقبها ناظرت بيت جرانهم شافت احد من الشباك يناظرها خافت ودخلت داخل بسرعه
سعد : اهخ ي القهر دخلت كنت قاعد اتأملها
ام سعد : سعددددد وصمخ ان شاءالله تعال بسرعه
سعد وهو يطلع من غرفته : سمي يمه سمي جيت
ام سعد : اخيراً طلعت من غرفتك
ضحك سعد يبوس رأسها : افا ي الوالده شفيك علي
ام سعد : لو الله يفكني من غرفتك كان الحين أنا بخير
سعد : ولا يهمك ماراح اقعد فيها نفس قبل إلا زعل حلوة البن
فارس اللي يتأمل الجو بغرفته من الشباك ويدعي ربه ان امه تشفى ويروح منها الورم ويرتاح
معليش ي جماعه البارت قصير شوي مشغوله هاليومين لكن بإذن الله بعوضكم وبكره ماقدر انزل عندي زواج اختي لا تنسونها من دعواتكم والنجمه 🩷🩷
